ឃើញសង្ហាបែបហ្នឹង មុំ សុធារ៉ា ទទួលបានតម្លៃខ្លួនថ្លៃប៉ុន្មាន?

2018-04-11 07:07:47
ចំនួនមតិ 0 | ចំនួនចែករំលែក 0

ចន្លោះមិនឃើញ

មួយរយៈចុងក្រោយនេះកំលោះសង្ហា មុំ សុធារ៉ា បានលេចមុខក្នុងខ្សែភាពយន្តភាគ និងខ្នាតធំជាបន្តបន្ទាប់ដល់ថ្នាក់ធ្វើឲ្យរូបគេរវល់ស្ទើរតែរកពេលសម្រាកមិនចង់បាន។ ចំណែកឯតម្លៃខ្លួនវិញក្នុង១ រឿង សុធារ៉ា ទទួលបានមិនចាញ់តារាសម្ដែងវ័យក្មេងរួមជំនាន់ជាមួយគ្នាប៉ុន្មានឡើយ។

ជុំវិញតម្លៃខ្លួនក្នុងការថតភាពយន្តខ្នាតធំ និង រឿងភាគនេះដែរ មុំ សុធារ៉ា បានឲ្យដឹងថា ចំពោះខ្សែភាពយន្តភាគចន្លោះពី ២៥ ទៅ ៣០ភាគលោកទទួលបានតម្លៃខ្លួន ៣ ៥០០ដុល្លារអាមេរិក ទៅ ៤ ០០០ដុល្លារ។ ប្រសិនបើរឿងភាគចាប់ពី ៤០ ភាគឡើងទៅលោក ទទួលបានចាប់ពី ៤ ៥០០ ទៅ ៥ ៥០០ តម្លៃនេះស្ថិតនៅលើការចរចាគ្នាទៀត។

រីឯរឿងខ្នាតធំដាក់បញ្ចាំងនៅរោងកុនវិញក្នុង១រឿង មុំ សុធារ៉ា ធ្លាប់ទទួលបានពីម្ចាស់ផលិតកម្មពី ៣ ០០០ ទៅ ៤ ០០០ ដុល្លារអាមេរិក ហើយតម្លៃដែលកំណត់ខាងលើនេះកន្លងមកខ្លួនធ្លាប់ទទួលបានពីម្ចាស់ផលិតកម្មមួយចំនួនរួចមកហើយដែរ។

តួឯកប្រុសក្នុងរឿង"ក្មេងទី៦" និយាយថា៖" តម្លៃខ្លួនថតរឿងដែលខ្ញុំបានរៀបរាប់ខាងដើមហ្នឹង គឺអាស្រ័យទៅលើទីតាំងជិត ឬ ឆ្ងាយទៀតណាអូន។ តម្លៃខ្លួនហ្នឹងខ្ញុំទើបតែឡើងនៅពាក់កណ្ដាលឆ្នាំ ២០១៧ នេះឯងបើគិតទៅជាងកន្លះឆ្នាំ"។

កន្លងមក មុំ សុធារ៉ា ធ្លាប់សម្ដែងខ្សែភាពយន្តភាគ និងខ្នាតធំមួយចំនួនដូចជា រឿង "ប៉ាម៉ាក់ប្រជែងកម្ម" “ស្លឹកចាក" “ជញ្ជីងជីវិត" “ខ្នោះបេះដូង" “ក្មេងទី៦" និងរឿងមួយចំនួនទៀត៕

អត្ថបទ៖ ឆុង ស៊ីណាន

រូបថត៖ផ្ដល់ឲ្យដោយ មុំ សុធារ៉ា