ត្រៀមៗ! ម្ចាស់ជយលាភីលេខ ១ រឿងខ្លី នឹងបង្ហាញស្នាដៃវីដេអូចម្រៀងថ្មីមួយ
- 2018-05-04 01:54:51
- ចំនួនមតិ 0 | ចំនួនចែករំលែក 0
ត្រៀមៗ! ម្ចាស់ជយលាភីលេខ ១ រឿងខ្លី នឹងបង្ហាញស្នាដៃវីដេអូចម្រៀងថ្មីមួយ
ចន្លោះមិនឃើញ
អ្នកដឹកនាំរឿង វ័យក្មេង នេត ឥន្ទនរាសុទ្ធីដេ្ឋព និងក្រុមការងារដែលធ្លាប់ផលិតរឿងខ្លី «The Dinner» ទទួលបានឱកាសថ្មីដឹកនាំវីដេអូ ចម្រៀងក្នុងរឿងខ្នាតធំមួយផលិតដោយ Studio 4 រឿង «បាតដៃខ្មៅ»។
វីដេអូបទចម្រៀងថ្មីនេះ នឹងចេញផ្សាយជាផ្លូវការក្នុងខែ ឧសភា ឆ្នាំ ២០១៨ នេះហើយ ពិសេសបទចម្រៀងនេះនឹងមានក្នុងខ្សែភាពយន្តខ្នាតធំ ដែលសម្តែងដោយតារាចម្រៀងវ័យក្មេង ឯករាជ្យ ដូចជា Sai និង ខាំ ជេន កញ្ញា ចែ ឡេង និងតួសម្តែងក្នុងរឿង «បាតដៃខ្មៅ»។
វីដេអូបទចម្រៀងនេះ បានធ្វើការយករូបភាពទីតាំងថ្មីមួយដែលមិនធ្លាប់បង្ហាញរូបរាងពីមុនក្នុងវីដេអូបទចម្រៀងផ្សេងៗឡើយ។ វាជាសំណង់រោងចក្រមួយពីមុន និងមានការរៀបចំកែច្នៃប្លែកជាច្រើន ដែលមានឈ្មោះថា The Factory។ អ្នកដឹកនាំរឿង វ័យក្មេងរូបនេះ បានប្រាប់ថា ទីតាំងនេះ មានរូបភាពសិល្បៈ ពន្លឺ និងបរិវេនធំទូលាយ ដែលអំនោយផលដល់ការថតបទចម្រៀង រឿង «បាតដៃខ្មៅ» ជាពិសេស គឺត្រូវនឹង អារម្មណ៍នៃបទចម្រៀងតែម្តង។
តាមរយៈការបង្ហើបឱ្យដឹងខ្លះពីអ្នកដឹកនាំរឿង នេត ឥន្ទនរាសុទ្ធីដេ្ឋព ឱ្យដឹងថា បទចម្រៀងនេះ ជាការបង្ហាញពីមិត្តភាព និងការដែលក្រុម «បាតដៃខ្មៅ» ត្រូវបានបង្កើតឡើង។ លើសពីនេះ បទចម្រៀងនេះ ក៏ជាស្នាដៃនិពន្ធពី អ្នកសរសេររឿង និងផលិតករផលិតបទចម្រៀងដ៏មានប្រជាប្រិយមួយរូប ដែល Sabay នឹងមកបង្ហាញក្នុងអត្ថបទបន្ត៕