ឃើញសខ្មៅហើយ ករណីតារាសម្ដែង ហ្វីហ្វី បដិសេធទៅគេងជាមួយភ្ញៀវ រហូតរងអំពើហិង្សាពីជនជាតិចិន

2018-04-26 12:44:54
ចំនួនមតិ 0 | ចំនួនចែករំលែក 0

ចន្លោះមិនឃើញ

ជម្លោះហិង្សាជាមួយថៅកែ KTV ជនជាតិចិននៅបឹងត្របែក ជាមួយតារាសម្ដែង ហ្វីហ្វី បានបន្តមកដល់ថ្ងៃទី៣ ហើយទើបមានដំណោះស្រាយ ក្រោយជាប់គាំងរកដំណោះស្រាយមិនចេញអស់រយៈពេល ៣ថ្ងៃ។

ដំណោះស្រាយនៅក្នុងជម្លោះនេះ គឺថៅកែ KTV យីហោ QI HAO GONG GOAN ជាជនជាតិចិន ដែលបានប្រើអំពើហិង្សាលើតារាសម្ដែង ហ្វីហ្វី កាលពីរាត្រីថ្ងៃទី ២៣ មេសា កន្លងទៅ បានយល់ព្រមសងសំណងទៅតារារងគ្រោះនូវទឹកប្រាក់ ៨០០០ដុល្លារអាមេរិក ព្រមជាមួយលិខិតសុំទោសមួយច្បាប់ផង ដើម្បីបញ្ចប់រឿង។

សំណងទឹកប្រាក់ជិត ១ម៉ឺនដុល្លារនេះ គឺលើសមុនឆ្ងាយអំពីសំណងរបស់ថៅកែចិន ដែលសុខចិត្តផ្ដល់ភ្លាមៗទៅនារីរងគ្រោះដែលជាសិល្បករនូវទឹកប្រាក់ ៥០០ដុល្លារ ជាថ្នូរកុំអោយមានការប្ដឹងផ្ដល់។ ប៉ុន្តែដោយសារ ភាគីរងគ្រោះមិនសុខចិត្ត ទើបករណីដំណោះស្រាយលើវិវាទហិង្សាខាងលើ បានបន្តមកដល់ព្រឹកថ្ងៃទី ២៦ មេសានេះ ក្រោយមានអ្នករងគ្រោះប្ដឹងទៅសមត្ថកិច្ចមូលដ្ឋានឲ្យជួយដោះស្រាយ។

កាលពីរាត្រីថ្ងៃទី ២៣ មេសា ២០១៨ មានករណីជម្លោះហិង្សាមួយបានកើតឡើងនៅចំណុចមុខ KTV យីហោ QI HAO GONG GOAN ដែលមានថៅកែជាជាតិចិន។ សាច់រឿង ដំបូងឡើយ តារាសម្ដែង និងចម្រៀង ហ្វីហ្វី ដែលត្រូវបានអះអាងថា មិនមែនជាស្ត្រីបម្រើការនៅខារ៉ាអូខេខាងលើ ត្រូវមិត្តភក្ដិនាង ហៅឲ្យទៅជួយអង្គុយកំដរភ្ញៀវនៅចំណុច KTV របស់ជនជាតិចិននោះ។

រូបថត៖ ហ្វេសប៊ុក Chhaya Neat

ក្រោយមក ភ្ញៀវដែលគេដឹងថាជាមិត្តភ័ក្ដិថៅកែ KTV ខាងលើ ចង់បានតារាស្រី ទៅគេងជាមួយ ប៉ុន្តែនាងមិនព្រម។ បញ្ហានេះ ក៏ដឹងដល់ថៅកែជនជាតិចិន និងបានចូលមកអន្តរាគមន៍ ដោយបង្ខំឲ្យ ហ្វីហ្វី ទៅជាមួយភ្ញៀវដែលជាមិត្តភ័ក្ដិខ្លួន ប៉ុន្តែនាងនៅតែបដិសេធ ធ្វើឲ្យជនជាតិរូបនេះ ខឹងនឹងបានប្រព្រឹត្តហិង្សា ដោយការទាត់ធាក់លើរូបរាងកាយ។

ក្រោយហេតុការណ៍ តារាស្រីរងគ្រោះ ក៏បានទាក់ទងប្ដឹងទៅសមត្ថកិច្ចមូលដ្ឋានឲ្យជួយរកយុត្តិធម៌ ក្រោយបានបដិសេធមិនទទួលយកប្រាក់ ៥០០ដុល្លាររបស់ថៅកែចិន ដែលមានចេតនាប្ដូរឲ្យបញ្ចប់រឿង៕

អត្ថបទ៖ ទារិកា