Motorola ចេញលក់ទូរសព្ទកាមេរ៉ាភ្លោះ តម្លៃមហាធូរថ្លៃ
- 2018-04-22 03:25:46
- ចំនួនមតិ 0 | ចំនួនចែករំលែក 0
Motorola ចេញលក់ទូរសព្ទកាមេរ៉ាភ្លោះ តម្លៃមហាធូរថ្លៃ
ចន្លោះមិនឃើញ
កាលពីថ្មីៗនេះក្រុមហ៊ុន Motorola បានប្រកាសចេញស្មាតហ្វូនស៊េរីថ្មីចំនួន ៣ ម៉ូដែល ជាប្រភេទស្មាតហ្វូនធន់កណ្ដាល មានតម្លៃធូរថ្លៃ ប៉ុន្តែលក្ខណៈសម្បត្តិអាចប្រៀបនឹងស្មាតហ្វូនកំពូលមួយចំនួនបាន។
ស្មាតហ្វូនទាំងបីម៉ូដែលគឺជាត្រកូល Moto G6 ដែលមានលក្ខណៈសម្បត្តិដូចៗគ្នាមួយចំនួន រួមមានដំណើរការដោយប្រព័ន្ធប្រតិបត្តិការ Android Oreo 8.0, អេក្រង់ដែលមានមាត្រដ្ឋាន 18:9 និងមានទ្រនាប់ស្កេនម្រាមដៃនៅលើប៊ូតុង Home។ ស្មាតហ្វូនទាំង ៣ ក៏មានបំពាក់នូវភ្លើង LED នៅផ្នែកខាងមុខសម្រាប់ការថតរូប Selfie។
Moto G6 Plus
ក្នុងចំណោម ៣ ម៉ូដែល G6 Plus ជាម៉ូដែលមានកម្លាំងខ្លាំងជាងគេ។ វាមានបំពាក់នូវអេក្រង់ទំហំ ៥,៩ អ៊ីញ អាចបង្ហាញរូបភាពក្នុងកម្រិត 1080 ភីកសែល, ដំណើរការដោយបន្ទះឈីប Snapdragon 630 ដែលមាន RAM ទំហំ ៤ GB និង ៦ GB។
កាមេរ៉ាភ្លោះនៅផ្នែកខាងក្រោយគឺរួមផ្សំគ្នាដោយកាមេរ៉ាមេកម្រិត ១២ MP និងកាមេរ៉ាទីពីរកម្រិត ៥ MP។ កាមេរ៉ានេះក៏មានបច្ចេកវិទ្យា Dual Pixel Auto Focus អាចថតវីដេអូក្នុងកម្រិតដល់ 4K។ កាមេរ៉ាខាងមុខមានកម្រិត ៨ MP អាចថតវីដេអូកម្រិត 1080 ភីកសែល។
ថាមពលថ្មមានទំហំ ៣២០០ mAh និងមានកម្រាស់ ៨ ម.ម ហើយមានជម្រើសអង្គផ្ទុកទិន្នន័យដល់ទំហំ ១២៨ GB ដែលអាចបន្ថែមទំហំបានតាមរយៈមេមូរីកាត។ G6 Plus នឹងមានលក់លើទីផ្សារបរទេសនៅសប្ដាហ៍ទីមួយនៃខែឧសភា ជាមួយតម្លៃចាប់ពី ៣៦៩ ដុល្លារ។
Moto G6
Moto G6 មានអេក្រង់ទំហំ ៥,៧ អ៊ីញ អាចបង្ហាញរូបភាពក្នុងកម្រិត 1080 ភីកសែល, ប្រើបន្ទះឈីប Snapdragon 450 ដែលមាន RAM ទំហំ ៣ GB និង ៤ GB រួមនឹងអង្គផ្ទុកទិន្នន័យទំហំ ៣២ GB និង ៦៤ GB (មានរន្ធសម្រាប់ដាក់មេមូរីកាត)។
កាមេរ៉ាភ្លោះមានកម្រិត ១២ MP លាយនឹង ៥ MP ដូចជា G6 Plus ដែរ ប៉ុន្តែមិនមានបច្ចេកវិទ្យា Dual Pixel និងគ្មានសមត្ថភាពថតវីដេអូដល់ 4K នោះទេ ជំនួសមកវិញនូវវីដេអូកម្រិត 1080 ភីកសែលក្នុងល្បឿន ៦០ ប្លង់/វិនាទី។ កាមេរ៉ាខាងមុខមានកម្រិត ៨ MP។
ថ្មមានទំហំ ៣០០០ mAh និងមានកម្រាស់ ៨,២ ម.ម ដោយមានតម្លៃចាប់ពី ៣០៧ ដុល្លារ។
Moto G6 Play
ចំណុចខ្លាំងរបស់ G6 Play គឺមានថ្មទំហំដល់ ៤០០០ mAh។ Motorola អះអាងថាថាមពលថ្មរបស់ G6 Play អាចប្រើបានដល់ ៣៦ ម៉ោង ពេលសាកបំពេញម្ដង។
មានប្រើបន្ទះឈីប Snapdragon 430, អេក្រង់ទំហំ ៥,៧ អ៊ីញ អាចបង្ហាញរូបភាពក្នុងកម្រិត 720 ភីកសែល, RAM មានទំហំ៣ GB និងអង្គផ្ទុកទិន្នន័យទំហំ ៣២ GB (មានរន្ធសម្រាប់ដាក់មេមូរីកាត)។
កាមេរ៉ាខាងក្រោយមានតែមួយគ្រាប់មានកម្រិត ១៣ MP អាចថតវីដេអូកម្រិត 1080 ភីកសែលក្នុងល្បឿន ៣០ ប្លង់/វិនាទី ឯកាមេរ៉ាខាងមុខមានកម្រិត ៨ MP។ Moto G6 Play មានតម្លៃប្រមាណ ២៤៦ ដុល្លារ៕