អស់ពីកាហ្វេ និងថ្នាំបំប៉នផ្លូវភេទ ឥលូវដល់វេនថ្នាំបុរាណ កែរោគជិត១០០មុខ ក្រសួងហាមប្រើឱសថ ១ប្រភេទ

2018-05-10 03:29:44
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រោយការលុបចេញពីបញ្ជិកាអស់១០ឆ្នាំមកហើយនោះ វត្តមានថ្នាំមួយប្រភេទមានឈ្មោះ TRANKAL នៅតែមានលក់លើទីផ្សារ និងការផ្សព្វផ្សាយខុសច្បាប់ កក្រើក Facebook។

ថ្មីៗនេះ ក្រសួងសុខាភិបាល នៃព្រះរាជាណាចក្រកម្ពុជា បានចេញសេចក្ដីជូនដំណឹងដល់សាធារណជន ហាមប្រើប្រាស់ឱសថនេះ ដើម្បីចៀសវាងគ្រោះថ្នាក់សុខភាព។

តាមសេចក្ដីជូនដំណឹងរបស់ក្រសួងសុខាភិបាលបានឲ្យដឹងថា ឱសថនេះត្រូវបានលុបបញ្ជិកា ឱសថនេះ តាំងពីថ្ងៃទី ០២ ខែកញ្ញា ឆ្នាំ២០១០ មកម្ល៉េះ។ អ្នកជំនាញសុខភាព នៃក្រសួងសុខាភិបាល បានរកឃើញថា TRANKAL ជាឱសថសម័យ មានដាក់សារធាតុ Indomethacine Dexamethasone និងសារធាតុផ្សំច្រើនមុខផ្សេងទៀត ខុសបច្ចេកទេស ដែលនាំឲ្យប៉ះពាល់ធ្ងន់ធ្ងរដល់ក្រពះ។

ឱសថ TRANKAL ក្រសួងហាមប្រើ

តាមសេចក្ដីជូនដំណឹងដដែល បានបញ្ជាក់ថា TRANKALជាឱសថគ្មានសុវត្ថិភាពអាចមានគ្រោះថ្នាក់ដល់អាយុជីវិត។ បច្ចុប្បន្ននៅមានកន្លែងលក់មួយចំនួន និងជនខិលខូចខ្លះ បានប្រើគណនី **Facebook- My Big- Zone** បានកំពុងលក់ និងផ្សព្វផ្សាយបំផ្លើសការពិត ថាឱសថនេះ **ជាឱសថបុរាណធម្មជាតិ គ្មានគីមី អាចព្យាបាលឈឺសន្លាក់រ៉ាំរ៉ៃ ឬឈឺដើរមិនរួច និងជំងឺជាច្រើនមុខទៀត ខ្លាំងជាងឱសថវេជ្ជសាស្ត្រ** ដែលធ្វើឲ្យសាធារណជនមានការយល់ច្រឡំ។

ស្របនឹងចរាចរឱសថក្លែងក្លាយ ឬខុសច្បាប់ ក្រសួងសុខាភិបាល បានណែនាំឲ្យប្រជាពលរដ្ឋ ត្រូវទិញឱសថ ឬឱសថបំប៉នសុខភាព ពីក្រុមហ៊ុន ឬឱសថស្ថានស្របច្បាប់ ហើយពិនិត្យមើល ឲ្យមានលតាប័ត្របិទលើប្រអប់។

សូមមើលសេចក្ដីប្រកាសក្រសួងសុខាភិបាលខាងក្រោម។