គ្រូបង្រៀនអង់គ្លេស Owolabi ថា បាល់ទាត់ខ្មែរនឹងខ្លាំងរយៈពេល៥ឆ្នាំខាងមុខ

2018-05-09 07:07:31
ចំនួនមតិ 0 | ចំនួនចែករំលែក 0

ចន្លោះមិនឃើញ

រយៈពេល៥ឆ្នាំខាងមុខ វិស័យកីឡាបាល់ទាត់នៅកម្ពុជានឹងរីកចម្រើន និងខ្លាំងដូចប្រទេសក្នុងតំបន់ដែរ។ នេះជាការលើកឡើងរបស់កីឡាករសញ្ជាតិនីហ្សេរីយ៉ា Owolabi Fisayo Blessing ដែលកំពុងលេងឲ្យក្លឹបមិនអាជីព Khmer United និងជាគ្រូបង្រៀនភាសាអង់គ្លេស។

កីឡាករ និងជាគ្រូបង្រៀន Fisayo

Fisayo បានរៀបរាប់ថា បច្ចុប្បន្ននេះអ្នកពាក់ព័ន្ធនឹងបាល់ទាត់កម្ពុជាកំពុងដុតដៃជើងដើម្បីអភិវឌ្ឍបាល់ទាត់ឲ្យរីកចម្រើន។ សកម្មភាពគួរឲ្យចាប់អារម្មណ៍គឺថា ទីលានបាល់ទាត់ទាំងកម្រិតស្តង់ដារ ទីលានមិនស្តង់ដារ និងទីលានហ្វូតសាលកំពុងរីកចម្រើន។ ជាពិសេសយុវជនកាន់តែចាប់អារម្មណ៍បាល់ទាត់ និងមានយុវជនជាច្រើនបានកំពុងអភិវឌ្ឍខ្លួនក្លាយជាកីឡាករ។

ក្រុម Khmer United

គ្រូបង្រៀនភាសាអង់គ្លេសនេះបាននិយាយថា ៖«ខ្ញុំគិតថា លីគកម្ពុជាល្អ។ ខ្ញុំសង្ឃឹម ថ្ងៃណាមួយខ្ញុំបានលេងឲ្យក្រុមណាមួយនៅលីគដើម្បីអភិវឌ្ឍខ្លួនកាន់តែល្អ។ លីគកម្ពុជាកំពុងអភិវឌ្ឍយ៉ាងល្អ យើងឃើញហើយកីឡាករកម្ពុជាចេញទៅលេងក្រៅប្រទេស ហើយកីឡាករបរទេសមកលេងនៅកម្ពុជា។ នេះជាសញ្ញាដ៏ល្អហើយសម្រាប់រយៈពេល៥ឆ្នាំខាងមុខ បាល់ទាត់កម្ពុជានឹងកាន់តែរីកចម្រើនខ្លាំង»។

កីឡាកររូបនេះនិយាយថា ៖«ក្រៅពីបង្រៀន ខ្ញុំលេងបាល់ទាត់។ ឥឡូវខ្ញុំលេងឲ្យក្រុម Khmer United ក្នុងពាន Khmer Real Estate League និងលេងឲ្យក្រុម ISI Team ក្នុងពាន KMH Champions League។ ខ្ញុំមិនគិតរឿងលុយទេ តែបាល់ទាត់ជាសេចក្តីស្រលាញ់។ ខ្ញុំស្រលាញ់បាល់ទាត់ ទោះក្រុមតូច ឬធំក៏ខ្ញុំលេងដែរ។ បើខ្ញុំមិនលេងពីតូច ខ្ញុំនឹងមិនដល់កម្រិតធំទេ»។

ទស្សនាការលើកឡើងរបស់ Owolabi

Owolabi បានមកកម្ពុជាកាលពីពីរឆ្នាំមុនដើម្បីលេងបាល់ទាត់ ប៉ុន្តែមិនទាន់សម្រេចដូចអ្វីដែលរូបគេចង់បានឡើយ។ យ៉ាងណារូបគេកំពុងស្វែងរកបទពិសោធបន្ថែមទៀតដើម្បីឈានទៅរកក្លឹបណាមួយនៃលីគកំពូលកម្ពុជា។ បច្ចុប្បន្នរូបគេជាបង្រៀនអង់គ្លេសនៅសាលា IIS៕

អត្ថបទ៖ ជាន ចាន់រ៉ា