នៅលីវ មានគុណសម្បត្តិមួយបែបផ្សេង កុំបារម្ភ

2018-05-15 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មនុស្សធំពេញវ័យ មានគូស្រករ ជារឿងធម្មតា តែក៏មានមនុស្សមួយចំនួននៅបន្តភាពនៅលីវ ដោយមានហេតុផលរៀងៗខ្លួន។ នៅលីវ មិនមានន័យថា មានភាពឯកា មិនមានអ្នកត្រូវការនោះទេ។

បើងាកមកមើលចំណុចវិជ្ជមាននៃការសិក្សានេះ មានលក្ខណៈគួរឲ្យចាប់អារម្មណ៍ដែរ។

នៅលីវមានមិត្តភក្ដិច្រើន

ការសិក្សាឆ្នាំ ២០១៥ លើយុវជនអាមេរិក ទាំងរៀបការ និងនៅលីវ ឃើញថា អ្នកនៅលីវមិនត្រឹមតែមានមិត្តភក្ដិច្រើននោះទេ ថែមទាំងងាយនឹងផ្ដល់ជំនួយ ពេលមិត្តភក្ដិមានតម្រូវការជាង មនុស្សបានរៀបការ។ ធម្មតា ភាពនៅលីវ អាចបង្កើនកម្រិតទំនាក់ទំនងបានច្រើនទាំងបុរស និងស្ត្រី។

ការសិក្សាចេញឆ្នាំ ២០០៨ បង្ហាញថាមនុស្សដែលមានមិត្តភក្តិចាប់ពី ១០ នាក់ឡើងទៅ មានភាពសប្បាយរីករាយជាង មនុស្សមិនសូវមាន។

សម្រាប់មនុស្សចាស់ មិត្តភាពអាចថាជាចំណុចសំខាន់ ផ្ដល់ទាំងសុខភាព និងសុភមង្គល ជាងសាច់ញាតិ (សមាជិកគ្រួសារ)។ នេះដោយសារកត្តា អាយុប្រហាក់ប្រហែលគ្នា ងាយស្រួលបង្កើតបរិយាកាសរីករាយនៅខាងក្រៅ។

រក្សាមិត្តភក្ដិល្អជិតខ្លួន តែពីរបីនាក់ អាចធ្វើឲ្យពិភពមួយមានភាពខុសគ្នាសម្រាប់សុខភាព។ ដូច្នេះ គួរវិនិយោគលើចំណងមិត្តភក្ដិ ដើម្បីឲ្យអ្នកកាន់តែសប្បាយរីករាយ។

រូបរាងស្អាត

ការស្ទង់មតិលើមនុស្សច្រើនជាង ១៣ ០០០ នាក់អាយុចន្លោះពី ១៨ ទៅ ៦៤ ឆ្នាំ អ្នកស្រាវជ្រាវរកឃើញថា មនុស្សនៅលីវ ឬមិនដែលរៀបការ ធ្វើលំហាត់ប្រាណទៀងទាត់រៀងរាល់សប្ដាហ៍ ជាងមនុស្សរៀបការ និងធ្លាប់បានលែងលះគ្នា។ ជារួម មនុស្សបានរៀបការមានទម្ងន់ លើស អ្នកនៅលីវ។

យល់ពីខ្លួនឯងបានកាន់តែច្រើន

នៅលីវ អាចផ្ដល់ប្រយោជន៍ដូចជា មានសេរីភាពទាំងនៅខាងក្នុង និងខាងក្រៅ, មានគំនិតច្នៃប្រឌិតខ្ពស់, បំពេញការងារមានប្រសិទ្ធភាព (មានការផ្ដោតអារម្មណ៍ខ្លាំង) និងយល់ពីខ្លួនឯងបានកាន់តែល្អប្រសើរ។

ក្នុងបទបង្ហាញមួយ ឆ្នាំ ២០១៦ សម្រាប់សមាគមផ្លូវចិត្តរបស់ជនជាតិអាមេរិក (American Psychological Association) បង្ហាញថា មនុស្សនៅលាវ មានការដឹកនាំខ្លួនឯង និងការសម្រេចចិត្តបានជ្រះស្រលះល្អ ជាងមនុស្សបានរៀបការ។

ជារួម ខណៈពេលចំណងមិត្តភាព ពោលពេញដោយមនោសញ្ចេតនាមានអត្ថប្រយោជន៍ ភាពនៅលីវ ក៏មានប្រយោជន៍គួរឲ្យកត់សម្គាល់ផងដែរ៕

អានអត្ថបទ

ប្រភព៖ Businessinsider ប្រែសម្រួល៖ ប៊ុន ធឿន