ស្ទើរមិនជឿ! បុរសម្នាក់គ្រាន់តែប្រើឧបករណ៍ងាយៗអាចផ្លុំហៅខ្លែងស្រាកបាន
- 2018-04-30 03:34:03
- ចំនួនមតិ 0 | ចំនួនចែករំលែក 0
ស្ទើរមិនជឿ! បុរសម្នាក់គ្រាន់តែប្រើឧបករណ៍ងាយៗអាចផ្លុំហៅខ្លែងស្រាកបាន
ចន្លោះមិនឃើញ
បុរសម្នាក់រស់នៅខេត្តតាកែវមានសមត្ថភាពពិសេសអាចហៅសត្វខ្លែងស្រាកឲ្យហោះមកជិតៗទីតាំងខ្លួនបាន ដោយគ្រាន់តែប្រើប្លាស្ទិកកញ្ចប់បារីដើម្បីផ្លុំ។
លោក ជ្រាន ជ្រោយ រស់នៅឃុំស្រងែ ស្រុកទ្រាំង ខេត្តតាកែវ ឲ្យដឹងថាលោកចេះផ្លុំហៅខ្លែងស្រាកនេះ ពីអ្នកខេត្តបាត់ដំបងម្នាក់ ពេលដែលលោកទៅលេងនៅទីនោះ។ លោកពន្យល់ពីរបៀបផ្លុំយ៉ាងនេះថា៖ «យកប្លាស្ទិចកញ្ចប់បារី មកផ្លុំធ្វើជាសំឡេងដូចសំឡេងខ្លែងស្រាក វាហោះមកជិត ជួនកាលអាចចាប់បានទៀត»។
កាលពីថ្ងៃសៅរ៍ ម៉ោងប្រហែល៨យប់ កន្លងទៅនេះ អ្នកសារព័ត៌មានSabay និងអ្នកភូមិពីរនាក់ផ្សេងទៀតបានទៅ ទីវាលមួយក្នុងឃុំស្រងែ ជាមួយនឹងលោក ជ្រាន ជ្រោយ ដើម្បីដឹងឲ្យកាន់តែច្បាស់ពីសមត្ថភាពពិតរបស់លោក។
លោក ជ្រាន ជ្រោយ បានយកប្លាស្ទិកកញ្ចប់បារី មកផ្លុំជាសំឡេង ទាំងអ្នកផ្លុំ និងអ្នកទៅចាំមើលបានលាក់ខ្លួននៅព្រៃក្បែរនោះ ដោយថាបើសត្វខ្លែងស្រាកឃើញមនុស្សពូកវានឹងមិនមកនោះទេ។
បើតាមការសង្កេតរបស់អ្នកសារព័ត៌មាន Sabay ប្រហែលជាប្រាំនាទីក្រោយការផ្លុំ ខ្លែងស្រាកមិនតិចជាង១០ក្បាលបានហោះឆ្វែលនៅម្តុំទីតាំងសំឡេង រហូតទាល់តែលោក ជ្រាន ជ្រោយ ឈប់ផ្លុំ។ ខ្លែងស្រាកទាំងនេះហោះឆ្វែល និងទទះស្លាបក្បែរៗដើមឈើជិតសំឡេងដែលកំពុងផ្លុំ។
លោក ជ្រាន ជ្រោយ បញ្ជាក់យ៉ាងដូចនេះថា៖ « យើងត្រូវចេះធ្វើសំឡេងឲ្យដូចសត្វខ្លែងស្រាក...វាមិនលំបាកទេគឺគ្រាន់តែយកប្លាស្ទិកកញ្ចប់បារីមកផ្លុំទៅវាចេញជាសំឡេងដូចខ្លែងស្រាកយំហៅគ្នីគ្នាតែម្តង...បើយើងផ្លុំកាន់តែយូរវានាំគ្នាហើរមកកាន់តែច្រើនឡើងៗ»។
ការផ្លុំហៅខ្លែងស្រាកនេះមិនអាចធ្វើក្នុងភូមិដែលមានមនុស្សរស់នៅបានទេ ដោយលោកថាប្រជាពលរដ្ឋមួយចំនួនមានជំនឿថាខ្លែងស្រាកជាសត្វមិនល្អ ហើយសំឡេងវាទៀតសោតក៏ធ្វើឲ្យអ្នកភូមិខ្លះខ្លាចផងដែរ។
លោក សម នឿន ដែលបាន ទៅមើលការផ្លុំហៅសត្វខ្លែងស្រាកដែរនោះ មានប្រសាសន៍ថាពេលលោកឃើញខ្លែងស្រាកនេះធ្វើឲ្យលោកព្រឺក្បាលតែម្តង។
លោកបន្ថែមថា៖ « ខ្ញុំដូចជាព្រឺក្បាលណាស់ពេលបានឃើញពួកវាដ៏ច្រើនបែបនេះ សំឡេងរបស់វាធ្វើឲ្យខ្ញុំខ្លាចបន្តិចដែរ»។
សត្វខ្លែងស្រាកចេញរកចំណីពេលយប់ ហើយអ្នកភូមិខ្លះជឿថាសត្វប្រភេទនេះជាសត្វនាំប្រផ្នូលមិនល្អដល់មនុស្ស ដោយថាបើសត្វនេះយំ និងហើរកាត់ភូមិឬផ្ទះអ្នកណាម្នាក់ បានន័យថាក្នុងភូមិ ឬម្ចាស់ផ្ទះអាចមានគ្រោះថ្នាក់ដល់ស្លាប់។
សម្រាប់ជំនឿលើសត្វប្រភេទនេះមិនត្រឹមតែមាននៅកម្ពុជាប៉ុណ្ណោះទេ នៅប្រទេសដទៃក៏មានជំនឿប្រហាក់ប្រហែលគ្នានេះដែរ ដោយបានចាត់ទុកថាសត្វនេះតំណាងឲ្យសេចក្តីស្លាប់។ ទោះយ៉ាងណាសម្រាប់ប្រជាពលរដ្ឋក្រិចបុរាណ បានចាត់ទុកសត្វខ្លែងស្រាកនេះតំណាងឲ្យជ័យជម្នះទៅវិញ ដោយទាហានក្រិកពេលចេញច្បាំង បើបានឃើញសត្វខ្លែងស្រាកហោះពីលើ នោះគឹមានន័យថាជ័យជម្នះក្នុងសង្គ្រាមនឹងចូលមកដល់។ នេះបើតាមការចុះផ្សាយរបស់គេហទំព័រ Mentalfloss។
បើតាមប្រភពដដែលនៅប្រទេសជប៉ុនមានចិញ្ចឹមសត្វប្រភេទនេះ និងថែមទាំងដាក់ឈ្មោះហាងតាមឈ្មោះសត្វនេះផងដែរ៕