នាង គន្ធា នឹងត្រូវ អ៊ីណូ អូសដៃឡើងយន្តហោះយប់នេះហើយ!
- 2018-04-13 04:18:22
- ចំនួនមតិ 0 | ចំនួនចែករំលែក 0
នាង គន្ធា នឹងត្រូវ អ៊ីណូ អូសដៃឡើងយន្តហោះយប់នេះហើយ!
ចន្លោះមិនឃើញ
ទីបំផុតដល់ថ្ងៃហើយ ដែលតារាចម្រៀង អ៊ីណូ នឹងដឹកដៃសិស្សប្អូន នាង គន្ធា ឡើងយន្តហោះនៅយប់នេះ ចេញដំណើរទៅប្រទេសកូរ៉េ ជាទីដែលលោក និងមិត្តរួមអាជីពប៉ុន្មាននាក់ទៀត ត្រូវសម្ដែងក្នុងកម្មវិធីពីរផ្សេងគ្នា ក្នុងឱកាសបុណ្យចូលឆ្នាំខ្មែរប្រពៃណីជាតិនេះ។
កម្មវិធីទាំងពីរ ដែលម្ចាស់បទ "ប្រុសក្រញាញ់ខូចចិត្ត" នឹងត្រូវចូលរួមសម្ដែងជាមួយមិត្តរួមអាជីពផ្សេងទៀតមាន ទី១កម្មវិធីសម្ពោធក្លឹបក្រោមដី XX Club នៅថ្ងៃទី១៤មេសានៅតំបន់ស៊ូវុន និងថ្ងៃបន្ទាប់ទី១៥ ពួកគេនឹងចូលរួមក្នុងកម្មវិធីតន្ត្រីអបអរបុណ្យចូលឆ្នាំខ្មែរហៅថា " "មហាសង្ក្រាន្តខ្មែរនៅកូរ៉េ" គាំទ្រដោយស្ថានឯកអគ្គរាជទូតកម្ពុជាប្រចាំនៅសាធារណរដ្ឋកូរ៉េខាងត្បូង។
ដំណើរនេះ គឺលើកដំបូងរបស់ អ៊ីណូ ទៅប្រទេសកូរ៉េ និងសិស្សប្អូន នាង គន្ធា។ និយាយពី គន្ធា អ៊ីណូ ប្រាប់ថា ដើមឡើយនាងមិនបាន ស្ថិតក្នុងក្រុមតារាដែលត្រូវទៅសម្ដែងនៅប្រទេសកូរ៉េលើកនេះទេ។ ប៉ុន្តែដោយសារចង់ឲ្យនាង មានបទពិសោធន៍ការងារសិល្បៈច្រើន ពិសេសបទពិសោធន៍ក្រៅប្រទេសបែបនេះ លោកក៏បានស្នើសុំអ្នកធានាយកតារាខ្មែរនៅកូរ៉េ ពីបេក្ខភាពសិស្សប្អូន។
ផ្សំនឹងសមត្ថភាពរបស់ គន្ធា ផង និងមនោសញ្ចេតនារបស់អ្នកឧបត្ថម្ភផង នាងក៏ទទួលបានភ្លើងខៀវភ្លាមៗ។ "ខ្ញុំបានស្នើទៅអ្នកឧបត្ថម្ភនៅកូរ៉េ គឺបងកូឡា អោយជួយពិចារណាលើតារាចម្រៀងថ្មី នាង គន្ធា តើគាត់យល់យ៉ាងណា...ស្រាប់តែគាត់ឆ្លើយថា អូហ៍ គន្ធា គាត់ក៏ចូលចិត្តដែរ ពិសេសគឺចូលចិត្តបទថ្មីរបស់គាត់ដែលកំពុងល្បី "បេះដូងចេះស្រវឹង" អីចឹងគាត់ក៏យល់ព្រមទទួលយក គន្ធា ទៅសម្ដែងលើកនេះដែរតែម្ដង"។
នាង គន្ធា គឺជាអតីតបេក្ខភាពកម្មវិធីប្រឡងចម្រៀងពិភពលោក The Cambodian Idol រដូវកាលទី២។ នាងត្រូវគេចាប់អារម្មណ៍ខ្លាំងក្រោយបង្ហាញខ្លួនច្រៀងបទ "ម៉ែ" របស់តារាចម្រៀងចម្រើន សុភ័ក្ត្រ។ បើទោះកន្ទ្រាក់ដួងចិត្តអ្នកទស្សនាតាមរយៈបទនេះ ប៉ុន្តែ គន្ធា ធ្វើមិនបានល្អនៅវគ្គបន្ទាប់ ហើយក៏ត្រូវជ្រុះចេញពីកម្មវិធី។
ក្រោយមកនាង ក៏ត្រូវសាន់ដេ រើសបញ្ចូលជាតារាចម្រៀងរបស់ខ្លួន។ មកទល់បច្ចុប្បន្ននាងមានបទមួយចំនួនបានបញ្ចេញលើទីផ្សារហើយ មានដូចជា "កូនស្រី" “មន្តស្នេហ៍ប្រុសស្វិត" និងបទ "បេះដូងចេះស្រវឹង" ជាដើម ដែលកំពុងល្បីខ្លាំងក្នុងចង្កោមយុវវ័យ។
និយាយពីដំណើរទៅកូរ៉េវិញ គន្ធា និង អ៊ីណូ នឹងចេញដំណើរនៅវេលាម៉ោងប្រមាណ ១០យប់នេះ ហើយពួកគេ គ្រោងនឹងត្រឡប់មកប្រទេសកំណើតវិញនៅថ្ងៃទី ១៧ ខែឆ្នាំដដែល៕