លោកត្រាំ ព្រមានចំៗ ទាក់ទងនឹងរឿងប្រជែងសិទ្ធិជាម្ចាស់ផ្ទះ World Cup ២០២៦
- 2018-04-27 12:21:32
- ចំនួនមតិ 0 | ចំនួនចែករំលែក 0
លោកត្រាំ ព្រមានចំៗ ទាក់ទងនឹងរឿងប្រជែងសិទ្ធិជាម្ចាស់ផ្ទះ World Cup ២០២៦
ចន្លោះមិនឃើញ
ប្រធានាធិបតីដូណាល់ ត្រាំ ក្នុងថ្ងៃនេះ បានព្រមានប្រទេសមួយចំនួនកុំឲ្យប្រឆាំងនឹងការប្រជែងសិទ្ធិក្នុងការធ្វើជាម្ចាស់ផ្ទះ World Cup ២០២៦ របស់សហរដ្ឋអាមេរិក រួមជាមួយប្រទេសពីរទៀត។
លោកប្រធានាធិបតីសហរដ្ឋអាមេរិក រូបនេះ បានបង្ហោះសារក្នុងគណនីផ្លូវការ Twitter ថា ប្រទេសខ្លួន រួមជាមួយកាណាដា និងមិកស៊ិកបានព្រមព្រៀងក្នុងការប្រជែងសិទ្ធិធ្វើជាម្ចាស់ផ្ទះ World Cup ឆ្នាំ ២០២៦ ខាងមុខ។
ក្នុងសារដដែល លោកត្រាំ បានសរសេរព្រមានចំៗ មិនឲ្យបណ្ដាប្រទេសដែលអាមេរិកគាំទ្រ ធ្វើការឡាំប៉ាប្រឆាំងនៃការប្រជែងមួយនេះ។ លោកបានសរសេរថា "វាជារឿងគួរឲ្យអៀនខ្មាសបំផុត" បើសិនជាប្រទេសទាំងនោះ ធ្វើផ្ទុយពីនេះ។
លោកថែមទាំងបានសរសេរបន្ថែមទៀតថា៖ "តើមានហេតុផលអីដែលយើងត្រូវគាំទ្រប្រទេសទាំងនោះទៀត បើសិនជាពួកគេ (រាប់បញ្ចូលទាំងអង្គការសហប្រជាជាតិ) មិនគាំទ្រយើងផងនោះ"។
ប្រទេសដែលប្រជែង អាមេរិក-កាណាដា-មិកស៊ិកក្នុងការយកសិទ្ធិធ្វើជាម្ចាស់ផ្ទះ World Cup ២០២៦ នេះ គឺប្រទេសម៉ារ៉ុក ដែលជាប្រទេសនៅតំបន់អាហ្វ្រិកខាងជើង។
លទ្ធផលនៃការប្រជែងនេះ នឹងត្រូវបានប្រកាសដោយ FIFA នៅថ្ងៃទី ១៣ មិថុនាខាងមុខ។
សូមបញ្ជាក់ផងដែរថា អាមេរិកធ្លាប់ធ្វើជាម្ចាស់ផ្ទះ World Cup ម្ដងហើយកាលពីឆ្នាំ ១៩៩៤។
World Cup ឆ្នាំនេះនឹងត្រូវលេងនៅរុស្សី ខណៈនៅឆ្នាំ ២០២២ កម្មវិធី នឹងប្រព្រឹត្តទៅនៅកាតា៕