ករណីសេពគ្រឿងស្រវឹង ក្រសួងព័ត៌មាន ផ្ញើសារទៅផលិតកម្ម និងភាគីពាក់ព័ន្ធទាំងអស់

2018-05-07 13:57:09
ចំនួនមតិ 0 | ចំនួនចែករំលែក 0

ចន្លោះមិនឃើញ

នៅរសៀលថ្ងៃទី ៧ ឧសភា ឆ្នាំ ២០១៨ ក្រសួងព័ត៌មាន បានសម្រេចចេញជូនដំណឹងមួយទៅអ្នកពាក់ព័ន្ធទាំងអស់មាន ផលិតកម្ម អ្នកនិពន្ធ ស្ថានីយវិទ្យុ ទូរទស្សន៍ ជាដើម សូមប្រុងប្រយ័ត្នចំពោះការផលិត និងចាក់ផ្សាយស្នាដៃដែលមានពាក់ព័ន្ធនឹងការសេពគ្រឿងស្រវឹង។

ការជូនដំណឹងខាងលើ ក្រោយពីក្រសួងបានសង្កេតឃើញថា កន្លងមក មានរូបភាពសេពគ្រឿងស្រវឹងដើម្បីដោះស្រាយវិបត្តិ នៅក្នុងស្នាដៃភាពយន្ត ខារ៉ាអូខេ ហើយចាក់ផ្សាយដោយស្ថានីយទូរទស្សន៍ក្នុងស្រុកនានា។ ក្នុងន័យនេះ ក្រសួងអះអាងថា នោះជាការឆ្លុះបញ្ចាំងដែលមិនជះឥទ្ធិពលវិជ្ជមានដល់សង្គម ពិសេសចំពោះយុវវ័យដោយផ្ទាល់ ដែលបញ្ហានានាកើតចេះពីការសេពគ្រឿងស្រវឹងនោះ មានជាអាទិ អំពើហិង្សា និងការសេពគ្រឿងញៀនជាដើម។

ដូច្នេះ នៅក្នុងសេចក្ដីជូនដំណឹងចុះហត្ថលេខាដោយឯកឧត្ដម ខៀវ កាញារីទ្ធ ជារដ្ឋមន្ត្រី ក្រសួង សូមធ្វើការណែនាំអ្នកពាក់ព័ន្ធទាំងអស់ ឲ្យបញ្ចូលរូបភាពដោះស្រាយវិបត្តិនៅក្នុងភាពយន្ត វីដេអូចម្រៀងនានា ដោយបង្ហាញរូបភាពអំពីការអប់រំផ្លូវចិត្ត ឬតាំងសមាធិ ជាជំនួសឲ្យរូបភាពពីការយកគ្រឿងស្រវឹង ធ្វើជាមធ្យោបាយដូចកន្លងមកនោះវិញ៕