គូស្នេហ៍ តូតា គ្រោងសម្ពោធជំនួញ១ទៀត ប្រើទុនជាង៣លានដុល្លារ ខណៈស្ងាត់ដំណឹងរៀបការ

2018-05-14 03:58:05
ចំនួនមតិ 0 | ចំនួនចែករំលែក 0

ចន្លោះមិនឃើញ

លោក ប៉ុល វិបូ ហៅនីត ថៅកែផលិតកម្ម "អង្គរ Picture " ជាបុរសមានឥទ្ធិពលម្នាក់ ដែលត្រូវគេដឹងថា ជាអនាគតម្ចាស់ចិត្តតូតា បានបង្ហើបឲ្យដឹងថា ប្រហែលជា៣ខែទៀត លោកគ្រោងសម្ពោធមុខជំនួញ១ទៀត ដែលប្រើដើមទុនវិនិយោគរហូតដល់ទៅជាង៣លានដុល្លារឯណោះ។

ជំនួញប្រើដើមទុនដ៏ច្រើនសន្ធឹកសន្ធាប់នោះ គឺការបើកហាងផឹកស៊ីដូចនឹងហាងផែសមុទ្រ ប៉ុន្តែការធ្វើលើទីតាំងធំទូលំទូលាយ មានបរិយាកាសធម្មជាតិល្អ ធ្វើលើផ្ទៃដីរហូតដល់ទីជាង៣ហិតាឯណោះ។ "ហាង ផែសមុទ្រ ដូចតែគ្នាហ្នឹង គ្រាន់តែនៅទីនោះមានជារីសត អាចបោះតង់អាំងសាច់លេងបាន យើងធ្វើលើដីជាង៣ហិតាឯណោះ។ លោក ប៉ុល វិបូ ហៅនីត លើកឡើង។

លោក ប៉ុល វិបូ និង តូតា

លោកថា បើបូកទាំងដី និងការរៀបចំ ទម្រាំដល់ថ្ងៃបើកសម្ពោធនោះ ប្រើដើមទុនមិនក្រោម៣លានដុល្លារនោះឡើយ បច្ចុប្បន្នបានធ្វើប្រហែលជា៧០%ហើយ អាចខ្ទង់៣ខែអីទៀតនឹងបើកសម្ពោធ ក្រោមវត្តមានអ្នកសិល្បៈល្បីៗ អ្នកជំនួញល្បីៗ និងមន្ត្រីរដ្ឋាភិបាលជាច្រើនផងដែរ។ ទីតាំងនោះ គឺនៅក្បែរកំពង់ផែថ្មី ដែលមានចំណាយប្រហែល៣គីឡូ ពីទីរួមខេត្តកំពត។

ទន្ទឹមនឹងបើកសាខានៅខេត្តកំពតនេះ អនាគតម្ចាស់បេះដូង តូតា រូបនេះ ក៏ត្រូវស្វែងរកទីតាំងនៅរាជធានីភ្នំពេញ ដើម្បីបើកឲ្យគ្រប់១២ទីតាំង លើខណ្ឌទាំង១២ ដែលបានគ្រោងទុក ដោយបច្ចុប្បន្នទើបតែបើកបាន៤សាខានៅឡើយ។ តាមការវាយតម្លៃ សម្រាប់តែនៅភ្នំពេញ ប្រសិនបើ តូតាបើកសាខា ហាង"ផែសមុទ្រ"របស់នាង រហូតដល់ទី១២ទីតាំង គ្រប់ខណ្ឌទាំងអស់ ក្នុងរាជធានីភ្នំពេញ តាមការគ្រោងទុកពិតមែននោះ ជំនួញរបស់នាង ត្រូវប្រើដើមទុនរាប់លានដុល្លារឯណោះ ត្បិតអីទីតាំងនីមួយៗនាងប្រើដើមទុនមិនក្រោម១០ម៉ឺនដុល្លារឡើយ។

តូតា និង លោក ប៉ុល វិបូ ហៅនីត បានមានទំនាក់ទំនងស្នេហាជាមួយគ្នាដោយបើកចំហជាសាធារណៈជាច្រើនឆ្នាំមកហើយ ពោលគឺតាំងពីតារាស្រីរូបនេះ បានចូលរួមថតរឿង "ចន្ទ្រា" កាលពីជាង៣ឆ្នាំមុនឲ្យ ផលិតកម្ម"អង្គរ Picture “ មកម្ល៉េះ។ ទោះបីជាបែបនេះក្ដី ស្នេហារវាងក្រមុំក្មេងខ្ចីល្បីឈ្មោះ ជាមួយនឹងបុរសពោះម៉ាយមានឥទ្ធិពល១គូនេះ ហាក់បីដូចជាមិនទាន់បង្ហាញតម្រុយថ្ងៃចូលរោងជ័យនៅឡើយទេ ដោយពួកគេធ្លាប់បានលើកឡើងថា ចាំមើលជំនួញជោគជ័យសិន៕

អត្ថបទៈ ស៊ុនហួត