សេន ប៊ុនថេន ឃីម ឌីម៉ា ជាគូឯកក្នុងកម្មវិធីប្រដាល់ថ្មីមួយនៅបាត់ដំបង

2018-04-27 09:50:26
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកប្រដាល់ចាស់វស្សា សេន ប៊ុនថេន រួមនិងសិស្សប្អូន ឃីម ឌីម៉ា នឹងត្រូវប្រកួតបើកឆាកដំបូងនៃកម្មវិធីប្រដាល់ Kmen Top Fighter នៅឯខេត្តបាត់ដំបងនាថ្ងៃសៅរ៍ ទី៥ ខែឧសភា ឆ្នាំ២០១៨។

ឯកឧត្ដម តែម ម៉ឺន ប្រធានសហព័ន្ធគុនខ្មែរ បានឲ្យដឹងថា កម្មវិធីប្រដាល់ខាងលើនេះ ជាកម្មវិធីថ្មីមួយ ដែលរួមសហការគ្នារវាងក្រុមហ៊ុនភេសជ្ជៈប៉ូវកម្លាំង Kmen ទូរទស្សន៍ PNN និងសហព័ន្ធផ្ទាល់តែម្ដង។ កម្មវិធីនេះដែរជាការរួមចំណែកអភិវឌ្ឍន៍ជាបន្តបន្ទាប់ នៃវិស័យប្រដាល់គុនខ្មែរឲ្យរីកចម្រើនបន្ថែមទៀត។

ប្រធានសហព័ន្ធខាងលើបន្តទៀតថា ការប្រកួតនេះធ្វើជារៀងរាល់មួយខែម្ដង រយៈពេលពេញមួយឆ្នាំ រីឯទីកន្លែងប្រកួតវិញនោះ គឺត្រូវចល័តតាមបណ្ដាខេត្តផ្សេងក្នុងប្រទេសកម្ពុជា ហើយប្រកួតចុងក្រោយលើកទី១២ នឹងធ្វើឡើងនៅរាជធានីភ្នំពេញ។ ឯកឧត្ដម ក៏ជម្រាបជូនដំណឹងនេះទៅដល់មហាជនតាមបណ្ដាខេត្តនានា កុំភ្លេចចូលរួមគាំទ្រ និងទស្សនាកម្សាន្តអារម្មណ៍ផងដែរ។

ការប្រកួតខាងលើនេះនឹងចាប់ផ្ដើមឡើងនៅថ្ងៃទី៥ ខែឧសភា ឆ្នាំ២០១៨ នៅឯទីរួមខេត្តបាត់ដំបង ចាប់ពីម៉ោង៤ល្ងាចតទៅ ក្នុងនោះមាន៥គូ ដែលត្រូវឡើងសង្វៀន សេន ប៊ុនថេន និង ឃីម ឌីម៉ា ត្រូវស្វាមគន៍កីឡាករថៃ និង៣គូទៀតមិត្តភាពជាតិនិងជាតិ៕

អត្ថបទ៖ នួន ស៊ីណា