Aguero មិនសង្ឃឹមបានលេងបាល់ក្លឹបជាមួយ Messi

2018-05-18 11:17:59
ចំនួនមតិ 0 | ចំនួនចែករំលែក 0

ចន្លោះមិនឃើញ

ខ្សែប្រយុទ្ធ Sergio Aguero ក្នុងថ្ងៃនេះ មិនបង្ហាញសង្ឃឹមបានលេងបាល់កម្រិតក្លឹបជាមួយមិត្តរួមក្រុមជម្រើសជាតិ Lionel Messi។

កីឡាករ Manchester City រូបនេះ ត្រូវបានសារព័ត៌មាន TyC Sports សួរថា តើសង្ឃឹមថាអាចបានលេងក្នុងក្រុមកម្រិតបាល់ទាត់ជាមួយ Lionel Messi ឬទេ នាថ្ងៃខាងមុខ។ Aguero បានឆ្លើយទៅវិញថា៖ "និយាយតាមត្រង់ទៅ កាលពីមុនរឿងបែបនេះអាចទៅរួច។ ទោះជាយ៉ាងណា ឥឡូវបញ្ហានៅត្រង់ថាអាយុរបស់ពួកយើងកាន់តែច្រើនទៅហើយ។ គេកំពុងលេងល្អនៅ Barcelona អញ្ចឹងហើយច្បាស់ណាស់គេនឹងបន្តលេងនៅទីនោះ ឯខ្ញុំវិញក៏ដូច្នោះដែរ ខ្ញុំនឹងបន្តលេងឲ្យ Manchester City"។

សូមបញ្ជាក់ផងដែរថា ទាំង Aguero និង Messi សុទ្ធតែមានឈ្មោះក្នុងបញ្ជីឈ្មោះបឋមក្រុមជម្រើសជាតិអាហ្សង់ទីនសម្រាប់ត្រៀមលេងក្នុងកម្មវិធី World Cup ខាងមុខ។

គួររម្លឹកឡើងវិញដែរថា កាលពីអំឡុងរដូវកាលដោះដូរកីឡាករលើកមុន Manchester City ត្រូវបានសារព័ត៌មានជាច្រើនចុះផ្សាយថា បានប្រឹងប្រែងយ៉ាងសស្រាក់សស្រាំក្នុងការតាមទិញខ្សែប្រយុទ្ធ Messi តែនៅតែមិនបានសម្រេចនៅចុងបញ្ចប់។ យ៉ាងនេះក្ដី លោកប្រធានក្លឹប Barcelona កាលពីដើមខែឧសភា បានច្រានចោលពាក្យទាំងនេះ ដោយអះអាងថា មិនមានក្លឹបណា ទាក់ទងលោកស្ដីពីការផ្ទេរ Messi នោះទេ កាលពីពេលកន្លងទៅ៕

ប្រភព៖ Four Four Two ប្រែសម្រួល៖ ហ៊ីម រស្មី