Honor 10 ម៉ូឌែលថ្មីពី Huawei ចេញបានត្រឹមមួយថ្ងៃ លក់ដាច់ស្តុកនៅតំបន់អឺរ៉ុប

2018-05-18 14:15:00
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Huawei បានបញ្ជាក់ជាផ្លូវការមុននេះបន្តិចថាម៉ូឌែលស្មាតហ្វូន Honor 10 បានលក់ដាច់អស់ហើយនៅទីផ្សារអឺរ៉ុប ក្រោយប្រកាសលក់ជាសាធារណៈបានរយៈពេលមួយថ្ងៃ។

ជើងខ្លាំងអ្នកផលិតស្មាតហ្វូនលំដាប់ទី ៣ ក្នុងលោក មិនទាន់អាចបង្ហើបពីតួលេខច្បាស់ការនៃចំនួនម៉ាស៊ីនចេញលក់ ប៉ុន្តែតាមការប្រមើលមើលមានអតិថិជនជាង ៨០ ០០០ នាក់ជ្រើសរើសការបញ្ចុះតម្លៃ ៣០ អឺរ៉ូ និងការលក់ចេញសរុបអាចឈានដល់ជាង ១០០ ០០០ គ្រឿង ។

ក្នុងប្រទេសអេស្ប៉ាញ Honor 10 បានដាច់ស្តុកត្រឹមរយៈពេល ៦ ម៉ោង ខណៈជម្រើសពណ៌ថ្មី Phantom Blue លក់ដាច់គ្មានសល់ត្រឹមរយៈពេលមួយថ្ងៃនៅប្រទេសបារាំង។ នេះក៏ដោយសារកត្តាតម្លៃ ដែលថ្លៃត្រឹម ៤៧០ ដុល្លារ ជាមួយការផ្តល់ជូននូវលក្ខណៈសម្បត្តិម៉ាស៊ីនខ្លាំងប្រហែលស្មាតហ្វូនថ្លៃកន្លះពាន់ដុល្លារ P20។

ត្រកូល Honor សេរ៊ីឆ្នាំ ២០១៨ មានបំពាក់នូវអង្គគណនា Octa-core ឈីប Kirin 970 អម RAM 4/6GB ជាមួយជម្រើសអង្គផ្ទុក 64/128GB។ ផ្នែកកាមេរ៉ាក្រោយភ្លោះទំហំ 16+24MP មានមួយគ្រាប់ជាលែន Monochrome និងអាចថត Selfie បានច្បាស់ដល់កម្រិត 24MP នៅផ្នែកខាងមុខ។

ថ្វីបើយ៉ាងណាមិញក្រុមហ៊ុនចិនមួយនេះពុំទាន់បង្ហើបពីគោលដៅវាយលុកទីផ្សារនាពេលបន្ទាប់នៅឡើយ ប៉ុន្តែបើស្លាកយីហោ Honor នៅតែបន្តជោគជ័យបែបនេះ នោះគូប្រជែងធុនទានដូចជា Xiaomi ដែលកំពុងដុតដៃដុតជើងខ្លាំងទាំងក្នុងនិងក្រៅស្រុក អាចថាត្រូវប្រឈមបញ្ហាច្រើនជាងមុនបន្តិច។