ស្ងាត់ៗ គ្រូ PSG ប្រកាសចែកផ្លូវជាមួយក្លឹប និងទម្លាយពីអនាគត Neymar

2018-04-27 13:08:09
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកចាត់ការ PSG លោក Unai Emery ក្នុងថ្ងៃនេះ បានប្រកាសថា លោកនឹងចាកចេញពីក្លឹបនៅពេលរដូវកាលនេះចប់។

អ្នកចាត់ការអេស្ប៉ាញបាននិយាយអរគុណប្រធានក្លឹប PSG លោក Nasser Al-Khelaifi និងក្រុមការងារដែលបានជួយសម្របសម្រួលការងាររបស់លោកនាពេល ២ឆ្នាំនេះ។

លោក Emery បានបើកកកាយថា រដូវកាលដំបូងរបស់លោក នៅ PSG ជួបរឿងលំបាកច្រើន។ កាលនោះ ខ្សែប្រយុទ្ធ Zlatan Ibrahimovic ទើបចេញពីក្លឹប ដូច្នេះលោកត្រូវរៀបចំប្រព័ន្ធប្រយុទ្ធឲ្យរៀបរយវិញ។ លោកបាននិយាយថា ការចាញ់ Barcelona ៦-១ នៅកីឡដ្ឋាន Camp Nou គឺជាពេលលំបាកបំផុតរបស់លោក ក្នុងការដឹកនាំក្លឹបបារាំង។

ថ្លែងពីអនាគតរបស់ខ្សែប្រយុទ្ធ Neymar លោក Emery បានគូសបញ្ជាក់៖ "ក្លឹបមានគម្រោងធំណាស់នៅថ្ងៃខាងមុខ ដូច្នេះ Neymar ចង់ធ្វើការអភិវឌ្ឍខ្លួន និងបន្តលេងនៅក្លឹប"។

លោក Emery ត្រូវបានតែងតាំងជាអ្នកចាត់ការ PSG កាលពីឆ្នាំ ២០១៦ ក្រោយជួយ Sevilla ឲ្យលើក Europa League ៣រដូវកាលជាប់គ្នា។ ទោះជាយ៉ាងណា PSG ក្រោមការដឹកនាំរបស់លោក ឡើងមិនផុត Champions Leagueវគ្គ ១៦ក្រុម ឡើយនៅពីររដូវកាលចុងក្រោយ បើទោះជាបានជះលុយរាប់លានដើម្បីនាំចូលកីឡាករល្បីៗ យ៉ាងណាក៏ដោយ៕

ប្រភព៖ Goal ប្រែសម្រួល៖ ហ៊ីម រស្មី