ក្ដីសង្ឃឹមចុងក្រោយរបស់ នេន ទុំ ជាមួយ អាមេរិក ដឹងស ខ្មៅ ត្រឹមថ្ងៃនេះហើយ!

2018-04-18 02:57:54
ចំនួនមតិ 0 | ចំនួនចែករំលែក 0

ចន្លោះមិនឃើញ

បន្ទាប់ពីបរាជ័យលើកទី១ក្នុងបទសម្ភាសន៍ជាមួយស្ថានទូតអាមេរិកប្រចាំនៅកម្ពុជា កាលពីដើមខែនោះ ឥឡូវនេះ នេន ទុំ នឹងត្រូវចូលខ្លួនម្ដងទៀត ដើម្បីសម្រេចក្ដីសង្ឃឹមចុងក្រោយថាបានទៅអាមេរិក ឬអត់ នៅថ្ងៃនេះហើយ។

“ដោយសារតែកាលធ្លាក់លើកមុន ដូចមិនអស់ចិត្ត អីចឹងខាងម្ចាស់ឧបត្ថម្ភ គេក៏បានបានរៀបឯកសារឲ្យខ្ញុំជាថ្មី ដោយត្រូវចូលសម្ភាសន៍នៅថ្ងៃទី ១៨ នេះម្ដងទៀតបង"។

នេន ទុំ រួមសិល្បករខ្មែរមួយចំនួនទៀត រួមមាន អ៊ុន អាលីហ្សា សូដា នីតា ជុំ លីណូ និងតារាចម្រៀងថ្មីមួយរូប ត្រូវអាមេរិកបដិសេធផ្ដល់ទិដ្ឋាការចូលទៅធ្វើបេសកកម្មសិល្បៈលើទឹកដីរបស់ខ្លួន នាឱកាសបុណ្យចូលឆ្នាំខ្មែរ ទើបកន្លងផុតថ្មីៗ ក្រោយទាំងពួកគេ បានចូលខ្លួនទៅធ្វើបទសម្ភាសន៍ជាក្រុមកាលពីដើមខែមេសានេះ។

បរាជ័យគ្រានោះ បានធ្វើឲ្យសិល្បករខ្មែរមានការមិនអស់ចិត្ត ព្រោះមិនដឹងថា អ្វីជាដើមហេតុពិតប្រាកដដែលនាំឲ្យពួកគេទទួលលទ្ធផលអវិជ្ជមានគ្រានោះ ដោយសារតែបទសម្ភាសន៍បានធ្វើឡើងរយៈពេលខ្លី សួរតែពីរបីម៉ាត់ប៉ុណ្ណោះ ស្រាប់តែលទ្ធផលចេញមក គឺធ្លាក់ទាំងអស់គ្នាតែម្ដង។ និយាយដោយឡែក នេន ទុំ ប្រាប់ថា លោកពិតជាមិនអស់ចិត្តពិតមែនចំពោះការបរាជ័យ។

លោកថា "បរាជ័យនោះ វាមិនដឹងមកពីអី យើងទៅ ៥នាក់ តម្រង់ជួរសម្ភាសន៍ ខ្ញុំនៅក្រោយគេ អត់ទាន់បានសម្ភាសន៍ផង គេថាទៅជាក្រុម អីចឹងគេឲ្យធ្លាក់ទាំងអស់គ្នាតែម្ដង ទាំងខ្ញុំមិនទាន់បានសម្ភាសន៍ផង មិនដឹងថាគេសួរពីអីទៀត។ អីចឹងហើយទើបខាងអាមេរិក(អ្នកឧបត្ថម្ភ)ឯណោះ គេអត់អស់ចិត្ត ព្រោះខ្ញុំមិនទាន់បានសម្ភាសន៍ផង អីចឹងធ្លាក់ដោយសារអី!"។

ដោយសារតែបែបនេះ លោកថា ម្ចាស់ឧបត្ថម្ភក៏បានរៀបចំឯកសារម្ដងទៀត និងត្រូវសម្ភាសន៍ជាថ្មីនៅថ្ងៃនេះ ដែលជាក្ដីសង្ឃឹមចុងក្រោយ។ បើទោះកាលធ្លាក់ ធ្លាក់ទាំងអស់គ្នា ប៉ុន្តែមកដល់ឱកាសថ្មីនេះ តារាចម្រៀងរ៉េប ប្រាប់ថា ក្រៅពីខ្លួនលោក លោកមិនបានដឹងទេថា តារាណាខ្លះទៀត ក្នុងចំណោមអ្នកធ្លាក់សម្ភាសន៍មុននោះ បានចូលសម្ភាសន៍ជាថ្មី ឬអត់ឡើយ។

រូបភាព៖ផ្ដល់ដោយ នេន ទុំ

គិតត្រឹមម៉ោងនេះ មិនទាន់មានព័ត៌មានពីលទ្ធផលនៃបទសម្ភាសន៍របស់ នេន ទុំ ជាមួយស្ថានទូតអាមេរិកប្រចាំនៅកម្ពុជានៅឡើយទេ។ ប្រសិនបើលទ្ធផលវិជ្ជមាន នោះជាលើកដំបូងដែលដៃគូរ៉េបរបស់ ពូឃ្លាំង សម្រាប់ដំណើរទៅទឹកដីសហរដ្ឋអាមេរិក ខណៈសាមីខ្លួនអះអាងថា ពិតជាចង់ទៅខ្លាំង។ យ៉ាងណាក៏ដោយ លោក មិនហ៊ានអះអាងអ្វីមុនទេ រង់ចាំលទ្ធផលក្រោយសម្ភាសន៍សិន៕

អត្ថបទ៖ ទារិកា