ច្បាស់! លែងយល់ច្រលំ ក្រោយដឹងរឿងពិតនៃកុមារអូទីស្សឹម និងដំណោះស្រាយ (មានវីដេអូ)
- 2018-04-30 08:41:14
- ចំនួនមតិ 0 | ចំនួនចែករំលែក 0
ច្បាស់! លែងយល់ច្រលំ ក្រោយដឹងរឿងពិតនៃកុមារអូទីស្សឹម និងដំណោះស្រាយ (មានវីដេអូ)
ចន្លោះមិនឃើញ
អូទីស្សឹម ជាភាសាអង់គ្លេស (Autism) ជាជំងឺចាស់១ មានវត្តមានដំបូងនៅក្នុងពិភពលោកតាំងពីឆ្នាំ ១៩៤៣។ អូទីស្សឹម ឬហៅថាបញ្ហាមិនគ្រប់លក្ខណៈ ក៏បានចាប់ផ្ដើមកើតមានជាបន្តបន្ទាប់លើកុមារកម្ពុជាផងដែរ។ បច្ចុប្បន្ន អាណាព្យាបាលមានការបារម្ភ និងខ្លះទៀតហាក់យល់ច្រឡំ ព្រោះតែខ្លាចកូនមានជំងឺនេះ បើទោះបីកុមារកើតមកមានកាយសម្បទាគ្រប់គ្រាន់ក៏ដោយ។ តាមអ្នកជំនាញសុខភាព បានប្រាប់ថា៖ គ្រួសារនៃសមាជិកដែលមានជំងឺអូទីស្សឹម គឺមានការលំបាក និងបន្ទុកធ្ងន់មួយ។
មូលហេតុពិត
លោក ហឿ សេថុល អ្នកចិត្តសាស្ត្រ ជំនាញខាងពិគ្រោះយោបល់ផ្លូវចិត្ត នៃអង្គការអន្តរជាតិ១ ដែលបានបញ្ចប់ការសិក្សាថ្នាក់បរិញ្ញាបត្រជាន់ខ្ពស់ ពីសកលវិទ្យាល័យ De La Salle ប្រទេសហ្វីលីពីន បានពន្យល់ថា៖ «អូទីស្សឹម មិនមែនជាជំងឺខួរក្បាលវិកលចរិតទេ គឺគ្រាន់តែជាការបាត់បង់ចំណុចខ្លះនៃខួរក្បាល។
លោក ហឿ សេថុល អ្នកចិត្តសាស្ត្រ ជំនាញខាងពិគ្រោះយោបល់ផ្លូវចិត្ត
ដូច្នេះហើយ ការអភិវឌ្ឍខួរក្បាលយឺតជាងកុមារធម្មតា តាំងពីកំណើត មិនមែនកើតដោយសារការមើលទូរស័ព្ទ។
អូទីស្សឹម មានសញ្ញាឱ្យដឹង នៅក្នុងដំណាក់កាលលូតលាស់ដំបូងរបស់កុមារ គឺនៅមុនអាយុ ៣ឆ្នាំ»។
វេជ្ជបណ្ឌិត ប៊ូមី កុមារ ប្រធានកម្មវិធីនៃមជ្ឈមណ្ឌលសុខភាពផ្លូវចិត្តកុមារ និងយុវវ័យរបស់អង្គការការីតាស ធ្លាប់បានលើកទ្បើងថា ៖ «កុមារអូទីស្សឹម មានបញ្ហានៅក្នុងខួរក្បាលផ្នែកប្រព័ន្ធមួយ ទាក់ទងនឹងការកត់សម្គាល់អារម្មណ៍ ឬក៏មើលមុខអ្នកដែលនៅជុំវិញគេ។ កុមារអូទីស្សឹម គឺអត់ចូលចិត្តមើលមុខអ្នកផ្សេងនៅជុំវិញគេទេ ហើយពួកគេរៀនសូត្របាន និងស្វែងយល់តាមរយៈរូបភាព ជាងប្រើពាក្យសម្ដី»។
កន្លងទៅការសិក្សាស្រាវជ្រាវមួយមានមូលដ្ឋាននៅសហរដ្ឋអាមេរិក បានរកឃើញថា៖ អត្រាកុមារអូទីស្សឹម មានប្រមាណ ៥០នាក់ ដែលពីមុនមានរហូតដល់ប្រមាណ ៣០០នាក់ ហើយមានម្នាក់ដែលកើតជំងឺនេះ។ ប៉ុន្តែប្រទេសកម្ពុជា វិញ មិនទាន់មានតួលេខច្បាស់នៅទ្បើយទេ គឺមានតែកុមារដែលមកទទួលសេវាប្រឹក្សា និងព្យាបាលផ្លូវចិត្តច្រើន។
ការយល់ច្រឡំ និងដំណោះស្រាយ
ដោយហេតុនេះ បើតាមលោក ហឿ សេថុល អ្នកចិត្តសាស្ត្រខាងលើ បានឲ្យដឹងបន្តថា៖ ដោយសារបារម្ភពេក ឪពុកម្ដាយខ្លះ ពិសេសស្ត្រីកំពុងមានផ្ទៃពោះ ទៅធ្វើរឿង១ចំនួន ដែលអាចខាតបង់ថវិកា និងមិន ត្រឹមត្រូវ តាម បែបវេជ្ជសាស្ត្រ។ ដូចជា៖ ទៅថតអេកូសាស្ត្រ ដើម្បីរកជំងឺអូទីស្សឹម។ មែនទែនទៅ ប្រសិនបើអាណាព្យាបាលចង់ ដឹងច្បាស់ថាកូនខ្លួនមានជំងឺនេះ ឬអត់ បើមានរោគសញ្ញាដូចបានរៀបរាប់ខាងលើ សូមទៅជួបពេទ្យជំនាញនៅតាម សេវា សាធារណ និងសេវាឯកជន ដើម្បីប្រឹក្សា និងទទួលការព្យាបាលទាន់ពេល។ លោកបញ្ជាក់ថា៖ ចៀសវាងធ្វើការសន្និដ្ឋានផ្ដេសផ្ដាស នាំឲ្យ មានបញ្ហាដល់កុមារ ព្រោះរោគសញ្ញានៃជំងឺនេះ មានពីស្រាល និងបន្ទាប់មកវិវត្តទៅធ្ងន់ធ្ងរ។