៥ចំណុចដែល Bayern មានប្រៀបលើ Real Madrid ប្រកួតយប់នេះ

2018-04-25 07:54:39
ចំនួនមតិ 0 | ចំនួនចែករំលែក 0

ចន្លោះមិនឃើញ

Bayern Munich នឹងបើកទ្វារកីឡដ្ឋាន Allianz Arena របស់ខ្លួននៅយប់នេះដើម្បីស្វាគមន៍ Real Madrid ក្នុងការប្រកួត វគ្គពាក់កណ្ដាលផ្ដាច់ព្រ័ត្រ Champions League។

Real Madrid គឺជាបងធំនៅពានរង្វាន់ទ្វីបអឺរ៉ុប ជាក់ស្ដែងពួកគេលើកពាន១២ដង ជាពិសេសឈ្នះរហូត៣ដងនៅ៤ឆ្នាំចុងក្រោយ។ Bayern គឺជាក្រុមខ្លាំង ប៉ុន្តែបើមើលលើប្រវត្តិជួបគ្នាកន្លងមកទល់នឹង Real Madrid ពួកគេធ្វើមិនសូវបានល្អនោះទេ។

ក្រុមជើងឯកអាល្លឺម៉ង់បានទម្លាក់ Real វគ្គពាក់កណ្ដាលផ្ដាច់ព្រ័ត្រដោយបាល់ប៉េណាល់ទីកាលពីរដូវកាល ២០១១-១២ តែបន្ទាប់មកពួកគេចាញ់រហូត (ធ្លាក់វគ្គពាក់កណ្ដាលផ្ដាច់ព្រ័ត្រ ២០១៣-១៤ និង វគ្គ៨ក្រុម ២០១៦-១៧)។ យ៉ាងណា Sabay សូមបង្ហាញមូលហេតុ៥ចំណុចនេះដែល Bayern អាចបានប្រៀបលើ Real Madrid៖

១. កំណត់ត្រាដ៏រឹងមាំក្នុងទឹកដីរបស់ Bayern

Allianz Arena គឺជាបន្ទាយដ៏រឹងមាំរបស់ Bayern Munich និងជាឋាននរកសម្រាប់ក្រុមដែលទៅលេងនៅទីនោះ។ ចាប់តាំងពីខែមេសា ឆ្នាំ២០១៧មកពួកគេមិនដែលចាញ់ក្នុងទឹកដីឡើយថែមទាំងស៊ុតចូល១១គ្រាប់នៅ២ប្រកួតចុងក្រោយ។

២. យុទ្ធសាស្ត្រគ្រូតា Jupp Heynckes

កាលពីដើមរដូវកាល Bayern បានធ្លាក់ទម្រង់លេងខ្លាំងនៅ Bundesliga ថែមទាំងចាញ់ Paris Saint-Germain ធ្ងន់.កនៅ Champions League ធ្វើឲ្យក្លឹបបណ្ដេញ Carlo Ancelotti និងយកលោក Heynckes មកវិញ។ ដូចឃើញស្រាប់ក្រុមមានមូលដ្ឋាននៅទីក្រុងម៉ូនិចរីកចម្រើនយ៉ាងរហ័សដោយលើកពានលីគ និងឈានដល់វគ្គពាក់កណ្ដាលផ្ដាច់ព្រ័ត្រ UCL។

៣. ការពឹងផ្អែកតែលើ Ronaldo

Real Madrid នៅរដូវកាលនេះពឹងផ្អែកច្រើនលើ Ronaldo ជាក់ស្ដែងខ្សែប្រយុទ្ធសញ្ជាតិព័រទុយហ្គាល់ស៊ុតចូល១៥គ្រាប់នៅ Champions league និង៤៣គ្រាប់គិតលើគ្រប់កម្មវិធី។ ងាកទៅមើលកីឡាករផ្សេងៗវិញដូចជា Benzema រកបានតែ២គ្រាប់ប៉ុណ្ណោះហើយ Bale បាន១៤គ្រាប់ ដូច្នេះបើ Bayern បិទ Ronaldo ជាប់ Real អាចមានបញ្ហា។

៤. ការឡើងជើងរបស់ Javi Martinez

Martinez គឺជាកម្លាំងមិនអាចខ្វះបានរបស់លោក Heynckes។ ខ្សែបម្រើការពារសញ្ជាតិអេស្ប៉ាញនឹងមានភារកិច្ចចាប់ Isco, ជួយជ្រោមជ្រែងតំបន់បម្រើ និងចុះទៅការពារពេល Real Madrid វាយសម្រុក។ Heynckes ត្រូវការកីឡាករប្រភេទនេះជួយក្រុមដូចឆ្នាំដែលពួកគេឈ្នះ UEFA Champions League លើកចុងក្រោយ។

៥. ទម្រង់លេងក្រឡាប់ចាក់របស់ Real Madrid

Real Madrid គឺជាជើងខ្លាំងនៅ Champions League តែនៅ La Liga និង Copa del Rey វិញក្រុមនេះមានទម្រង់លេងប្រែប្រួលម្ដងខ្លាំងម្ដងខ្សោយ មិនអាចឲ្យទុកចិត្តបាន ដូច្នេះបើ Bayern Munich អាចចាប់ចំណុចខ្សោយការលេងពានក្នុងស្រុករបស់លោក Zidane បានពួកគេនឹងមានសង្ឃឹមច្រើននៅជើងទីមួយ៕