វិសាខា ឬ ការពារជាតិ រកបាន៣ពិន្ទុសប្តាហ៍នេះ?

2018-05-18 04:31:13
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រសួងការពារជាតិត្រូវធ្វើជាភ្ញៀវទៅលេងនៅផ្ទះរបស់ចំណូលថ្មីវិសាខាក្នុងសប្តាហ៍ទី៦នៃការប្រកួតបាល់ទាត់ជើងឯកជាតិឆ្នាំ២០១៨នៅកីឡដ្ឋានវេស្ទើនវេលាម៉ោង៣រសៀល ថ្ងៃទី១៩ ខែឧសភា ឆ្នាំ២០១៨នេះដែលផ្សាយផ្ទាល់ដោយ BTV។

វិសាខា

ឆ្លងកាត់ប្រកួត៥សប្តាហ៍កន្លងទៅ សមាជិកចំណូលថ្មីនៃលីគកំពូលកម្ពុជារដូវកាល២០១៨នេះឈ្នះ៣ប្រកួត ស្មើ១ប្រកួត និងចាញ់១ប្រកួតដោយមាន១០ពិន្ទុ ស៊ុតចូលគូប្រកួតបាន៩គ្រាប់ គេស៊ុតចូលវិញ២គ្រាប់ កំពុងឈរចំណាត់ថ្នាក់លេខ៣។

កីឡាករ

លោក ហុក សុជីវ័ន្ត បានលើកឡើងថា ក្រុមរបស់លោកគ្មានបញ្ហាអ្វីឡើយដោយសារមួយរយៈពេលកន្លងទៅនេះមានពេលគ្រប់គ្រាន់សម្រាប់ការហ្វឹកហាត់ និងត្រៀមខ្លួន។

រហូតដល់ពេលនេះ ខ្សែប្រយុទ្ធខាងជើង Choe Myong Ho ជាកីឡាករដែលរកគ្រាប់បាល់បានច្រើនជាងគេសម្រាប់ក្រុមវិសាខា បន្ទាប់ពីស៊ុតចូលអគ្គិសនីកម្ពុជា២គ្រាប់ក្នុងសប្តាហ៍ទី១ ស៊ុតចូលអង្គរថាយហ្គឺរ១គ្រាប់ក្នុងសប្តាហ៍ទី២ និងស៊ុតចូលវេស្ទើនភ្នំពេញ២គ្រាប់ក្នុងសប្តាហ៍ទី៥។ កីឡាករផ្សេងទៀតដូចជា ទៀង ទីនី, ពៅ ភារិទ្ធ, សាន់ គឹមហេង និង Kim Kyong Hun រកបានម្នាក់១គ្រាប់ដូចគ្នា។

ចំណាប់អារម្មណ៍គ្រូមុនការប្រកួត

លោក ហុក សុជីវ័ន្ត

លោក ហុក សុជីវ័ន្ត គ្រូបង្វឹកវិសាខាបាននិយាយថា លោកទទួលស្គាល់ភាពខ្លាំងរបស់ការពារជាតិ ប៉ុន្តែលោកមិនខ្វល់ថា គេខ្លាំងកម្រិតណាទេ។ ក្រុមរបស់លោកមានពេលគ្រប់គ្រាន់ត្រៀមខ្លួនរួចហើយសម្រាប់ការប្រកួតនេះ។ ជាពិសេសទៀតនេះ សមាជិកក្រុមរបស់លោកដឹងច្រើនពីរបៀបលេងរបស់ការពារជាតិ ដោយសារកីឡាករមួយចំនួនធ្លាប់នៅទីនោះ។ យ៉ាងណាអ្វីៗត្រូវប្រឹងប្រែង និងប្រយ័ត្នគ្រប់ពេលវេលា។

ក្រសួងការពារជាតិ

ក្រសួងការពារជាតិចាប់ផ្តើមរដូវកាលនេះមិនសូវល្អប្រសើរប៉ុន្មានឡើយ បើប្រៀបធៀបនឹងស្ថិតិរបស់ខ្លួនកាលពីរដូវកាល២០១៧។ ៥ប្រកួតកន្លងទៅ ទព័ឈ្នះ៣ប្រកួត និងចាញ់២ដោយមាន៩ពិន្ទុកំពុងឈរចំណាត់ថ្នាក់លេខ៥។ ក្នុងនេះការពារជាតិស៊ុតចូលគូប្រកួត១១គ្រាប់ និងរបូតគ្រាប់បាល់៣គ្រាប់។

ក្រុមក្រសួងការពារជាតិ

កីឡាករ

លោក ភា សុភ័ត្ត្រា បានឲ្យដឹងថា ទ័ពបានត្រៀមរួចរាល់ហើយចំពោះកីឡាករកូរ៉េខាងជើងរបស់វិសាខា។ យ៉ាងណា ស្ថានភាពកីឡាកររបស់លោកគឺមិនសុខសប្បាយប៉ុន្មានទេ ព្រោះខ្សែបម្រើជប៉ុនលេខ៦ជាប់ពិន័យ១ប្រកួត ការពារកូរ៉េលេខ២០មានជំងឺគ្រុនឈាម លេខ៨ជប៉ុនត្រូវបានបញ្ឈប់កិច្ចសន្យា ដូចនេះថ្ងៃស្អែក ក្រសួងការពារជាតិមានកីឡាករបរទេសតែ២នាក់ប៉ុណ្ណោះគឺលេខ៩ និងលេខ១០។

ខ្សែបម្រើប្រយុទ្ធជប៉ុន Yudia Ogawa ជាកីឡាករលេចធ្លោម្នាក់សម្រាប់ក្រសួងការពារជាតិ បន្ទាប់ពីរកបាន៤គ្រាប់ក្នុងនោះសប្តាហ៍ទី១ស៊ុតចូលអង្គរថាយហ្គឺរ១គ្រាប់ សប្តាហ៍ទី៣ស៊ុតចូលអាស៊ីអឺរ៉ុប១គ្រាប់ និងសប្តាហ៍ទី៤ស៊ុតចូលវេស្ទើនភ្នំពេញ២គ្រាប់។ ចំណែក រ៉ឹង ប៊ុនហៀងរកបាន២គ្រាប់ និង ភួង សុសាណា, ណារ៉ុង កក្កដា, កាន់ ពិសាល និង Matsumoto រកបានម្នាក់១គ្រាប់ដូចគ្នា។

ចំណាប់អារម្មណ៍គ្រូមុនការប្រកួត