ឧបសគ្គធំ៣ រារាំងការលើកពាន UCL រដូវកាលនេះរបស់ Liverpool

2018-04-26 07:39:52
ចំនួនមតិ 0 | ចំនួនចែករំលែក 0

ចន្លោះមិនឃើញ

Liverpool បានយកឈ្នះ Roma រហូត៥ទល់នឹង២ ក្នុងការប្រកួត UEFA Champions League វគ្គពាក់កណ្ដាលផ្ដាច់ព្រ័ត្រជើងទីមួយកាលពីយប់ថ្ងៃអង្គារ។

Liverpool ឈ្នះ UCL ឆ្នាំ២០០៥

ក្រុមរហស្សនាមហង្សក្រហមមានទម្រង់លេងគួរឲ្យភ្ញាក់ផ្អើលនៅពានទ្វីបអឺរ៉ុបជាក់ស្ដែងស៊ុតបញ្ចូលទីសរុប៤៤គ្រាប់តាំងពីវគ្គជម្រុះមកហើយក្រុមណាដែលប៉ះពួកគេរបូតមិនតិចជាង៥គ្រាប់ទេគិតទាំងពីរជើង។ ទោះយ៉ាងនេះក្ដី Liverpool ពិបាកនឹងឈ្នះពានរដូវកាលនេះណាស់បើមើលលើមូលហេតុសំខាន់៣នៅខាងក្រោម៖

១. ការខ្វះបទពិសោធន៍៖

UEFA Champions League មិនមែនជាពានងាយស្រួលប្រជែងឡើយបើទោះជាមានកីឡាករលំដាប់ពិភពលោកក៏ដោយឧទាហរណ៍ជាក់ស្ដែង Barcelona, Paris Saint-Germain និង Manchester City សុទ្ធតែត្រូវធ្លាក់ចេញ។ Liverpool លេងវគ្គពាក់កណ្ដាលផ្ដាច់ព្រ័ត្រនៅពាននេះកាលពី១០ឆ្នាំមុន ហើយលេងវគ្គផ្ដាច់ព្រ័ត្រចុងក្រោយកាលពីឆ្នាំ២០០៧ ដូច្នេះវាអាចពិបាកសម្រាប់ពួកគេដែលប្រជែងជាមួយក្រុមមានកីឡាករបទពិសោធន៍ជោកជាំដូចជា Real ឬ Bayern។

កីឡាករក្រុម Liverpool បច្ចុប្បន្ន

២. មិនទាន់ឈ្នះ Roma ដាច់នៅឡើយ៖

ទោះនាំមុខជើងទីមួយ ៥ទល់នឹង២ តែ Roma ធ្លាប់មានប្រវត្តិវាយបក Barcelona ៣ទល់នឹង០នៅជើងទីពីរដូច្នេះ Liverpool នៅតែមានភាគរយធ្លាក់ចេញពីកម្មវិធី Champions League មិនអាចបន្តដំណើរទៅវគ្គផ្ដាច់ព្រ័ត្រដណ្ដើមពាន បើសិនជាភ្លាត់នៅទឹកដីអ៊ីតាលីសប្ដាហ៍ក្រោយ។

៣. ការប្រឈមមុខជាមួយយក្សអឺរ៉ុប៖

ក្រុម២ផ្សេងទៀតដែលរងចាំ Liverpool នៅវគ្គផ្ដាច់ព្រ័ត្រមិនថា Real Madrid ឬក៏ Bayern Munich សុទ្ធតែជាឧបសគ្គគំរាមកំហែងដល់ពួកគេ។ Real ជាជើងឯក១២សម័យកាល ធ្លាប់ឈ្នះពាន៣ដងនៅ៤ឆ្នាំចុងក្រោយ ខណៈ Bayern Munich ជាជើងឯក៥សម័យកាលធ្លាប់ឈ្នះពាន៥ដងស្មើ Liverpool តែក្លឹបអាល្លឺម៉ង់មួយនេះលេងពាន Champions League ឥតដាច់ និយាយស្រួលស្ដាប់គឺមានបទពិសោធន៍ច្រើនជាងកីឡាករភាគច្រើនក្នុងក្រុម Liverpool៕