វិបត្តិសង្គមកាន់តែធ្ងន់ បើមនុស្សនៅតែបន្ត២ចំណុច ជាន់ពន្លិចគ្នា ងើបមុខមិនរួច
- 2018-05-18 07:30:59
- ចំនួនមតិ 0 | ចំនួនចែករំលែក 0
វិបត្តិសង្គមកាន់តែធ្ងន់ បើមនុស្សនៅតែបន្ត២ចំណុច ជាន់ពន្លិចគ្នា ងើបមុខមិនរួច
ចន្លោះមិនឃើញ
បច្ចុប្បន្ននេះមានបញ្ហា២ ដែលកំពុងតែបន្តកើតមាននៅក្នុងសង្គមខ្មែរ ជាហូរហែតាមរយៈ Facebook ខណៈមានព្រឹត្តិការណ៍សង្គមអ្វី១ បានកើតឡើង ហើយគិតថាវាជារឿងធម្មតា ទាល់ដាក់ម្នាក់ម៉ាត់ៗ ទើបមានដំណោះស្រាយ។ ប៉ុន្តែបើតាមសាស្រ្តចារ្យ១រូប បានវិភាគថា មិនដូច្នេះឡើយ វាជារឿងគ្រោះថ្នាក់១ បើយើងនៅតែបន្តទាំងងប់ងុល វង្វេងវង្វាន់ នឹងអាចឈានទៅជាវិបត្តិសង្គមធ្ងន់ថែមទៀត។
តាមរយៈកិច្ចសម្ភាសជាមួយអ្នកយកព័ត៌មាន Sabay លោក សំបូរ មាណ្ណារ៉ា ព្រឹទ្ធសាកលវិទ្យាអធិការរង នៃសកលវិទ្យាល័យបញ្ញាសាស្រ្ត កម្ពុជា បានបកស្រាយថា
បញ្ហាទី១ គឺ វប្បធម៌ក្ដិចត្រួយតម្រឹមទ្រើង
លោក ព្រឹទ្ធសាកលវិទ្យាអធិការរង ចង់សង្កត់ធ្ងន់ ដល់ការដែលយើងមិនចង់ឲ្យអ្នកណាដទៃមានឱកាសលូតលាស់ ឬអភិវឌ្ឍន៍ខ្លួនបាន។ មានន័យថា ឲ្យតែឃើញគេ ធ្វើខុសរឿងអ្វី១ គឺយើងតែងបកអាក្រាត តៗគ្នា ជាសាធារណ តាមអារម្មណ៍ខឹង ឬស្អប់ ទាំងមិនដឹងខុសត្រូវ។ លោកថា តាមរយៈការលេង Facebook សព្វថ្ងៃមានមនុស្សកាន់តែច្រើន គឺឃើញខុសហើយ មិនសូវប្រាប់ភ្លាមទេ ច្រើនតែយកមកលេងសើច ឥតសាច់ការ តៗគ្នា តាមគេ តាមឯង ជាជាងការផ្ដល់យោបល់ស្ថាបនា ឲ្យគេដឹងកំហុសនោះ។
នេះហើយជា ការមិនឲ្យគេបោះត្រួយទៅមុខ ឬសាងស្នាដៃបាន គឺច្រើនតែនាំគ្នា និយមក្ដិចត្រួយចោលដូចរុក្ខជាតិ បើមនុស្សវិញគឺ ការបំបាក់មុខកណ្ដាលវាលតែម្ដង។
បញ្ហាទី២ គឺ ការជាន់ពន្លិចគ្នា
នៅក្នុងយុគសម័យទំនើប ការប្រាស្រ័យទាក់ទងគ្នាកាន់តែងាយ ក្នុងនោះអ្នកលេង Facebookមានច្រើនជាង អ្នកប្រើបណ្តាញសង្គមយក្ស១នេះ។ សាស្ត្រាចារ្យ សំបូរ មាណ្ណារ៉ា មើលឃើញថា អ្នកប្រើ Facebook គឺចេះប្រើបានត្រឹមត្រូវ។ ផ្ទុយទៅវិញ អ្នកលេង Facebook គឺប្រើខុសគោលដៅ និងបានយកវាធ្វើជាឧបករណ៍ទុកវាយប្រហារ ឬបញ្ចេញអារម្មណ៍ ទៅលើរឿងអ្វី១ ទាំងគ្មានហេតុផល។
ឧទាហរណ៍ មានរឿងអ្វី១ក្នុងសង្គម អ្នកលេង តែងទាញ Facebook មកចែកចាយឬបញ្ចេញកំហឹង ក្នុងន័យលែបខាយ លេងបន្លំមែន។ ទង្វើនេះ បញ្ញវន្តខាងលើ បានបន្តថា វាពិតជា ការប្រមាថដល់សង្គម និងផ្ដើមបណ្ដុះមេរោគដល់សង្គម ជាន់បន្លិចគ្នា និងជាវិនាសកម្មដល់ក្មេងជំនាន់ក្រោយ ។ មិនតែប៉ុណ្ណោះ ការជាន់បន្លិចគ្នា ក៏អាចហុចផលប៉ះពាល់ធ្ងន់ធ្ងរ ដល់ទស្សនៈនយោបាយ ដែលគួរតែពិចារណាឡើងវិញ។