ផលិតកម្មក្នុងស្រុកមួយ ចាប់ដៃគូជាមួយថៃ គ្រោងផលិតភាពយន្ត៣០រឿង

2018-04-29 00:10:19
ចំនួនមតិ 0 | ចំនួនចែករំលែក 0

ចន្លោះមិនឃើញ

ផលិតកម្ម Rich Kids Media បានចុះព្រមព្រៀងជាមួយក្រុមហ៊ុន Ganjab មកប្រទេសថៃលើការបោះទុនផលិតភាពយន្តមួយគ្នាមួយ ដើម្បីនាំភាពយន្តកម្ពុជាទៅចាក់បញ្ចាំងនៅក្រៅប្រទេស ដោយគម្រោងនៃការផលិតនោះ ផលិតកម្មទាំង២ គ្រោងផលិតរហូតដល់ទៅ ៣០រឿងនៅក្នុងប្រទេសកម្ពុជា។ នេះបើតាមការលើកឡើង ក្នុងពិធីចុះកិច្ចព្រមព្រៀងរបស់ផលិតកម្មទាំង២ កាលពីរសៀលថ្ងៃនេះ។

លោក នៅ រតនា ចាងហ្វាងផលិតកម្ម Rich Kids Media និងជានាយក្រុមហ៊ុន Rich Kids Media Co.,Ltd បាឲ្យដឹងថា ដោយមើលឃើញវិស័យភាពយន្តនៅប្រទេសកម្ពុជាកំពុងតែមានសន្ទុះឡើងខ្លាំង បានធ្វើឲ្យលោកមានបំណងចង់វិនិយោគលើវិស័យនេះ នៅក្នុងនោះ លោកបានទៅសិក្សាទីផ្សារភាពយន្តនៅប្រទេសថៃជាច្រើនលើក ហើយក៏បានជួបជាមួយក្រុមហ៊ុន Ganjab ដែលជាក្រុមហ៊ុនផលិតភាពយន្តល្បីឈ្មោះមួយនៅប្រទេសថៃ រួចក៏សម្រេចចាប់ដៃគូរកស៊ីជាមួយគ្នាតែម្ដងទៅ។

លោក នៅ រតនា ចាងហ្វាងផលិតកម្ម Rich Kids Media

លោកថា តាមឆន្ទៈនៃក្រុមហ៊ុនទាំង២ គឺមានបំណងចង់នាំភាពយន្តខ្មែរទៅចាក់បញ្ចាំងនៅក្រៅប្រទេស ជាពិសេសប្រទេសថៃ និងប្រទេសក្នុងតំបន់អាស៊ានតែម្ដង ប៉ុន្តែជំហានដំបូងផលិតកម្មគ្រោងធ្វើសាកល្បងទីផ្សារនៅកម្ពុជា និងថៃជាមុខសិន។

លោក នៅ រតនា បានលើកឡើងទៀតថា ភាពយន្តដែលផលិតឡើង គឺជាការតែងនិពន្ធថ្មី ដោយអ្នកនិពន្ធខ្មែរ និងថៃ មានលក្ខណៈត្រូវនឹងបរិបថនៃប្រទេសទាំងពីរ មិនមែនយករឿងថៃមកថតឡើងវិញឡើយ ត្បិតអីទីផ្សារនៃភាពយន្តនោះ គឺសម្រាប់ចាក់បញ្ចាំងនៅតាមរោងភាពយន្ត មិនមែននៅតាមស្ថានីយទូរទស្សន៍ឡើយ។

តាមកិច្ចព្រមព្រៀងខាងលើ ក្នុង១ឆ្នាំផលិតកម្មគ្រោងផលិត៥ទៅ៦រឿង ក្នុងនោះអាចមាន១រឿងទៅ២រឿង គ្រោងនាំចេញទៅទីផ្សារអាស៊ានផងដែរ។ សម្រាប់ទីផ្សារក្នុងស្រុក និងប្រទេសថៃ ក្រុមហ៊ុនគ្រោងចំណាយក្នុងមួយរឿង៨ម៉ឺនដុល្លារ ទៅ១០ ម៉ឺនដុល្លារ ហើយប្រសិនបើភាពយន្តមួយណា មានទីផ្សារសម្រាប់នាំចេញទៅទីផ្សារអាស៊ាន ក្នុងមួយរឿងអាចចំណាយខ្ទង់ជាង៣០ម៉ឺនដុល្លារ។

ភាពយន្តដំបូងបាននិពន្ធរួចរាល់អស់ហើយ ជាភាពយន្តបែបភ័យខ្លាចនិងកំប្លែង ក្នុងនោះក៏មានតារាល្បីៗរបស់ប្រទេសថៃចូលរួមសម្ដែងផងដែរ។ ចំពោះចំណងជើងរឿង និងឈ្មោះតារាដែលចូលរួមសម្ដែងខាងផលិតកម្មមិនបានទម្លាយឲ្យដឹងឡើយ ប៉ុន្តែបានប្រាប់ថា ភាពយន្តនោះគ្រោងថត ជាង១ខែទៀត បច្ចុប្បន្នកំពុងស្វែងរកទីតាំងចុះថត និងរត់ការឯកសារ ដើម្បីសុំសិទ្ធិថត។

តំណាងក្រុមហ៊ុន Ganjab បានលើកឡើងថា ដោយផ្អែកលើគោលបំណងតែមួយរួមគ្នា និងបន្តចាប់ដៃគ្នាផលិតខ្សែភាពយន្តឲ្យបានច្រើន ភាគីថៃនឹងប្រឹងប្រែងឲ្យអស់ពីកម្លាំងកាយកម្លាំងចិត្ត ដើម្បីដឹកនាំវិស័យភាពយន្តខ្មែរ ឲ្យឈានដល់ដំណាក់កាលដែលប្រទេសជិតខាងទទួលស្គាល់ថា ខ្មែរពិតជាអាចធ្វើបាន មានគំនិតក្នុងការបង្កើតនូវខ្សែភាពយន្តដែលមានគុណភាពខ្ពស់ អាចឈានជើងចូលទៅកាន់ទីផ្សារភាពយន្តបរទេសបាន ដោយភាពជឿជាក់។

ជាស្នាដៃលើវិស័យភាពយន្តផលិតកម្ម Rich Kids Media កន្លងមកទើបតែផលិតបានភាពយន្តតែ២រឿងប៉ុណ្ណោះទី១ "រឿង៧ថ្ងៃ" ទី២"រឿង ក្រមុំ៣១ កំលោះ៥២"។ ទោះបីជាបទពិសោធន៍ហាក់ដូចជានៅ តិចតួចក្ដី លោក នៅ រតនា ចាងហ្វាងផលិតកម្ម មានជំនឿជាក់ថា កិច្ចព្រមព្រៀងនៃជំនួញដែលមានទុនជាច្រើននោះ ច្បាស់ជាជោគជ័យជាក់ជាមិនខាន ត្បិតអីផលិតកម្មមកពីប្រទេសថៃ មានបទពិសោធន៍ខ្លាំងណាស់លើទីផ្សារភាពយន្តនេះ៕

អត្ថបទៈ ស៊ុនហួត