Arteta ព្រមព្រៀងធ្វើជាគ្រូបង្វឹកថ្មីរបស់ Arsenal
- 2018-05-19 01:26:51
- ចំនួនមតិ 0 | ចំនួនចែករំលែក 0
Arteta ព្រមព្រៀងធ្វើជាគ្រូបង្វឹកថ្មីរបស់ Arsenal
ចន្លោះមិនឃើញ
អតីតខ្សែបម្រើក្លឹបកាំភ្លើងធំ Mikel Arteta បានយល់ព្រមដើម្បីជំនួសលោក Arsene Wenger ធ្វើជាគ្រូបង្វឹកថ្មីនៅ Arsenal ដែលគេជឿថាការប្រកាសជាផ្លូវការនឹងកើតឡើងនាប៉ុន្មានថ្ងៃខាងមុខ។ នេះបើតាម Goal ទើបបានចុះផ្សាយ។
បើទោះជាពុំទាន់មានការចុះកិច្ចសន្យាផ្លូវការ ប៉ុន្តែប្រភពខាងលើជឿថា អតីតកីឡាករសញ្ជាតិអេស្ប៉ាញនឹងធ្វើដំណើរទៅកាន់ទឹកដី Emirates នាប៉ុន្មានថ្ងៃទៀតនេះ ដើម្បីជំនួសតំណែង Wenger។
Arteta បច្ចុប្បន្នជាជំនួយការរបស់លោក Pep Guardiola នៅក្លឹប Manchester City និងជាផ្នែកមួយដ៏សំខាន់ក្នុងការរៀបចំក្លឹបរបស់មហាសេដ្ឋីប្រេងរបស់ប្រទេសអារ៉ាប់រួមឱ្យទទួលបានជោគជ័យក្នុងក្របខ័ណ្ឌ Premier League រដូវកាលនេះ។
នាយកប្រតិបត្តិក្រុមកាំភ្លើងធំលោក Ivan Gazidis ជឿយ៉ាងមុតមាំថា Arteta វ័យ៣៦ឆ្នាំនឹងក្លាយជាគ្រូបង្វឹកវ័យក្មេងដែលនឹងអាចបង្កើតរចនាសម្ព័ន្ធបាល់ទាត់អឺរ៉ុបសម័យទំនើប។ គាំទ្រដោយប្រធានជ្រើសតាំងបុគ្គលិករបស់ក្លឹប គឺ លោក Sven Mislintatនិង ប្រធានផ្នែកទំនាក់ទំនង លោក Raul Sanllehi សុទ្ធតែជឿជាក់ដូចគ្នាចំពោះ Arteta។
ការលេចឡើងដែលថា Arteta គឺជាជម្រើសចម្បងរបស់ Arsenal ក្នុងការជំនួសតំណែងលោក Wenger បានកើតឡើងក្រោយពីលោក Massimiliano Allegri បានសម្រេចចិត្តថានឹងបន្តនៅដឹកនាំ Juventus ដោយមិនជ្រើសយកកាំភ្លើងធំឡើយ។
លោក Luis Enrique ក៏ត្រូវបានគេចាត់ទុកថាជាបេក្ខភាពគ្រូបង្វឹកថ្មីសម្រាប់ក្រុមកាំភ្លើងធំផងដែរ។ ប៉ុន្តែ ប្រធានផ្នែកទំនាក់ទំនងរបស់ក្លឹប Arsenal លោក Sanllehi ដែលបានស្គាល់គ្រូបង្វឹកវ័យ៤៨ឆ្នាំ អំឡុងពេលពួកលោកធ្លាប់នៅ Camp Nou ជាមួយគ្នា បានព្រមានក្លឹប Arsenal មិនឲ្យជ្រើសរើសអតីតគ្រូបង្វឹក Barcelona រូបនេះឡើយ ដោយយោលលើហេតុផលថា Enrique ជាមនុស្សពិបាកធ្វើការជាមួយ។
Arteta បានចាកចេញពី Arsenal នៅពេលលោកចូលនិវត្តន៍កាលពីឆ្នាំ ២០១៦ ដោយបានបង្ហាញខ្លួនចំនួន ១៥០ ប្រកួត ទាត់បញ្ចូលទីបាន ១៦ គ្រាប់ អំឡុងពេលលេងបាន៤រដូវកាលនៅឯកីឡដ្ឋាន Emirates៕