ម៉ឺន សុភា មិនអាចមើលស្រាល ឡុង សុភី ទោះធ្លាប់ឈ្នះម្ដងរួចហើយ

2018-05-11 08:42:56
ចំនួនមតិ 0 | ចំនួនចែករំលែក 0

ចន្លោះមិនឃើញ

អ្នកលេងកណ្ដាប់ដៃថ្ម ម៉ឺន សុភា មិនអាចប្រហែសបានទេ ពេលប៉ះ ឡុង សុភី វគ្គផ្ដាច់ព្រ័ត្រខ្សែក្រវាត់ស្រាបៀលីអូ នាថ្ងៃអាទិត្យ ទី១៣ ខែឧសភា ឆ្នាំ២០១៨នេះ ទោះរូបគេធ្លាប់ឈ្នះម្ដងរួមហើយក្ដី។

ម៉ឺន សុភា(ខៀវ) ឡុង សុភី(ក្រហម)

ការប៉ះគ្នាលើកទី២ រវាង ម៉ឺន សុភា និង ឡុង សុភី នេះ ច្បាស់ជាកក្រើកសង្វៀនមិនខាន ព្រោះម្នាក់ៗសុទ្ធតែចង់ឈ្នះ ដើម្បីគ្រងខ្សែក្រវាត់ទម្ងន់ ៧០គីឡូក្រាម រួមទាំងទឹកប្រាក់ច្រើនពាន់ដុល្លារថែមទៀតផង។

បើមើលទៅ ម៉ឺន សុភា ហាក់មានប្រៀបឈ្នះ ឡុង សុភី ច្រើនដោយសារកណ្ដាប់ដៃធ្ងន់ៗ រួមទាំងស្នៀតទាត់ក្រោមល្អ ខណៈកម្លាំងស៊ុហ្វក៏ល្អទៀត។ ហើយមហាជនមួយចំនួនក៏ផ្តល់ក្ដីខ្ពស់លើកីឡាករម្ចាស់មេដាយប្រាក់ស៊ីហ្គេ ២០១៧ រូបនេះក៏ច្រើនដែរ ថានឹងអាចឈ្នះនាជំនួបនេះ។

ម៉ឺន សុភា ពេលឈ្នះមេដាយមាសកីឡាជាតិលើកទី១

ឡុង សុភី ក៏មិនអន់ដែរ បើគិតពីស្ថិតិប្រកួតប្រកួតកន្លងទៅទាំងវគ្គសន្សំពិន្ទុ និងវគ្គពាក់កណ្ដាលផ្ដាច់ព្រ័ត្រ ជើងខ្លាំងរូបនេះមិនស្គាល់ពាក្យថាចាញ់ឡើយ ពោល៥ប្រកួតឈ្នះទាំងអស់ រាប់ទាំងឈ្នះ វ៉ាត់ឆារ៉ាឡេកផងដែរ។ ស្របពេល ម៉ឺន សុភា ឈ្នះទាំងប្រភិតប្រផើយ ៣-២ នាវគ្គពាក់កណ្ដាលផ្ដាច់ព្រ័ត្រ។

ឡុង សុភី ឈ្នះវគ្គពាក់កណ្ដាលផ្ដាច់ព្រ័ត្រ

កូនសិស្សលោកគ្រូសាលវ័ន្ត ខាងលើនេះ មានបទពិសោធច្រើនក្នុងការប្រកួត ជាអ្នកប្រដាល់ចាស់វស្សាមកហើយ កម្មវិធីធំតូចធ្លាប់ឆ្លងកាត់រាប់មិនអស់ទៅហើយ។ ចំណុចពិសេសរបស់ជើងខ្លាំងរូបនេះ គឺពូកែវ៉ៃយកពិន្ទុ បើទោះជាផ្លែមិនសូវធ្ងន់ក្ដី ប៉ុន្តែសន្សំបានពិន្ទុរហូត។ ការជួបគ្នាលើកទី១នៅស្តាតចាស់វគ្គពាក់កណ្ដាលផ្ដាច់ព្រ័ត្រកីឡាជាតិកន្លងទៅ អាចថា ម៉ឺន សុភា ឈ្នះ ឡុង សុភី ដោយមិនសូវពិបាកនោះទេ ព្រោះពួកគេវ៉ៃគ្រាន់តែវ៉ៃបង្រ្គប់កិច្ចប៉ុណ្ណោះ ណាមួយប្រាក់រង្វាន់តិច ហើយជាអ្នករាប់អានគ្នាថែមទៀត។

ឡុង សុភី ឈ្នះកន្លងទៅ

កីឡាករ ម៉ឺន សុភា នឹងត្រូវប៉ះគ្នាវគ្គផ្ដាច់ព្រ័ត្រជាមួយ ឡុង សុភី ដណ្ដើមលេខ១ កម្មវិធីខ្សែក្រវាត់ស្រាបៀលីអូនាថ្ងៃអាទិត្យ ទី១៣ ខែឧសភា ឆ្នាំ២០១៨។ ម៉ឺន សុភា ឈ្នះពិន្ទុ ឡុង សុភី ម្ដង់រួមមកហើយកាលពីឆ្នាំ២០១៦ វគ្គពាក់កណ្ដាលផ្ដាច់ព្រ័ត្រកីឡាជាតិលើកទី១៕

អត្ថបទ៖ នួន ស៊ីណា