Zenbook Pro 15 តម្លៃមិនសំខាន់ តែកម្លាំងម៉ាស៊ីនទំនើបកប់ពពក

2018-05-20 02:02:31
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រុមហ៊ុន Asus បានប្រកាសបង្ហាញនូវកុំព្យូទ័រយួរដៃជំនាន់ថ្មីម៉ូឌែល Zenbook Pro 15 បំពាក់កម្លាំងម៉ាស៊ីនខ្លាំង ល្មមឲ្យគូប្រជែងខ្លាចរអា។ គែមព័ទ្ធជុំវិញកម្រាស់ ១៨,៩ ម.ម មានទម្ងន់ស្រាលត្រឹម ១,៨៥ គីឡូក្រាម បន្សំអង្គគណនា Core i9 Hexacore ជាមួយ GPU ធុនខ្ពស់ GTX 1050 លាយឡំការបន្ថែមនូវឧបករណ៍បំពងសំឡេង (Speaker) ស្លាកយីហោល្បីពី Harman Kardon និងដំឡើងកម្រិតរូបភាពច្បាស់លើអេក្រង់ដល់ 4K។

CPU ជំនាន់ Core i9 ប្រទះឃើញមានតិចបំផុតលើ Laptop សេរ៊ីបច្ចុប្បន្ន ប៉ុន្តែចំពោះ Zenbook Pro 15 ក៏មានជម្រើសអង្គគណនាធុនកណ្តាល 6 Core ជំនាន់ Core i7-8750H ឬ 4 Core ជំនាន់ Core i5-8300H និងប្រភេទទាំងពីរប្រើអេក្រង់ទំហំ ១៥,៥ អ៊ីញ IPS LCD កម្រិត 4K/1080P ដូចគ្នា។

ការរចនាតួខ្លួនខាងក្រៅទាក់ភ្នែកអ្នកប្រើប្រាស់ ដោយលាយឡំពណ៌ Rose Gold នៅតាមគែមព័ទ្ធសងខាង ជាមួយសារធាតុអាលុយមីញ៉ូមល្បីឈ្មោះ Deep Dive Blue ។ ចំពោះ RAM ក៏មានជម្រើស 8/16GB ហើយក្រុមហ៊ុន Asus ផ្តល់ជូននូវ SSD ធំឡើងដល់ 1TB (Pcle 3.0 x4/NVMe)។ អ្នកអាចទទួលបានរន្ធដោត Thunderbolt 3 ចំនួន ២ រន្ធ, USB 3.1 Gen 2 ចំនួន ២ រន្ធ, រន្ធដោត HDMI, រន្ធ microSD និងរន្ធសំឡេង TRRS។

កម្លាំងថាមពលថ្មប្រភេទ Li-Poly ទំហំ 71 វ៉ាត់ម៉ោង ដោយ Asus បញ្ជាក់យ៉ាងច្បាស់ថាកុំព្យូទ័រយួរដៃមួយនេះនឹងអាចប្រើប្រាស់បានដល់ ៩,៥ ម៉ោង ខណៈតម្លៃនិងទីផ្សារចេញលក់ មិនទាន់ត្រូវបានក្រុមហ៊ុនបង្ហើបប្រាប់នៅឡើយ។