Apple ប្រកាសថា អ្នកទិញ MacBook ក្នុងចន្លោះរយៈពេលមួយ មានបញ្ហាថ្ម

2018-04-21 08:13:00
ចំនួនមតិ 0 | ចំនួនចែករំលែក 0

ចន្លោះមិនឃើញ

កាលពីថ្ងៃទី២០ ខែមេសា ឆ្នាំ២០១៨ ក្រុមហ៊ុនយក្ស Apple បានប្រកាសថា ប្រភេទ MacBook Pro អេក្រង់ទំហំ១៣អ៊ីញ គ្មាន Touch Bar ដែលចេញលក់កាលពីចន្លោះខែតុលា ឆ្នាំ២០១៦ ដល់ខែតុលា ឆ្នាំ២០១៧ កំពុងមានបញ្ហាថ្ម។ Apple បានប្រកាសប្ដូរថ្មជូនដោយឥតគិតថ្លៃ សម្រាប់អតិថិជនទូទាំងពិភពលោក។

MacBook Pro 2016 (រូបភាព៖ CNET)

ក្រុមហ៊ុនផលិត iPhone ដដែលបានឲ្យដឹងថា បញ្ហាថ្មនេះមិនឈានដល់ការបង្កគ្រោះថ្នាក់ដល់អ្នកប្រើប្រាស់ឡើយ។ ការប្រកាសនេះ ត្រូវធ្វើឡើងលើទំព័រផ្លូវការរបស់ Apple ដោយមិនបានបញ្ជាក់ពីចំនួន MacBook Pro ដែលប៉ះពាល់ដោយសារបញ្ហាខាងលើនោះទេ។

បញ្ជាក់ថា Apple ទើបតែមានរឿងអាស្រូវពាក់ព័ន្ធនឹងបញ្ហាថ្ម កាលពីខែធ្នូ ឆ្នាំ២០១៧កន្លងទៅ ដោយបានធ្វើឲ្យ iPhone ស៊េរីចាស់ៗ ដូចជា iPhone6, 6s និង SE ជួបប្រទះនឹងបញ្ហាដើរយឺត ដើម្បីជួយឲ្យថ្មបានប្រសើរឡើង។ ក្រោយមក Apple បានធ្វើការសុំទោសជាសាធារណៈ ហើយបានប្រកាសប្ដូរថ្មជូនម្ចាស់ iPhone ម៉ូដែល ដែលទទួលរងការប៉ះពាល់ ក្នុងតម្លៃទាប ដោយបញ្ចុះពី ៧៩ដុល្លារ មកសល់ត្រឹម ២៩ដុល្លារតែប៉ុណ្ណោះ៕

ប្រភព៖ Kley Kley ប្រែសម្រួល៖ លាភ.