ព្រឹត្តិការណ៍ប្រកួត LOL ដ៏ធំដំបូងនៅអាស៊ានមកដល់សម្រាប់កម្ពុជាហើយ

2018-04-26 04:10:49
ចំនួនមតិ 0 | ចំនួនចែករំលែក 0

ចន្លោះមិនឃើញ

ការប្រកួតកីឡាអេឡិចត្រូនិកលើវិញ្ញាសា League Of Legends លំដាប់ពិភពលោកធំបំផុត និងលើកដំបូងប្រចាំតំបន់អាស៊ានបានមកដល់សម្រាប់កីឡាករកម្ពុជាដែលស្វែងរកកៅអីទៅប្រកួតជុំផ្តាច់ព្រ័ត្រប្រទេសសិង្ហបុរីហើយ។

តាមការឲ្យដឹងពីអ្នករៀបចំកម្មវិធីថា ការប្រកួតត្រូវធ្វើឡើងពីរដំណាក់កាលគឺដំណាក់កាលប្រកួតជម្រុះស្វែងរកក្រុមតំណាងឲ្យប្រទេសនីមួយៗ និងដំណាក់កាលទី២ប្រកួតជុំផ្តាច់ព្រ័ត្រនៅប្រទេសសិង្ហបុរីដែលប្រជុំដោយក្រុមខ្លាំងៗតំណាងប្រទេស១០ប្រចាំតំបន់។ ប្រទេសដែលចូលរួមមាន ថៃ វៀតណាម សិង្ហបុរី ម៉ាឡេស៊ី ឥណ្ឌូណេស៊ី ហ្វីលីពីន កម្ពុជា ឡាវ មីយ៉ាន់ម៉ា និងប្រ៊ុយណេ។

កាលបរិច្ឆេទប្រកួតជម្រុះក្នុងប្រទេស

ចុះឈ្មោះចូលរួមប្រកួត៖ ថ្ងៃទី២៥ មេសា ដល់ ទី១១ ឧសភា ឆ្នំា ២០១៨ (ចូលចុះឈ្មោះ)
ការប្រកួតធ្វើឡើង៖ ថ្ងៃទី២៦ ឧសភា ដល់ ទី៣ ខែមិថុនា ឆ្នាំ២០១៨ (ចុចអានព័ត៌មានបន្ថែម) កាលបរិច្ឆេទប្រកួតជុំផ្តាច់ព្រ័ត្រនៅសិង្ហបុរី
វគ្គសន្សំពិន្ទុតាមពូលពីថ្ងៃទី២៩ ដល់ ៣០ ខែ កក្កដា ឆ្នាំ២០១៨ (ចុចអានព័ត៌មានបន្ថែម)
ការប្រកួតវគ្គផ្តាច់ព្រ័ត្រ ថ្ងៃទី៤ ដល់ ៥ សីហា ឆ្នាំ២០១៨ (ចុចអានព័ត៌មានបន្ថែម)

អត្ថប្រយោជន៍

រង្វាន់វគ្គជម្រុះតំណាងប្រទេស៖ ក្រុមលេខ១ បាន៥០០០ coin និងទទួលបានការឧបត្ថម្ភទាំងអស់សម្រាប់ធ្វើដំណើរទៅប្រកួតជុំផ្តាច់ព្រ័ត្រនៅសិង្ហបុរី។
រង្វាន់ជើងឯកប្រចាំព្រឹត្តិការណ៍៖ ក្រុមលេខ១ ទទួលបានកុំព្យូទ័រម៉ាក Razer Blade HD 256GB ចំនួន ៦គ្រឿង ដែលមានម៉ៅ ក្តារចុច និងកាសពាក់ត្រចៀក។ កុំព្យូទ័រ១គ្រឿងតម្លៃ២០០០ដុល្លារ ដូច្នេះ៦គ្រឿងតម្លៃសរុប១២០០០ដុល្លារអាមេរិក។
ក្រុមទាំង១០មកពី១០ប្រទេសទទួលបានការឧបត្ថម្ភទាំងអស់ក្នុងការធ្វើដំណើរកម្សាន្តទៅកាន់តំបន់ទេសចរណ៍លំដាប់ពិភពលោកជាច្រើននៅប្រទេសសិង្ហបុរី និងចូលរួមក្នុងព្រឹត្តិការណ៍ប្រគំតន្ត្រីដែលមានតារាចម្រៀងល្បីៗលំដាប់ពិភពលោកចូលរួមសម្តែង។

ព្រឹត្តិការណ៍ LOL E-Sports ដ៏ធំលើកដំបូងនៅអាស៊ាននេះទទួលបានការគាំទ្រពីក្រសួងវប្បធម៌ សហគមន៍ និងយុវជនរបស់ប្រទេសសិង្ហបុរី និងមានការឧបត្ថម្ភគាំទ្រពីក្រុមហ៊ុនឯកជនជាច្រើន។ ជាមួយគ្នាសហព័ន្ធកីឡាអេឡិចត្រូនិកកម្ពុជាក៏បានសហការដើម្បីរៀបចំការប្រកួតជម្រុះនៅកម្ពុជាដើម្បីស្វែងរកក្រុមតំណាងកម្ពុជាទៅចូលរួមប្រកួត៕

អត្ថបទ៖ ជាន ចាន់រ៉ា