ស្ងាត់ៗ! ចិន លួចដំឡើងប្រព័ន្ធមីស៊ីល ក្នុងតំបន់ជម្លោះសមុទ្រចិនខាងត្បូង

2018-05-04 02:46:53
ចំនួនមតិ 0 | ចំនួនចែករំលែក 0

ចន្លោះមិនឃើញ

យោងតាមទីភ្នាក់ងារសារព័ត៌មាន CNBC បានរាយការណ៍កាលពីថ្ងៃទី០២ ឧសភា ឆ្នាំ២០១៨ ថា មហាយក្សចិន បានធ្វើការដំឡើងប្រព័ន្ធមីស៊ីលប្រឆាំងនាវា និងប្រព័ន្ធមីស៊ីលការពារអាកាស ត្រង់ទីតាំងជម្លោះក្នុងតំបន់សមុទ្រចិនខាងត្បូង ដែលត្រូវបានទាមទារដោយវៀតណាម និងហ្វីលីពីនអស់រយៈពេលជាង៣០ឆ្នាំមកហើយ។

រូបភាពផ្តល់ឲ្យដោយផ្កាយរណបដែលបង្ហាញពី ទំនើបកម្មយោធាលើថ្មប៉ប្រះទឹក Fiery Cross កាលពីថ្ងៃ០១ មករាឆ្នាំ ២០១៨

ប្រព័ន្ធមីស៊ីលថ្មីនេះ ត្រូវបានរាយការណ៍ថា ត្រូវបានដំឡើងនៅលើតំបន់ថ្មប៉ប្រះទឹកចំនួន ៣ ក្នុងនោះរួមមាន Fiery Cross, Subi និង Mischief ។ ការដំឡើងប្រព័ន្ធខែលការពារមីស៊ីលទាំងអស់ បានធ្វើឡើងក្នុងប្រជុំកោះប៉ារ៉ាសែល ដែលស្ថិតក្នុងដែនទឹកភាគខាងត្បូងប្រទេសចិន ចន្លោះប្រទេសវៀតណាម និងហ្វីលីពីន។

ឆ្លើយតបនឹងរឿងនេះ អ្នកនាំពាក្យក្រសួងការបរទេសចិន លោកស្រី Hua Chunying បានថ្លែង កាលពីថ្ងៃទី ០៣ ឧសភាម្សិលមិញថា៖ "ការសាងសង់ក្នុងន័យសន្តិភាពក្នុងប្រជុំកោះប៉ារ៉ាសែល រួមមានជាអាទិ៍ការដំឡើងឧបករណ៍ការពារជាតិ គឺក្នុងគោលបំណងដើម្បីការពារដែនអធិបតេយ្យភាព និងសន្តិសុខរបស់ចិនតែប៉ុណ្ណោះ។" លោកស្រីបានបន្ថែមថា "សម្រាប់ប្រទេសដែលមិនមានបំណងក្នុងការល្មើសនឹងដែនអធិបតេយ្យភាពរបស់ចិនទេ គឺគ្មានហេតុផលអ្វីនឹងត្រូវព្រួយបារម្ភនោះឡើយ។"

លោកស្រី Hua Chunying ថ្លែងនាពេលកន្លងមក

ពាក់ព័ន្ធនឹងការធ្វើទំនើបកម្មយោធារបស់ចិនថ្មីនេះ រដ្ឋបាលក្រុងវ៉ាស៊ីនតោន ដែលមិនមានចំណែកអ្វីបន្តិចសោះក្នុងជម្លោះនេះ ក៏បានលើកឡើងពីកង្វល់ជុំវិញបញ្ហានេះផងដែរ ព្រមទាំងបានធ្វើការព្រមានថា ចិនអាចនឹងប្រឈមមុខចំពោះផលវិបាក ដែលអាចកើតឡើងក្នុងរយៈពេលខ្លី និងយូរទៀតផង។ នេះបើតាមការបញ្ជាក់របស់អគ្គលេខាធិការសារព័ត៌មានប្រចាំសេតវិមានអាមេរិក លោកស្រី Sarah Sanders កាលពីថ្ងៃព្រហស្បតិ៍ម្សិលមិញនេះ៕