OnePlus 6 ក្បាលឆកបង្ហាញមុខជាផ្លូវការ តម្លៃចាប់ពី ៥២៩ ដុល្លារ

2018-05-17 01:35:47
ចំនួនមតិ 0 | ចំនួនចែករំលែក 0

ចន្លោះមិនឃើញ

យប់មិញនេះ OnePlus 6 បានបង្ហាញមុខជាផ្លូវការ ជាមួយនឹងរចនាបថក្បាលឆក ដែលមានអេក្រង់ធំជាងពីមុន និងនៅរក្សាតម្លៃធូរថ្លៃដដែល។

រូបរាងរបស់ OnePlus 6 មិនជាខុសគ្នាពី OnePlus 5T ប៉ុន្មាននោះទេ។ ផ្នែកខាងមុខ និងក្រោយរបស់ OnePlus 6 មានស្រោបដោយសារធាតុកញ្ចក់ Gorilla Glass 5 និងមានលោហៈធាតុជាស្នូលកណ្ដាល។

ជាលើកដំបូង OnePlus 6 មានសមត្ថភាពអាចទ្រាំទ្រនឹងទឹកបាន ត្បិតអីកម្រិត IP របស់វានៅមិនទាន់មានការបញ្ជាក់ច្បាស់នៅឡើយ។ ប៉ុន្តែ OnePlus 6 អាចប្រើក្រោមទឹកភ្លៀង និងអាចទ្រាំទ្រនឹងការធ្លាក់ចូលទឹកជម្រៅរាក់ៗបាន។

OnePlus 6 មានទំហំប៉ុន OnePlus 5T ប៉ុន្តែវាមានអេក្រង់ទំហំ ៦,៣ អ៊ីញ ខណៈ OnePlus 5T មានអេក្រង់ត្រឹមតែ ៦,០១ អ៊ីញ។ អេក្រង់នេះជាប្រភេទ AMOLED ដែលអាចបង្ហាញរូបភាពក្នុងកម្រិត ២២៨០ x ១០៨០ ភីកសែល។

Android 8.1 ជាប្រព័ន្ធប្រតិបត្តិការរបស់ OnePlus 6 ដែល OnePlus បានបន្ថែមមុខងារពិសេសៗមួយចំនួនចូលក្នុងប្រព័ន្ធប្រតិបត្តិការនេះ។ ឧទាហរណ៍ដូចជាអាចជំនួសប៊ូតុង Navigation លើអេក្រង់ ដោយប្រើការបញ្ជាតាមកាយវិការ ដែលមានលក្ខណៈស្រដៀងគ្នានឹង iPhone X។

ដំណើរការរបស់ OnePlus 6 ផ្ដល់ដោយបន្ទះឈីប Snapdragon 845 គួបផ្សំនឹង RAM ទំហំ ៦ ឬ ៨ GB និងមានជម្រើសអង្គផ្ទុកទិន្នន័យទំហំ ៦៤, ១២៨ និង ២៥៦ GB។ OnePlus 6 មិនមានកន្លែងដាក់មេមូរីកាតនោះទេ។

កាមេរ៉ាមេនៅផ្នែកខាងក្រោយមានកម្រិត ១៦ MP ដដែល និងមាន Aperutre f/1.7 ដូចគ្នានឹងកាមេរ៉ា OnePlus 5T ពិតមែន ប៉ុន្តែ OnePlus 6 មានដាក់នូវ Sensor រូបភាពថ្មីមានទំហំធំជាងមុន និងបច្ចេកវិទ្យារក្សាលំនឹងផងដែរ។

កាមេរ៉ាទីពីរមានកម្រិត ២០ MP មាន Aperture f/1.7 មិនមានសមត្ថភាព Optical Zoom នោះទេ ប៉ុន្តែអាចប្រើសម្រាប់ផលិតរូបភាព Bokeh បាន។ ឯកាមេរ៉ាខាងមុខមានកម្រិត ១៦ MP អាចថតវីដេអូក្នុងកម្រិត ១០៨០ ភីកសែល។

ចំពោះការថតវីដេអូ កាមេរ៉ាខាងក្រោយមានសមត្ថភាពខ្លាំងជាងមុន ដោយអាចថតវីដេអូ 4K នៅល្បឿន ៦០ ប្លង់/វិនាទី ដូចនឹងគូប្រជែងដទៃទៀត។ មុខងារមួយទៀតគឺការថតវីដេអូយឺតៗ ដោយអាចថតក្នុងល្បឿនយឺតដល់ ៤៨០ ប្លង់/វិនាទី នៅកម្រិត ៧២០ ភីកសែល។

ថ្មរបស់ OnePlus 6 មានទំហំ ៣៣០០ mAh មិនមានសមត្ថភាពសាកថ្មឥតប្រើខ្សែ ប៉ុន្តែមានបច្ចេកវិទ្យា Dash Charge ដែលអាចសាកបញ្ចូលថាមពលបានលឿនជាទីបំផុត។

សហរដ្ឋអាមេរិក និង តំបន់អឺរ៉ុប នឹងអាចទិញ OnePlus 6 បាននៅថ្ងៃទី ២២ ខែឧសភានេះ។ តម្លៃមានចាប់ពី ៥២៩ ដុល្លារ សម្រាប់ RAM ៦ GB + អង្គផ្ទុកទិន្នន័យ ៦៤ GB, ៨ GB + ១២៨ GB តម្លៃ ៥៧៩ ដុល្លារ និង ៨ GB + ២៥៦ GB តម្លៃ ៦២៩ ដុល្លារ ៕