ម្ចាស់ក្លឹប Atletico ថា Barca ខ្វះក្រមសីលធម៌ក្នុងការតាមប្រមាញ់ Griezman

2018-05-13 01:52:45
ចំនួនមតិ 0 | ចំនួនចែករំលែក 0

ចន្លោះមិនឃើញ

ម្ចាស់ក្លឹប Atletico Madrid ខឹងសម្បាយ៉ាងខ្លាំងជាមួយ Barcelona ជុំវិញការតាមប្រមាញ់ Griezman ខណៈដែលក្លឹបមិនត្រូវការលក់កីឡាករឆ្នើមរបស់ខ្លួនទៅឲ្យក្លឹបនៅដែនដីកាតាឡាន់នៅរដូវក្តៅឡើយ។ នេះបើតាម Goal ចុះផ្សាយថ្ងៃនេះ។

"យើងមានអារម្មណ៍ធុញទ្រាន់នឹងអាកប្បកិរិយារបស់ក្រុម Barcelona ខ្លាំងណាស់។ ទាំងម្ចាស់ក្លឹប កីឡាករ និង ក្រុមប្រឹក្សារបស់ក្លឹប ប្រើប្រាស់សំដីអំពីអនាគតកីឡាករស្ថិតនៅកុងត្រារបស់យើង ហើយនិយាយតែប៉ុន្មានថ្ងៃប៉ុណ្ណោះមុនការប្រកួតវគ្គផ្តាច់ព្រ័ត្រទ្វីបអឺរ៉ុប [Europa League] មកដល់ គឺជាការខ្វះការគោរពចំពោះ Atleico Madrid និងអ្នកគាំទ្ររបស់យើង"។ នាយកប្រតិបត្តិក្លឹប Atletico បាននិយាយនៅក្នុងសេចក្ដីថ្លែងការណ៍មួយ ដែលបានចុះផ្សាយនៅលើវេបសាយផ្លូវការរបស់ក្លឹប។

Atletico មិនសប្បាយចិត្តបន្ទាប់ពី ប្រធានក្លិប Barca លោក Josep Maria Bartomeu ថាលោកបានពិភាក្សាជាមួយភ្នាក់ងាររបស់ Griezmann កាលពីខែតុលា។ រីឯ Luis Suarez ដែលបានដកស្រង់សំដីពីវិទ្យុអ៊ុយរុយហ្គាយថាកីឡាករបារាំងនឹងមក Camp Nou នៅរដូវក្តៅនេះ។

បើទោះជាគ្រូបង្វឹក Ernesto Valverde សរសើរសមត្ថភាពកីឡាករវ័យ២៧ឆ្នាំ ប៉ុន្តែគ្រូបង្វឹកវ័យ៥៤ឆ្នាំ ចង់ឲ្យ Barca មានការគោរពដល់គូបដិបក្ខរបស់ខ្លួន។ នោះគឺជាអាកប្បកិរិយាដ៏ត្រឹមត្រូវ ប៉ុន្តែវាកម្រនឹងកើតមានណាស់នៅក្នុងពិភពបាល់ទាត់សម័យទំនើប។ Valverde គឺជាសុភាពបុរស ប៉ុន្តែរឿងទិញលក់កីឡាករលោកមិនមែនជាអ្នកទទួលខុសត្រូវឡើយ។ ប្រភពខាងលើបន្ត។

កាលពីរដូវក្តៅមុន Barcelona ធ្លាប់ខឹងសម្បារចំពោះទង្វើរបស់ Paris Saint-Germain ក្នុងការតាមទិញ Neymar ។ ឥលូវនេះដល់វេន Atletico ខកចិត្តនឹង Barca រឿងតាមទិញ Griezmann។ ថ្មីៗនេះ Sevilla ក៏ធ្លាប់មិនពេញចិត្តនឹងទង្វើរបស់ Atletico រឿងដណ្តើមយកកីឡាករ Vitolo ពីខ្លួន ខណៈដែលក្រុម Las Palmas ក៏ធ្លាប់ក្នក់ចិត្តនឹងក្លឹប Andalusian រឿងតាមទិញកីឡាករកាត់មុខខ្លួនដែរ។

រឿងរ៉ាវទាំងនេះវាបានក្លាយទៅជាវដ្តសង្សារនៅក្នុងពិភពបាល់ទាត់សម័យថ្មីនៅពេលក្លឹបធំៗតែងធ្វើអ្វីគ្រប់យ៉ាងក្នុងការដណ្ដើមគ្នាយកកីឡាករល្អៗសម្រាប់ក្លឹបពួកគេរៀងៗខ្លួន ហើយ Atletico មិនអាចត្អូញត្អែរបានឡើយ៕

ប្រភព៖ Goal ប្រែសម្រួល៖ សុខ លាងហ៊ត