ម្ចាស់រថយន្ត Tesla ជាប់ពិន័យ ១៨ ខែ ដោយសារចង់តេស្តមុខងារបើកស្វ័យប្រវត្តិ (វីដេអូ)

2018-04-30 04:45:13
ចំនួនមតិ 0 | ចំនួនចែករំលែក 0

ចន្លោះមិនឃើញ

បុរសម្នាក់ឈ្មោះ Bhaves Patel ដែលជាម្ចាស់រថយន្ត Tesla រស់នៅទីក្រុង Nottingham ចក្រភពអង់គ្លេស ត្រូវបានជាប់បម្រាមមិនឲ្យបើកបរដល់ទៅ ១៨ ខែ ពីព្រោះលោកត្រូវបានប៉ូលិសចាប់បានក្រោយឃើញលោកអង្គុយនៅកៅអីអ្នកជិះ ដោយគ្មានមនុស្សក្នុងកៅអីអ្នកបើកបរឡើយ។

ហេតុការណ៍នេះបានកើតឡើងនៅក្នុងខែ ឧសភា ឆ្នាំ ២០១៧ ពេលដែលម្ចាស់រថយន្តបានសាកល្បងមុខងារបើកបរដោយស្វ័យប្រវត្តិរបស់ Tesla (Autopilot) ដោយខ្លួនបានរើទៅអង្គុយនៅកៅអីអ្នកដំណើរជំនួសវិញ ក្នុងល្បឿនប្រហែល ៦៥គ.ម/ម៉ ព្រោះចង់ដឹងថាមុខងារបើកបរដោយស្វ័យប្រវត្តិនេះធ្វើបានល្អកម្រិតណា។

ការពិសោធន៍របស់អ្នកបើកបររូបនេះ មិនបានបង្កគ្រោះថ្នាក់ដល់នរណាឡើយ ប៉ុន្តែត្រូវបានចោទប្រកាន់ដោយប៉ូលិសថាជា "ការបើកបរដោយគ្មានទំនួលខុសត្រូវ" និងអាចបង្កគ្រោះថ្នាក់ដល់អាយុជីវិតខ្លួន និងអ្នកដទៃបាន។ បន្ថែមពីលើបម្រាមហាមមិនឲ្យបើករថយន្តរថយន្តរយៈពេល ១៨ ខែនេះហើយ អ្នកបើកបររូបនេះក៏ត្រូវបង់ប្រាក់ ១ ៨០០ផោន (ប្រហែល ២ ៤៨០ ដុល្លារ), ត្រូវចូលរួមការព្យាបាលរយៈពេល ១០ថ្ងៃ និងត្រូវធ្វើការងារសង្គមចំនួន ១០០ម៉ោងផងដែរ។

សូមបញ្ជាក់ផងដែរថា មុខងារបើកបរដោយស្វ័យប្រវត្តិរបស់ Tesla (Autopilot) អាចឲ្យរថយន្តរបស់អ្នកស្ថិតក្នុងគន្លងបើកបរ និងរក្សាល្បឿនរថយន្តឲ្យនៅតាមរថយន្តខាងមុខ តែមិនអាចបើកវ៉ាដោយខ្លួនឯងបានទេ។ ម៉្យាងទៀត បើអ្នកបើកបរមិនអើពើនឹងសារព្រមានពេល Autopilot បើកបរដោយខ្លួនឯងរយៈពេលត្រឹម ១នាទីនោះ រថយន្តនឹងបិទមុខងារនេះចោល ហើយឈប់ភ្លាមៗនៅនឹងកន្លែងតែម្ដង៕

នេះជាវីដេអូបង្ហាញពីកៅអីបើកបរ ដែលគ្មានមនុស្សអង្គុយក្នុងរថយន្ត Tesla នោះ៖

Man pleads guilty to dangerous driving after switching on his car's autopilot and moving over to the passenger seat while travelling along the M1 near #HemelHempstead: https://t.co/GrKppSLVZT pic.twitter.com/JPYgk9eyDM
— Herts Police (@HertsPolice) April 27, 2018

ចុចអាន៖

ប្រភព៖ engadget ប្រែសម្រួល៖ ផាត សុវត្ថិ