ក្រោយសារភាពថាបានជួបមេៗ Real នាយក Bayern បញ្ជាក់ពីស្ថានភាព Lewandowski
- 2018-05-18 13:33:19
- ចំនួនមតិ 0 | ចំនួនចែករំលែក 0
ក្រោយសារភាពថាបានជួបមេៗ Real នាយក Bayern បញ្ជាក់ពីស្ថានភាព Lewandowski
ចន្លោះមិនឃើញ
បើទោះជាសារភាពថាបានជួបនាយកៗរបស់ Real Madrid កាលពីពេលកន្លងទៅ នាយកប្រតិបត្តិក្លឹប Bayern លោក Karl-Heinz Rummenigge បានច្រានចោលពាក្យចចាមអារ៉ាមដែលថា ខ្សែប្រយុទ្ធ Robert Lewandowski នឹងចាកចេញពីក្លឹប ទៅក្លឹបយក្សអេស្ប៉ាញ។
នៅពេលសួរទាក់ទងពីអនាគតរបស់ខ្សែប្រយុទ្ធប៉ូឡូញ លោក Rummenigge បានប្រាប់ Muenchner Merkur ថា៖ “Robert កំពុងតែស្មោះស្ម័គ្រយ៉ាងខ្លាំងចំពោះក្លឹប យើងមិនដឹង ហើយក៏មិនខ្វល់ដែរថា ពាក្យចចាមអារ៉ាមនេះ (Robert Lewandowski នឹងចាកចេញទៅ Real Madrid) ចេញពីណានោះ"។
នាយកប្រតិបត្តិក្លឹបរូបនេះ បានបន្ត៖ "កាលពីពេលថ្មីៗនេះ យើងទើបតែបានជួប និងទទួលទានបាយថ្ងៃត្រង់បានពីរពេលជាមួយនាយកៗរបស់ Real Madrid។ ក្នុងជំនួបទាំងនោះ ពួកយើងមិនបាននិយាយសូម្បីមួយម៉ាត់អំពី Lewandowski"។
យ៉ាងនេះក្ដី លោកបានសង្កត់ធ្ងន់ថា រយៈពេលនៃកុងត្រាកីឡាករគឺជារឿងសំខាន់។ លោកបាននិយាយថា បើសិនជាមានក្លឹបណា ហ៊ានចេញមុខមកឲ្យថ្លៃតាមតម្លៃកុងត្រា ក្លឹប Bayern នឹងពិចារណា។
Lewandowski មានកុងត្រាជាមួយក្លឹប Bayern រហូតដល់ ២០២១។ បើតាមសម្ដីរបស់លោក Rummenigge កាលពីឆ្នាំ ២០១៦ កុងត្រារបស់ Lewandowski មិនមានតម្លៃផ្ដាច់កុងត្រានោះទេ។
សូមបញ្ជាក់ផងដែរថា មានសារព័ត៌មានជាច្រើនបានចុះផ្សាយថា កីឡាករប៉ូឡូញ Lewandowski អាចចេញពី Bayern ក្នុងទីផ្សារដោះដូរខាងមុខនេះ។ របាយការណ៍ទាំងនោះ ភាគច្រើននិយាយដូចៗគ្នាថា Real Madrid កំពុងស្ថិតក្នុងបេក្ខភាពជួរមុខ។
Lewandowski ស៊ុតចូល ៤០គ្រាប់ ក្នុងការបង្ហាញខ្លួនឲ្យ Bayern ចំនួន ៤៧ ប្រកួតក្នុងរដូវកាលនេះ៕