Ming-Chi Kuo ប្រកាសរកទ្រនំការងារថ្មី ហើយក៏ឈប់ទស្សន៍ទាយផលិតផល Apple ទៀតដែរ
- 2018-05-02 02:03:09
- ចំនួនមតិ 0 | ចំនួនចែករំលែក 0
Ming-Chi Kuo ប្រកាសរកទ្រនំការងារថ្មី ហើយក៏ឈប់ទស្សន៍ទាយផលិតផល Apple ទៀតដែរ
ចន្លោះមិនឃើញ
នឹកដល់ឈ្មោះលោក Ming-Chi Kuo ប្រាកដជាមានមនុស្សជាច្រើនធ្លាប់បានស្គាល់ តាមរយៈចចាមអារ៉ាមនៃការទស្សន៍ទាយទៅលើផលិតផល Apple។ អតីតបុគ្គលិកបម្រើការឲ្យក្រុមហ៊ុន KGI Securities នៅប្រទេសកូរ៉េ បុរសលាក់មុខរូបនេះបានប្រកាសដើរចេញទៅស្វែងរកទ្រនំថ្មីជាសាធារណៈ កាលពីថ្ងៃសុក្រកន្លងទៅ។ នេះបើផ្អែកតាមរបាយការណ៍នៃប្រទេសចិនបានចុះផ្សាយ។
ការលាឈប់របស់លោក ក៏នឹងប៉ះពាល់ដល់អ្នកគាំទ្រជាច្រើន ដែលរមែងចង់ដឹងចង់ឮពីចចាមអារ៉ាមនៃផលិតផលថ្មីរបស់ក្រុមហ៊ុនយក្សអាមេរិក ព្រោះលោក Kuo ក៏នឹងឈប់ប្រលូកក្នុងការវិភាគផលិតផលរបស់ក្រុមហ៊ុននេះទៀតដែរ ។
ឆ្នាំទៅលោក Kuo ធ្លាប់បានបញ្ជាក់ជាសាធារណៈកាលពីខែកុម្ភៈ មុន ៧ ខែនៃការបង្ហាញស្មាតហ្វូនប្រចាំឆ្នាំ ២០១៧ របស់ Apple ថា iPhone X ដែលលោកធ្លាប់ហៅជា iPhone 8 នឹងវិវត្តផ្នែកកាមេរ៉ាមុខ ពោលគឺបច្ចេកវិទ្យា TrueDepth Camera នឹងជំនួសដោយមុខងារស្កេនផ្ទៃមុខ លុបបំបាត់ទ្រនាប់ស្កេនខ្ចៅដៃ។ លុះចូលដល់ខែកញ្ញា លទ្ធផលទស្សន៍ទាយបានប្រែក្លាយជាការពិតទាំងស្រុង ដោយខុសត្រឹមឈ្មោះនៃម៉ូឌែល iPhone។
សម្រាប់ឆ្នាំនេះបុរសអាថ៌កំបាំងរូបនេះ ក៏ធ្លាប់បានទម្លាយថាក្រុមហ៊ុនលោក Tim Cook នឹងដាក់បង្ហាញនូវ iPhone Xs មានប្រើអេក្រង់ ៥,៨ អ៊ីញ OLED ជាមួយ iPhone Xs Plus ប្រើដល់ទំហំ ៦,៤ អ៊ីញ និង iPhone 9 ប្រើអេក្រង់ LCD ធម្មតាទំហំ ៦,១ អ៊ីញ។ ម៉ូឌែលនេះនឹងមានត្រឹមកាមេរ៉ាមួយគ្រាប់នៅខាងក្រោយ ប៉ុន្តែត្រូវដកចោលបច្ចេកវិទ្យា 3D Touch។
សរុបមកវិញបើការចុះផ្សាយរបស់សារព័ត៌មានចិនក្លាយជាការពិត ក៏ជាការបាត់បង់ដ៏ធំធេងមួយ សម្រាប់ប្រិយមិត្ត Apple ដែលនិយមតាមដានសឹងរាល់ចចាមអារ៉ាមជាង ១០ ឆ្នាំមកនេះ ដោយភាគរយច្រើនតែងតែឆុតដូចមាត់របស់លោក Kuo អ៊ីចឹង។
ចុច Like និង See First ដើម្បីទទួលព័ត៌មានបច្ចេកវិទ្យាមុនគេ......
អានអត្ថបទ:
បុគ្គលសំខាន់ម្នាក់ សម្រេចចាកចេញពី Facebook ក្រោមហេតុផលមួយ
លេចចេញរូបរាងផ្លូវការ A6 | A6+ ២០១៨ បំពាក់សុទ្ធតែអេក្រង់ Super AMOLED