បានផលដំណាលគ្នា! អ្នកកំពង់ចាមថា ទុរេនខេត្តខ្លួន ឆ្ងាញ់មិនចាញ់កំពតទេ
- 2018-05-13 02:56:51
- ចំនួនមតិ 0 | ចំនួនចែករំលែក 0
បានផលដំណាលគ្នា! អ្នកកំពង់ចាមថា ទុរេនខេត្តខ្លួន ឆ្ងាញ់មិនចាញ់កំពតទេ
ចន្លោះមិនឃើញ
ខណៈរដូវប្រមូលទុរេនឈានមកដល់ ប្រជាពលរដ្ឋ និងដាំដុះដំណាំទុរេនបានឱ្យដឹងថា ទុរេន ខេត្តកំពង់ចាម មានរសជាតិឆ្ងាញ់មិនចាញ់ទុរេនខេត្តកំពតទេ។ តំបន់សំបូរចំការទុរេនភាគច្រើនមាននៅក្នុងភូមិបែកអន្លង់ ក្នុងទឹកដីស្រុកស្ទឹងត្រង់ ខេត្តកំពង់ចាម ព្រោះនៅតំបន់នោះដីអំណោយផលល្អប្រភេទដីក្រហម មានជីវជាតិល្អ និងមានរសជាតិឆ្ងាញ់បែបធម្មជាតិ មិនចាញ់ទុរេនរបស់អ្នកស្រុកដ៍ទៃឡើយ ពិសេសការដាំដុះមិនប្រើជីគីមីនោះទេ។
ចាប់ពីដើមឧសភានេះទៅម្ចាស់ចម្ការកំពុងមមាញឹកចាប់ផ្តើមប្រមូលផលជាបណ្តើរៗ ស្របពេលអាកាសធាតុមានលក្ខណៈល្អប្រសើរ។ ម្ចាស់ទុរេន លោកស្រី ស៊ី សុខលាង មានផ្ទៃដីដាំទុរេន ជាង១០ ដើម លើផ្ទៃដីជាង១០ហិចតា បានឱ្យដឹងថា ទុរេនកំពង់ចាមពិតជាមានរស់ជាតិឆ្ងាញ់ ខណៈការដាំដុះត្រូវស្រោចទឹកជាប្រចាំ ជាពិសេសនៅរដូវប្រាំងរាំងស្ងួត និងប្រើប្រាស់ជីធម្មជាតិ បើមិនដូច្នោះទេ ផ្ទៃដីដាំទុរេន ប្រែទៅជារឹងខូចគុណភាព។ អ្នកស្រីថា ទុរេនត្រូវការពេលវេលាថែទាំរហូត ៥ឆ្នាំទើបទទួលបានផល។
អ្នកស្រី ស្រេង ចិន្ដា អតិថិជនម្នាក់ បានសរសើរទុរេនខេត្តកំពង់ចាមថា មានរសជាតិឆ្ងាញ់ផ្អែម ឈ្ងុយ និងបែបធម្មជាតិពិតៗ។ អ្នកស្រីតែងទិញទុរេនខេត្តកំពង់ចាមយកទៅបរិភោគ និងទិញផ្ញើបងប្អូននៅរាជធានីភ្នំពេញ ព្រោះមានតំលៃសមរម្យ។
ម្ចាស់ចម្ការទុរេនម្នាក់ផ្សេងទៀត អ្នកស្រី មឿន គីមស្រេង រស់នៅក្នុងឃុំអារក្សត្នោត ស្រុកស្ទឹងត្រង់ ខេត្តកំពង់ចាម ឱ្យដឹងថា ទុរេនស្ទឹងត្រង់ពិតជាមានរសជាតិឆ្ងាញ់ និងលក់ចន្លោះពី ១២ ០០០ រៀល ទៅ ១៨ ០០០រៀល ក្នុងមួយគីឡូក្រាម ពូជទុរេន ម៉ាន់ថង។
លោក គីម សាវឿន ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ចាមបានប្រាប់ឲ្យដឹងថា ស្រុកស្ទឹងត្រង់មានផ្ទៃដីណាំទុរេន ចំនួន១៣៦ហិចតា ជាប្រភេទដីក្រហម មានប្រភពទឹកគ្រប់គ្រាន់។ ខេត្តកំពង់ចាម ទុរេន ល្បីល្បាញមានរសជាតិឆ្ញាញ់ជាងគេនោះគឺ ទុរេនរបស់អ្នកភូមិបែកអន្លង់ ក្នុងឃុំអារក្សត្នោត ស្រុកស្ទឹងត្រង់ ដែលម្ចាស់ទុរេន ភាគច្រើនដាំដុះបែបធម្មជាតិ មិនប៉ះពាល់ដល់សុខភាពរបស់បរិភោគឡើយ ហើយអ្វីដែលគួរឲ្យចាប់អារម្មណ៍ផងដែរនោះគឺ នៅតំបន់នេះមានប្រភេទទុរេន ដែលឆ្ងាញ់ពេញនិយមជាងគេនោះ គឺប្រភេទម៉ាន់ថង៕