ក្រសួងណែនាំវិធី១ មើលដឹងឱសថ អាហារបំប៉នសុទ្ធ ឬក្លែងក្លាយ ចៀសវាងបង់ទាំងលុយ និងបាត់ជីវិត

2018-05-10 01:53:01
ចំនួនមតិ 0 | ចំនួនចែករំលែក 0

ចន្លោះមិនឃើញ

ចរាចរឱសថក្លែងក្លាយ កំពុងក្លាយជាបញ្ហាឈឺក្បាលសម្រាប់ពិភពលោក រួមទាំងនៅប្រទេសកម្ពុជា។ ដើម្បីដឹងច្បាស់ពីប្រវត្តិឱសថ ដែលអាចប្រើប្រាស់បាន ស្របច្បាប់ និងត្រឹមត្រូវតាមក្បួនវេជ្ជសាស្ត្រ ឬអត់ ក្រសួងសុខាភិបាល បានណែនាំ ឲ្យដឹងពីរបៀបថ្មី១ គឺរកមើលលើសំបកកញ្ចប់ដែលមានលេខកូដ ក្រុមហ៊ុន និងឈ្មោះប្រទេសជាដើម។

លោក ឃ្លាំង សាម៉េត ឱសថការី និងជាប្រធានការិយាល័យនិយ័តកម្ម នៃក្រសួងសុខាភិបាល បានប្រាប់ Sabay ថា បច្ចុប្បន្នកម្ពុជា មានបញ្ហាឱសថខុសច្បាប់ច្រើន ពិសេសការផ្សព្វផ្សាយ ដោយជនមួយចំនួនតូច បោកប្រាស់ និងចែកចាយ ខុសច្បាប់ ភាគច្រើនគឺមានតាមគេហទំព័រ ឬ Facebook។

លោកបញ្ជាក់ថា ការប្រើឱសថក្លែងក្លាយ មិនត្រឹមតែខាតលុយទេ តែអាចនាំគ្រោះថ្នាក់ដល់ជីវិត ព្រោះឱសថទាំងនោះ លក់ក្នុងតម្លៃថ្លៃ គ្មានចុះបញ្ជិកា និងផលិតខុសបច្ចេកទេស ឬដាក់លាយសារធាតុខុសក្បួនវេជ្ជសាស្ត្រ។ ជាក់ស្ដែង គឺថ្នាំបំប៉នផ្លូវភេទ ដែលក្រសួងបានចេញមុខហាមប្រើ។

លោកបន្តថាចំណាត់ការ ជាដំបូង ក្រសួងធ្វើសេចក្ដីជូនដំណឹងសិន បើនៅតែល្មើសទៀត នោះក្រសួងនឹងសហការជាមួយព្រះរាជអាជ្ញា ដើម្បីចាត់វិធានការតាមច្បាប់ គឺចុះបង្ក្រាប នឹងកសាងសំណុំរឿង បញ្ជូនបន្តទៅតុលាការតែម្ដង។

បន្ថែមពីនេះ ក្រសួងសុខាភិបាល បានណែនាំឲ្យប្រជាពលរដ្ឋ ត្រូវទិញឱសថ ឬឱសថបំប៉នសុខភាព ពីក្រុមហ៊ុន ឬឱសថស្ថានស្របច្បាប់ ហើយពិនិត្យមើល ឲ្យមានលតាប័ត្របិទលើប្រអប់។ មិនត្រូវទិញឱសថ ឬឱសថបំប៉នសុខភាពតាមរយៈ online ទេ ព្រោះឱសថទាំងនេះ ជាឱសថខុសច្បាប់។

មើលវិធីនេះ ដើម្បីសម្គាល់ឱសថ ឬអាហារបំប៉នសុខភាពស្របច្បាប់

បច្ចុប្បន្ននៅកម្ពុជា មានក្រុមហ៊ុនឱសថស្របច្បាប់ និងបានចុះបញ្ជិកាក្រសួងសុខាភិបាល ប្រមាណជាង៣០០ ក្រុមហ៊ុន ហើយក្នុងនោះមានតែ ជាង១៥០ក្រុមហ៊ុន ដែលកំពុងបើកដំណើរការអាជីវកម្ម។ កន្លងទៅ ឱសថក្លែងក្លាយជាង៣ តោន ត្រូវបានក្រសួងសុខាភិបាលចាប់បាន និងកម្ទេចចោល។

អត្ថបទ៖ ពៅ រក្សា