ផលិតកររឿង «វិបល្លាស» ប្រតិកម្មរឿងខ្មែរខ្វះខ្មែរគាំទ្រ ដោយលើកហេតុផលសំខាន់មួយ
- 2018-04-25 14:50:09
- ចំនួនមតិ 0 | ចំនួនចែករំលែក 0
ផលិតកររឿង «វិបល្លាស» ប្រតិកម្មរឿងខ្មែរខ្វះខ្មែរគាំទ្រ ដោយលើកហេតុផលសំខាន់មួយ
ចន្លោះមិនឃើញ
ដោយសារការបរាជ័យ និងការបាក់ទឹកចិត្តលើការផលិតភាពយន្តខ្មែរ តាំងពីដើមឆ្នាំ២០១៨នេះ មានផលិតករភាពយន្ត និងអ្នកដឹកនាំរឿងមួយបានដាក់ចិត្តចុះចាញ់លែងផលិតភាពយន្តតទៅទៀត។
ពិសេសថ្មីៗនេះ រឿង «វិបល្លាស» ដឹកនាំសម្តែងដោយយុវជនខ្មែរ ដែលអ្នកជំនាញ និងផលិតករកុនគ្រប់ៗគ្នាកោតសរសើរពីស្នាដៃផលិត សាច់រឿង និងបច្ចេកទេស ប្រាកដដោយគុណភាពឈានឡើងពីបណ្តាខ្សែភាពយន្តខ្មែរពីមុនតែបែរជាមិនអាចទាក់ចិត្តទស្សនិកជនខ្មែរឱ្យចូលទស្សនាបាន។
ដោយមានប្រិយមិត្តមួយចំនួនបានអះអាងថាតភាពយន្តនេះចាក់ផ្សាយមិនចំពេលវេលា ព្រោះផ្តើមចាក់បញ្ចាំង ក្រោយពិធីបុណ្យចូលឆ្នាំខ្មែរភ្លាមៗ គឺថាចាប់ពីថ្ងៃទី ១៩ ខែមេសា ហើយចំពេលរឿង Avengers ដែលភាពយន្តហូលីវូដល្បីទូទាំងពិភពលោកចូលមកដល់ទៀត។ ចំណុចនេះគឺបានផ្តាច់ផ្លូវរស់របស់ភាពយន្តដ៏កម្រនេះបាត់ទៅហើយ។
ទាក់ទងនឹងការលើកឡើងនេះ ផលិតករភាពយន្តរឿង «វិបល្លាស» លោក Deependra Gauchan ក៏បង្ហាញពីចំណាប់អារម្មណ៍ថ្មីមួយថា ផលិតករខ្មែរអាចនឹងឈប់ផលិតភាពយន្ត ខណៈការព្យាយាមក្នុងស្រុកមិនត្រូវបានគាំទ្រគ្រប់គ្រាន់ ដែលផលិតករត្រូវខាតដើមខាតចុង។ បើភាពយន្តខ្មែរលែងមានការផលិតនៅថ្ងៃក្រោយ តើមោទកភាពជាតិខ្មែរនឹងនៅមានទៀតទេ? លោកក៏បានបន្តក្នុងសារមួយទៀតថា៖ «សាកស្រមៃមើល បើអ្នកទៅទស្សនាភាពយន្តនៅផ្សារទំនើប តែបែរជាមិនមានរឿងខ្មែរតទៅទៀត ហើយអ្នកមើលឃើញតែគេបញ្ជាំងរឿងបរទេស។ មុនដំបូងមិនអីទេ តែក្នុងពេលមួយអ្នកនឹងយល់ថាបាត់បង់អ្វីម្យ៉ាងដែលជាមោទកភាពជាតិរបស់អ្នក»។
ភាពយន្តបាននាំតម្លៃ និងការចងចាំគ្រប់សម័យកាល ហើយអាចក្លាយជាមរតកសម្រាប់មនុស្សជំនាន់ក្រោយ ពិសេសវាជាផ្ទាំងទស្សនីយភាពបង្ហាញសង្គមដ៏មានតម្លៃបង្អួតដល់បរទេសថាអ្វីជាខ្មែរ។ តែបើថ្ងៃមួយស្រាប់តែលែងមានភាពយន្តខ្មែរ អ្នកអាចស្រមៃចេញទេពីជាតិនិយមរបស់អ្នក ហើយតើអ្នកមានអ្វីខ្លះប្រាប់គេថាខ្មែរក៏អាចធ្វើបាន? លោក Deependra ទទួលស្គាល់ថាភាពយន្តខ្មែរមិនទាន់ល្អដូចបរទេសទេ ព្រោះភាពយន្តបរទេសមានខ្ទង់ចំណាយលើសលុប ហើយសម្បូរធនធានមនុស្ស តែយុវជនខ្មែរក៏កំពុងព្យាយាមហើយ បើសិនមិនជួយគាំទ្រផ្តល់តម្លៃ តើធ្វើម៉េចជួយឱ្យអ្នកផលិតឱ្យមានដើមទុន និងទឹកចិត្តបន្តស្រោចស្រង់វិស័យភាពយន្តខ្មែរតទៅទៀតបានទៅ?
ប្រទេសមួយមានវប្បធម៌ និងស្នាដៃភាពយន្តឈានឡើង ល្គឹកណាប្រទេសនោះបង្កើតវប្បធម៌ ឬភាពយន្តនោះដោយខ្លួនឯង តែផលិតករ ឬអ្នកដឹកនាំរឿងមិនអាចទៅបង្ខំទស្សនិកជនឱ្យមកទស្សនារឿងរបស់ខ្លួនដែរ។ ដូចនេះហើយនេះជាពេលវេលាសម្រាប់អ្នកគាំទ្រភាពយន្តខ្មែរជួយផលិតករខ្មែរពង្រឹងវិស័យភាពយន្តឱ្យឈានឡើងជាបន្ត លោក Deependra Gauchan បន្ថែម៕
ងាកមកលោក សាង ច័ន្ទវិសាល អ្នកដឹកនាំរឿង «វិបល្លាស» ក៏បង្ហាញការអស់សង្ឃឹម ក្តីព្រួយបារម្ភពីអនាគតនៃការផលិតភាពយន្តខ្មែរផងដែរ។ លោកថា ផលិតករភាពយន្តថ្មីៗជាច្រើនក៏មានការពិចារណាម្តងទៀតដែរក្នុងការផលិតភាពយន្តដាក់លើរោងភាពយន្ត ព្រោះថាការចំណាយលើការផលិតភាពយន្តមិនងាយនឹងទទួលបានផលចំណេញមកវិញហើយអ្នកដឹកនាំរឿង ចាងហ្វាងផលិតកម្មក៏ប្រឈមមុខនឹងភារកិច្ចបង់ពន្ធជូនរដ្ឋតាមការកំណត់មួយដែលនឹងឈានមកដល់។