ឪពុក-ម្ដាយ គួរធ្វើរឿង៤យ៉ាងនេះ ដើម្បីឲ្យកូនចេះសន្សំលុយតាំងពីនៅតូចៗ
- 2018-04-11 02:48:25
- ចំនួនមតិ 0 | ចំនួនចែករំលែក 0
ឪពុក-ម្ដាយ គួរធ្វើរឿង៤យ៉ាងនេះ ដើម្បីឲ្យកូនចេះសន្សំលុយតាំងពីនៅតូចៗ
ចន្លោះមិនឃើញ
អាណាព្យាបាលទាំងអស់តែង ប្រាថ្នាចង់ ឃើញកូនមាន អត្តចរិតល្អ និង មានចំណេះដឹង ខ្ពស់។ បន្ថែមមួយ ចំណុចទៀត គំនិតសន្សំសំចៃលុយកាក់ គឺជា អ្វីដែលឪពុកម្ដាយរឹតតែ ចង់បាន ដើម្បីកុំឲ្យ ខ្លួនពិបាក ឧបត្ថម្ភកូន ដល់ធំ និង ជួយឲ្យ កូនមាន ម្ចាស់ការលើសេដ្ឋកិច្ចខ្លួនឯងបាន នៅពេលអនាគត ផងដែរ។
មាន ៤ចំណុចនេះ គឺ អាចជួយក្មេងតូចៗ ចេះជំនាញសន្សំសំចៃ។ Sabayបាន សម្ភាស លោក កុក ថា ប្រធានក្រុមសន្សំប្រាក់មិត្តជួយមិត្ត ជម្រាបជូនលម្អិតនូវ ចំណុចនីមួយៗ៖
១. គ្រប់គ្រងពេលទំនេរដោយនាំ កូនធ្វើរឿងមានប្រយោជន៍
អ្វីទៅដែល ហៅថារឿងមានប្រយោជន៍? ពេលទំនេរថ្ងៃឈប់សម្រាក ឬចុងសប្ដាហ៍ឪពុកម្ដាយគួរចំណាយពេលវេលានាំកូនៗទៅចូលរួមកម្មវិធីនានា ពិសេសបង្រៀនគេឲ្យចេះស្គាល់បរិយាកាសក្នុងសង្គម។ អ្នកអាចកាត់បន្ថយ ការនាំកូនទៅលេងតែតាមផ្សារទំនើប ឬ កន្លែងកម្សាន្តពេក ដើម្បីកុំឲ្យ កូនផ្ដោតអារម្មណ៍ទៅលើ ការទារទិញរបស់នេះ របស់នោះ តាមចិត្ត និងបន្ថយកម្សួលនៃ សម្ភារៈនិយមរបស់កុមារ។
២. នាំ កូនចូលរួម សិក្ខាសាលាពីរបៀបគ្រប់គ្រងលុយ
ការចូលរួមសិក្ខាសាលានានា គឺជា ចំណុចល្អ។ បើបានទៅចូលរួមវគ្គនិយាយ ពីរឿងលុយទៀតរឹតតែ ពិសេស ហើយ ភាគច្រើន មិនចាំបាច់ចំណាយលុយចូលរួមទេ។ នេះជាជ្រុងមួយ នៃការបន្សាំគំនិតកូនរបស់ អ្នក ដែលចេះតែចាយចេះតែទារលុយដូច ព្យុះឥតសំចៃ ហើយងាកមកស្រលាញ់ការសន្សែសន្សំវិញ។ ក្នុង សិក្ខាសាលាគឺជាឱកាស ល្អមួយដែលអាចឲ្យកូនអ្នកបានជួបស្ដាប់បានរាល់ខ្លឹមសារ នៃការផ្លាស់ប្ដូរបទ ពិសោធរបស់បុគ្គលជោគជ័យជាច្រើនទៀត។
៣. បណ្ដុះគំនិតសន្សំ លុយជានិច្ច
មុនសម្រេចចិត្តដក លុយទិញអ្វីមួយ ឪពុក ម្ដាយ គួរចំណាយពេលខ្លះរំលឹកកូននូវការសន្សំសំចៃ។ ស្ដាប់ទៅដូចជាពិបាក តែបើយើងឧស្សាហ៍ប្រើវិធីនេះគឺ ល្អបំផុតមួយ ក្នុងការ ពញាក់ស្មារតីកូនរបស់អ្នក។
៤. ផ្ដល់ភាពជាគំរូល្អទាក់ទងការ ចាយលុយ
ឪពុកម្ដាយត្រូវ ច្បាស់ខ្លួនឯងថា មានចំណុចនេះហើយឬនៅ? មានផែនការមេសម្រាប់ចំណាយល្អហើយ ឬនៅ? បើមានស្រាប់ហើយ គឺអាចជាមធ្យោបាយ ល្អជួយជ្រោមជ្រែងទឹកចិត្តកូន ឲ្យចេះស្តាយលុយ ជាជាងចំណាយខ្ជះខ្ជាយឥតទិសតំបន់។ ឪពុកម្ដាយត្រូវតែជា ជនគំរូដំបូងគេ មុននឹងណែនាំការសន្សំដល់កូន។