បើសុបិនឃើញ៧យ៉ាងនេះ អាចដឹងថាកូនកើតមក ស ខ្មៅ រឹង ឬជ្រាយ
- 2018-04-29 03:20:16
- ចំនួនមតិ 0 | ចំនួនចែករំលែក 0
បើសុបិនឃើញ៧យ៉ាងនេះ អាចដឹងថាកូនកើតមក ស ខ្មៅ រឹង ឬជ្រាយ
ចន្លោះមិនឃើញ
តាមការកត់សម្គាល់របស់ដូនតាខ្មែរតាំងពីបុរាណ រហូតមកដល់បច្ចុប្បន្នមុនពេលមានផ្ទៃពោះ ឬកំឡុងពេលពពោះ ស្ត្រីជាម្ដាយតែងយល់សប្ដិឃើញរឿងនេះ រឿងនោះ។ តាមការឱ្យដឹងពី លោកយាយ វ៉ែន ម៉ាល័យ ដែលជាឆ្មបបុរាណ ក្នុងភូមិក្រាំងម្កាក់ ឃុំតាំងក្រូច ស្រុកសំរោងទង ខេត្តកំពង់ស្ពឺ បើស្រ្តីជាម្ដាយយល់សប្ដិឃើញរឿងទាំងនេះ មុនពេលមានផ្ទៃពោះ១ខែ ឬកំឡុងពេលពពោះបាន១ខែ នោះបញ្ជាក់ថានឹងមានកូន ហើយមានចរិតលក្ខណៈទៅតាមការយល់សប្ដិនោះ។
**១. យល់សប្ដិឃើញផ្ទះ**
តាមការកត់សម្គាល់របស់ដូនតាខ្មែរ លោកយាយ វ៉ែន ម៉ាល័យ ជាឆ្មបបុរាណតាំងពីជំនាន់សង្គមមកប្រាប់ថា បើស្ត្រីជាម្ដាយ យល់សប្ដិ ឃើញផ្ទះមុនពេលមានកូន ឬពេលមានកូនបាន ១ខែ បញ្ជាក់ថាកូនក្នុងផ្ទៃជាកូនប្រុសដ៏រឹងមាំម្នាក់។ លោកយាយប្រាប់ថា បើផ្ទះនោះសម្បុររាងចាស់បន្តិច បញ្ជាក់ថា កូនប្រុសនោះនឹងមានសម្បុរខ្មៅស្រអែម។
២. យល់សប្ដិឃើញក្រវិលពីរ
ស្ត្រីដែលទើបនឹងរៀបការរួច មិនទាន់មានកូន ស្រាប់តែយល់សប្ដិឃើញក្រវិលពីរ នោះបញ្ជាក់ថា អាចមានកូនភ្លោះទៀតផង។ លោកយាយ វ៉ែន ម៉ាល័យប្រាប់ទៀតថា ប្រសិនបើក្រវិលនោះជាក្រវិលផ្លាកទីន កូនភ្លោះនោះគឺជាកូនស្រី។
៣. យល់សប្ដិឃើញខ្សែកមួយរង្វង់
លោកយាយជាឆ្មបបុរាណខ្មែររូបនេះ ប្រាប់ថា បើយល់សប្ដិឃើញគេឱ្យខ្សែកមួយរង្វង់ ហើយខ្ចប់ក្រដាសស គឺជាយល់សប្ដិល្អបំផុត។ លោកយាយនិយាយថា បើស្ត្រីកំពុងមានផ្ទៃពោះកន្លះខែ ឬ មុនពេលមានផ្ទៃពោះកន្លះខែ នោះបញ្ជាក់ថា នឹងមានកូនប្រុសគួរឱ្យស្រឡាញ់ម្នាក់ សម្បុរស មកចាប់កំណើតជាមួយស្ត្រីនោះហើយ។
៤. យល់សប្ដិឃើញរំយោលផ្កា
បើយល់សប្ដិឃើញ រំយោលផ្កា ពេលកំពុងពពោះនោះបញ្ជាក់ថា ស្រ្តីជាម្ដាយនឹងមានកូនស្រីម្នាក់គួរឱ្យស្រឡាញ់ ប៉ុន្តែកូននោះអាចមានចរិតចចេសបន្តិច ប៉ុន្តែច្បាស់លាស់ រហ័សរហួនណាស់។
៥. យល់សប្ដិឃើញចិញ្ចៀនសម្បុររាងចាស់
លោកយាយ វ៉ែន ម៉ាល័យ ប្រាប់ទៀតថា បើយល់សប្ដិឃើញចិញ្ចៀនមួយវង់ ប៉ុន្តែចិញ្ចៀននោះរាងចាស់បន្តិច នោះស្ត្រីជាម្ដាយកំពុងពពោះកូនស្រីម្នាក់ក្នុងផ្ទៃ ហើយកូននោះសម្បុររាងខ្មៅស្រអែម។
៦. យល់សប្ដិឃើញនាឡិកា
បើយល់សប្ដិឃើញ នាឡិកា នោះបញ្ជាក់ថានឹងមានកូនប្រុសម្នាក់ ដែលមានអត្តចរិតសុភាពរាបសា មានទំនោរជាអ្នកតែងនិពន្ធ ច្បាស់លាស់ ហ្មត់ចត់ ដឹងគុណចំពោះឪពុកម្ដាយ។ នេះបើតាមការប្រាប់របស់លោកយាយ វ៉ែន ម៉ាល័យ។
៧. យល់សប្ដិឃើញគេឱ្យក្មេង
ក្នុងសុបិនមួយបើស្ត្រីជាម្ដាយ យល់សប្ដិឃើញមានគេឱ្យក្មេង ហើយអ្នកឱ្យនោះនិយាយថា ក្មេងនេះជាកូនល្អ កូនរបស់ទេវតា នោះជាយល់សប្ដិល្អបំផុត។ លោកយាយ វ៉ែន ម៉ាល័យ ប្រាប់ថា ក្មេងដែលកំពុងពពោះក្នុងផ្ទៃជាកូនល្អណាស់ ពេលកើតមកនឹងធ្វើឱ្យគ្រួសារចម្រុងចម្រើន៕