លើកទីប៉ុន្មានហើយ ដែលលោក Mourinho បញ្ចប់រដូវកាលដោយគ្មានពាន តាំងពីចាប់អាជីពចាត់ការមក?

2018-05-21 11:04:40
ចំនួនមតិ 0 | ចំនួនចែករំលែក 0

ចន្លោះមិនឃើញ

ការចាញ់ FA Cup ក្រោមថ្វីជើង Chelsea កាលពីយប់ថ្ងៃសៅរ៍កន្លងទៅ មានន័យថា Manchester United ក្រោមការដឹកនាំដោយលោក Jose Mourinho បានបញ្ចប់រដូវកាល ២០១៧/១៨ ដោយមិនបានឈ្នះពានសូម្បីតែមួយ។ នេះជាលើកទី ៤ ហើយ ដែលអ្នកចាត់ការព័រទុយហ្គាល់បញ្ចប់រដូវកាលក្នុងស្ថានភាពបែបនេះ។

តាំងពីចាប់ដឹកនាំផ្លូវការមកកាលពីឆ្នាំ ២០០២ លោក Mourinho តែងបញ្ចប់រដូវកាលដោយឈ្នះពានយ៉ាងតិចក៏ ១ ដែរ លើកលែងតែរដូវកាល ២០០៧/០៨, ២០១៣/១៤, ២០១៥/១៦ (ដឹកនាំក្លឹប Chelsea) និងលើកទី ៤ គឺរដូវកាល ២០១៧/១៨ នេះឯង។

ក្នុងចំណោមរដូវកាលទាំង ៤ ខាងលើ មាន ២ លើកដែលលោកត្រូវបានបញ្ចប់ពីការងារ (រដូវកាល ២០០៧/០៨ និង ២០១៥/១៦)។

ប្រភព៖ Marca

បើមើលតាមគម្លាតនៃរដូវកាល ឃើញថា លោកអ្នកចាត់ការព័រទុយហ្គាល់បានបញ្ចប់រដូវកាលដោយដៃទទេដល់ទៅ ៣ លើក (២០១៣/១៤, ២០១៥/១៦ និង២០១៧/១៨) ក្នុងរយៈពេល ៥ឆ្នាំចុងក្រោយ។

សូមបញ្ជាក់ផងដែរ ក្នុងរដូវកាល ២០១៧/១៨នេះ លោក Jose Mourinho បានជួយក្លឹបបិសាចក្រហមឲ្យបានចំណាត់ថ្នាក់លេខ ២ ក្នុង Premier League ជាមួយនឹងពិន្ទុចំនួន ៨១។ ទោះជាយ៉ាងណា ក្លឹបជើងឯកអង់គ្លេស ២០សម័យ ត្រូវបានទម្លាក់ដោយក្លឹប Bristol City ក្នុង League Cup នៅវគ្គ ៨ ក្រុមចុងក្រោយ ហើយបានធ្លាក់ពី Champions League ក្រោមថ្វីជើង Sevilla ក្នុងវគ្គ ១៦ ក្រុម និងចុងក្រោយចាញ់ Chelsea ១-០ ក្នុងកម្មវិធី FA Cup វគ្គផ្ដាច់ព្រ័ត្រ៕

ប្រភព៖ Marca ប្រែសម្រួល៖ ហ៊ីម រស្មី