ពេជ្រ អាវីហ្សា គាស់កកាយរូបចាស់ៗ កាលខ្លួនជា Fan ផ្កាប់មុខជាមួយរៀមច្បងសិល្បៈ

2018-04-23 05:07:59
ចំនួនមតិ 0 | ចំនួនចែករំលែក 0

ចន្លោះមិនឃើញ

រូបថតជាមួយរៀមច្បងសិល្បៈជាច្រើនសន្លឹកត្រូវបានតារាស្រីល្បីខាងសំញែងដើមទ្រូងផ្ញើមកកាន់ Sabay ដោយនាងបានរៀបរាប់ឲ្យដឹងថា កាលណោះនាងគឺជា Fans ផ្កាប់មុខមួយដើរយាម Idol របស់ខ្លួនដាច់បាយដាច់ទឹក ញឹកញយខ្លាំងណាស់។

ដោយមានផ្ទះនៅជិតស្ថានីយប៉ុស្តិ៍លេខ៣ចាស់ ហើយមានបងធម៌ជាអ្នកសិល្បៈផងនោះ គឺអ្នកនាង គឹម លក្ខិណា កញ្ញា ពេជ្រ អាវីហ្សា តែងតែទៅទស្សនាការប្រគំតន្ត្រីជាញឹកញយ មិនសូវអាក់ខាន រាល់ពេលមានការប្រគំតន្ត្រីម្ដងៗ។

អាវីហ្សា ប្រាប់ថា កាលណោះខ្លួនមានវ័យប្រហែលជា១០ឆ្នាំស្ដើង ហើយនាងមិនមានឈាមជ័រជាអ្នកសិល្បៈនោះទេ ប៉ុន្តែខ្លួនមាននិស្ស័យជាមួយនឹងសិល្បៈតាំងតែពីដឹងក្តីមកម្ល៉េះ។ ពេលមានការប្រគំតន្ត្រីស្ថានីយប៉ុស្តិ៍លេខ៣ម្ដង នាងតែងតែទៅទស្សនា ហើយសុំថតជាមួយរៀមច្បងសិល្បៈមិនសូវរំលងឡើង ហើយរូបថតទាំងនោះ ខ្លួនបានផ្ដិតរក្សាទុកជាអនុស្សាវរីយជាច្រើន។ ជាងនោះទៅទៀត អាវីហ្សា ប្រាប់ថា មានពេលខ្លះខ្លួនបានគេចពីសាលារៀន មកទស្សនាការប្រគំតន្ត្រី ហើយថែមទាំងខំសន្សំប្រាក់ដែលម្ដាយឲ្យទៅរៀន មិនហ៊ានទិញនំញាំទេ គឺយកទៅទិញរបស់នៅផ្សារដើម្បីជូន Idol របស់ខ្លួន។ ខាងក្រោមនេះ គឺជារូបភាពដែល ពេជ្រ អាវីហ្សា បានថតជាមួយហើយ សន្សំរូបទាំងនោះទុក មានដូចជា កញ្ញា ពៅ បញ្ញាពេជ្រ អ្នកនាង សឿ សុធារ៉ា លោក ហេង ប៊ុនលី អ្នកនាង សួន ចន្ថា អ្នកនាង សៀង ស្រីណុច និង លោក ទេព រិនដារ៉ូ ជាដើម។

តារាសម្ដែងស្រីដែលធ្លាប់រងអំពើហិង្សាពីសំណាក់សង្សាររបស់ខ្លួនរូបនេះបានលើកឡើងថា ការពិតនាងបានថតជាមួយតារាជាច្រើនទៀត ប៉ុន្តែរូបទាំងនោះបានបាត់បង់ខ្លះ ត្បិតអីនាងឧស្សាហ៍រើផ្ទះញឹកញាប់ពេក។ នាងថា រូបចាស់ទាំងអស់ខាងលើ គឺមានតម្លៃសម្រាប់ខាងខ្លាំងណាស់ ហើយនាងនឹងបន្តរក្សាវាទុកមិនឲ្យបាត់បង់ឡើយ ព្រោះវាជាអនុស្សាវរីយ៍ មិនអាចបំភ្លេចបានឡើយ៕