លោកតាអាយុ ១២១ ឆ្នាំនិយាយថា គន្លឹះជួយឱ្យអាយុវែង គឺធ្វើការងារឱ្យសកម្ម កុំខ្ជិលច្រអូស
- 2018-05-19 06:32:14
- ចំនួនមតិ 0 | ចំនួនចែករំលែក 0
លោកតាអាយុ ១២១ ឆ្នាំនិយាយថា គន្លឹះជួយឱ្យអាយុវែង គឺធ្វើការងារឱ្យសកម្ម កុំខ្ជិលច្រអូស
ចន្លោះមិនឃើញ
អ្នកប្រហែលជាមិនជឿទេថាបុរសដែលកំពុងមើលថែមាន់នៅកសិដ្ឋានគ្រួសារគាត់ មានអាយុ ១២១ ឆ្នាំ ប៉ុន្តែយោងតាមសំបុត្រកំណើតនិងអត្តសញ្ញាណបណ្ណម៉ិកស៊ិកផ្លូវការរបស់លោកតា ម៉ានូអែល ហ្គាសៀ ហឺណង់ដេស (Manuel Garcia Hernandez) គឺគាត់ពិតជាមានអាយុប៉ុនហ្នឹងមែន។
លោកតាហ្គាសៀ ដែលប្រហែលជាបុរសចាស់ជាងគេបំផុតនៅលើពិភពលោក បានកើតនៅថ្ងៃទី ២៤ ធ្នូ ឆ្នាំ ១៨៩៦។ នេះបើយោងតាមសំបុត្រកំណើតរបស់គាត់ពីរដ្ឋវើរ៉ាគ្រូស និង អត្តសញ្ញាណបណ្ណផ្លូវការរបស់គាត់ពីវិទ្យាស្ថានបោះឆ្នោតជាតិ។
គាត់មិនដែលរំខានមនុស្សនៅឯកំណត់ត្រាពិភពលោកហ្គីណេស (Guinness World Records) ដើម្បីធ្វើឱ្យអាយុគាត់ជាប់កំណត់ត្រាផ្លូវការនោះទេ។
ប៉ុន្តែប្រសិនបើឯកសាររបស់គាត់ត្រឹមត្រូវមែននោះ គាត់មានអាយុបង លោកម៉ាសាហ្សូ ណូណាកា (Masazo Nonaka) របស់ជប៉ុនដល់ទៅ ៨ ឆ្នាំ ដែលបច្ចុប្បន្នគាត់ជាអ្នកកាន់កំណត់ត្រាបុរសអាយុវែងបំផុត គឺកើតនៅថ្ងៃទី ២៥ កក្កដា ឆ្នាំ ១៩០៥។
ទោះយ៉ាងណា អាយុគ្រាន់តែជាតួលេខប៉ុណ្ណោះ។ លោកតាហ្គាសៀនិយាយថា គាត់មិនដែលមានអារម្មណ៍ថា គាត់មានអាយុលើសពី ៨០ ឆ្នាំទេ។
គាត់និយាយថាគាត់មានការសោកស្តាយចំនួន ២ នៅក្នុងជីវិតដ៏យូររបស់គាត់ គឺការបាត់បង់ឪពុកតាំងពីគាត់នៅក្មេង និងការពិតដែលថាគាត់មិនអាចធ្វើការងារបានតទៅទៀត។
ប៉ុន្តែ គាត់នៅតែស្រេកឃ្លានចង់ធ្វើការ ខណៈគាត់ឱ្យចំណីមាន់នៅផ្ទះដែលគាត់រស់នៅជាមួយកូនស្រីរបស់គាត់ ឈ្មោះ ថូម៉ាសា នៅទីក្រុងស៊ីវដាចារ៉េស (Ciudad Juarez) ភាគខាងជើង ប្រទេសម៉ិកស៊ិក។
ស្លៀកពាក់ខោខូវប៊យនិងអាវលោកខាងលិចរបស់គាត់ លោកតាហ្គាសៀនិយាយថា “ខ្ញុំសប្បាយចិត្ត ប៉ុន្តែខ្ញុំពិតជាអស់កម្លាំងខ្លាំងណាស់។ ខ្ញុំកំពុងខិតខំប្រឹងប្រែង ព្រោះប្រសិនបើខ្ញុំទៅដេកលើគ្រែ ឬអង្គុយកៅអីពេញមួយថ្ងៃ ខ្ញុំនឹងឈឺ”។
លោកតាបានប្រាប់ទីភ្នាក់ងារសារព័ត៌មានបារាំង (AFP) ថា “ខ្ញុំមានអារម្មណ៍ថាខ្ញុំមានអាយុ ៨០ ឆ្នាំ ទោះបីជាខ្ញុំចាប់ផ្តើមដើរញ័របន្តិចក៏ដោយ”៕
ចុចអាន៖