ម៉ឺន សុភា ទារបំណុលចាស់ពី វ៉ាត់ ឆារ៉ាឡេក បានទេ ឬបន្តគ្រាំចិត្តជាថ្មីទៀត
- 2018-04-26 07:03:35
- ចំនួនមតិ 0 | ចំនួនចែករំលែក 0
ម៉ឺន សុភា ទារបំណុលចាស់ពី វ៉ាត់ ឆារ៉ាឡេក បានទេ ឬបន្តគ្រាំចិត្តជាថ្មីទៀត
ចន្លោះមិនឃើញ
កីឡាករ ម៉ឺន សុភា ធ្លាប់ឈឺចាប់ដោយសារអ្នកប្រដាល់ថៃ វ៉ាត ឆារ៉ាឡេក ចំនួន៤ដងមកហើយ ជាពិសេសជំនួបជុំចុងក្រោយរវាងអ្នកទាំងពីរកាលវិលជុំសន្សំពិន្ទុប៉ុន្មានសប្ដាហ៍មុននេះនៃខ្សែក្រវាត់ស្រាបៀលីអូ។ តើថ្ងៃអាទិត្យនេះជើងខ្លាំងរបស់កម្ពុជាខាងលើអាចសងសឹកវិញបានទេ?
ម៉ឺន សុភា ប្រាប់ឲ្យដឹងថា កីឡាករ វ៉ាត់ ឆារ៉ាឡេក ម្នាក់នេះចូលចិត្តថយទប់ ជាជាងដើរចូលវ៉ៃ ឬចូលប្ដូរទៅ ប្ដូរមក។ ថៃខាងលើនេះ ពេលសាកល្បងគ្នាកន្លងមក ហើយដឹងថាផ្លែរបស់ខ្លួនមិនធ្ងន់ដូច កីឡាករកម្ពុជា គឺជាហេតុរឹតតែមិនហ៊ានចូលប្ដូរទៅ ប្ដូរមកនោះឡើយ ពោលគិតតែថយទប់។
ការជួបគ្នាវគ្គពាក់កណ្ដាលផ្ដាច់ព្រ័ត្រនេះ ម្ចាស់មេដាយប្រាក់ស៊ីហ្គេមខាងលើ បង្ហើបប្រាប់ខ្លះៗថា ប្ដូររបៀបវ៉ៃផ្សេងពីមុនហើយ ដូចជាព្យាយាមបុកឲ្យខ្លាំង ព្រោះដៃគូហាក់មិនសូវមានស៊ុហ្វប៉ុន្មានទេ ប៉ុន្តែថៃម្នាក់នេះក្បាច់ល្អ។ សុភា សង្ឃឹមឈ្នះច្រើននាថ្ងៃអាទិត្យនេះលើកីឡាករ វ៉ាត់ ឆារ៉ាឡេក អាចថាដឹងពីក្បាច់ និងមានវិធីត្រៀមក្នុងការយកឈ្នះ។
ម៉ឺន សុភា ជួបប្រកួតជាមួយអ្នកប្រដាល់ថៃ វ៉ាត់ ឆារ៉ាឡេក ៤លើកមកហើយ គឺ ៣ដង ចាញ់ និង ១ដង ស្មើ។ ការប្រកួតថ្ងៃអាទិត្យ ទី២៩ មេសា ២០១៨ នេះ ជាជំនួបលើកទី៥ ហើយ វគ្គនេះអ្នកណាចាញ់ហាលអាវ អ្នកឈ្នះឡើងទៅវគ្គផ្ដាច់ព្រ័ត្រ។ វគ្គពាក់កណ្ដាលផ្ដាច់ព្រ័ត្រមួយគូទៀតនោះ ឡុង សុភី ប៉ះ រ៉ាស៊ីសឹង្ហា ៕