Apple Love ទទួលបានឱកាសថ្មីមួយទៀត នៅហូលីវូដ

2018-05-02 10:55:10
ចំនួនមតិ 0 | ចំនួនចែករំលែក 0

ចន្លោះមិនឃើញ

កញ្ញា ឌូ ពុធម៉ូលីតា ដែលមានឈ្មោះក្រៅ Apple Love បន្ទាប់ពីទទួលបានអាហារូបករណ៍ទៅរៀនខាងផ្នែកផាត់មុខក្នុងវិស័យភាពយន្តនៅហូលីវូដកាលពីឆ្នាំ ២០១៧ ពេលនេះទទួលបានឱកាសថ្មីមួយទៀតពីសិល្បករឯកទេសខាងផ្នែកផាត់មុខឱ្យតារាសំខាន់ៗក្នុងរឿងហូលីវូដដ៏ល្បីម្នាក់។

កាលដើមឡើយ កញ្ញា Apple Love ជាសិល្បករផាត់មុខដែលរៀនសូត្រជំនាញដោយខ្លួនឯងតាម Youtube និងអនុវត្តន៍ការងារផាត់មុខក្នុងភាពយន្តជាច្រើននៅប្រទេសកម្ពុជា ហើយដោយការស្រលាញ់ និងទេពកោសល្យ កញ្ញា ក៏ទទួលបានការងារជាបន្តបន្ទាប់។ ពិសេសស្នាដៃរបស់កញ្ញា Apple Love ក៏ត្រូវបានផលិតករភាពយន្តបរទេសពេញចិត្តរហូតទទួលបានឱកាសរៀនបន្តខាងផ្នែកបច្ចេកទេសផាត់មុខនេះនៅ សាលា The Academy of Motion Picture Arts and Sciences ។

កាលពីព្រឹកមិញនេះ កញ្ញា បានប្រកាសថាខ្លួនទទួលបានឱកាសចុះអនុវត្តផ្ទាល់ជំនាញផាត់មុខដោយ លោក Leonard Engelman ដែលជាបុគ្គលមានស្នាដៃលើវិស័យភាពយន្តដ៏មានសក្តានុពលសហរដ្ឋអាមេរិក ខាងផ្នែកផាត់មុខតែងតួភាពយន្ត។ កញ្ញា រៀបរាប់ថា ៖ «នាងខ្ញំុទេីបតែបានសាលា ជ្រេីសរេីសឲ្យជាប់ក្នុងការបង្រៀនដេាយផ្ទាល់ពីលេាក Leonard Engelman អ្នកផាត់មុខលំដាប់ខ្ពស់នៅហូលីវូដ ដែលជាអ្នកផាត់មុខក្នុងរឿង វីរបុរសប្រចៀវ (Batman) រឿង រាំបូ (Rocki ) និងរឿងជាច្រេីនទៀត»។

លោក Leonard Engelman គឺជាម្ចាស់ពានរង្វាន់ Emmy Award របស់ហូលីវូដ លើស្នាដៃជំនាញផាត់មុខ និងការតែងតួយ៉ាងមានភាពច្នៃប្រឌិតក្នុងបណ្តាភាពយន្តកំពូលរបស់ហូលីវូដ។ ការទទួលបានការចាប់អារម្មណ៍ពី Leonard Engelman ជាសញ្ញាបញ្ជាក់ថាសិល្បករ Apple Love ពិតជាមានលទ្ធភាព និងទេពកោសល្យ ព្រោះតែនេះជាការជ្រើសពីសាខាសាលាសិល្បៈ The Academy of Motion Picture Arts and Sciences ដោយផ្ទាល់។ នេះជាសេចក្តីរីករាយសម្រាប់សិល្បកររូបនេះដែលទទួលបានឱកាសដ៏កម្រមួយ ដែលនាងនឹងទទួលបានការបណ្តុះបណ្តាល និងបទបង្ហាញពីការងារផាត់មុខតួភាពយន្តរយៈពេលមួយអាទិត្យនេះពេញ៕