បន្ថែមលើការជូនដំណឹង កម្ពុជាគួរមានវិធានតឹងរឹង លើផលិតផលប៉ះពាល់សុខភាព

2018-05-22 09:13:26
ចំនួនមតិ 0 | ចំនួនចែករំលែក 0

ចន្លោះមិនឃើញ

ក្រៅពីការចេញប្រកាសរបស់ក្រសួងសុខាភិបាលជាបន្តបន្ទាប់ ស្ដីការហាមប្រើប្រាស់ និងចែកចាយផលិតផលខូចសុខភាព និងប៉ះពាល់ដល់ជីវិត អ្នកឃ្លាំមើលបញ្ហាសង្គម១រូបថា បានលើកឡើងថា កម្ពុជា គួរតែមានវិធានការច្បាប់តឹងរឹង ដើម្បីប្រសិទ្ធភាពរយៈពេលវែង។

ផលិតផលបំប៉នផ្លូវភេទ ដែលក្រសួងសុខាភិបាលបានប្រកាសហាមឃាត់

លោក សន ជ័យ អ្នកឃ្លាំមើលបញ្ហាសង្គម និងជានាយកប្រតិបត្តិ នៃសម្ព័ន្ធគណនេយ្យភាពសង្គម បានលើកឡើងថា មិនគ្រប់គ្រាន់ទេ បើគ្រាន់តែក្រសួងចេញការជូនដំណឹង ចំពោះចរាចរ និងការចែកចាយផលិតផលប៉ះពាល់សុខភាព មានដូចជា ផលិតផលជំនួយផ្លូវភេទ អាហារបំប៉នសុខភាព ឬថ្នាំសម្រកទម្ងន់ដែលនៅតែមានច្រើន។ លោកថា សេចក្ដីជូនដំណឹងរបស់ក្រសួងសុខាភិបាល ដែលធ្លាប់បានចេញកន្លងទៅ ពុំមានផ្ទុកវិធានគតិយុទ្ធអ្វីធ្ងន់ឡើយ។

រូបលោក លោក សន ជ័យ (ពីហេ្វសប៊ុក)

លោក សន ជ័យ ចង់ឲ្យមានមានវិធានការច្បាប់ជាក់លាក់ រួមនឹងកាអនុវត្ត និងការចុះទៅបង្ក្រាបដល់កន្លែង ឬបិទទីតាំងអាជីវកម្មខូចសុខភាពនោះ។ អ្នកឃ្លាំមើលបញ្ហាសង្គម បន្តថាការអនុវត្តទោស ចំពោះអ្នកល្មើស ក៏ជាកត្តាចាំបាច់ ដើម្បីជាគម្រូ១ ការពារករណីក្រោយៗ បន្ថែមពីការរាយការណ៍ ឬជូនដំណឹងមកក្រសួងតាមទូរសព្ទ។

កន្លងទៅ លោក ឃ្លាំង សាម៉េត ឱសថការី និងជាប្រធានការិយាល័យនិយ័ត កម្ម នៃក្រសួងសុខាភិបាល ធ្លាប់បានប្រាប់ Sabay ថាចំណាត់ការ ជាដំបូង ក្រសួងធ្វើសេចក្ដីជូនដំណឹងសិន បើនៅតែល្មើសទៀត នោះក្រសួងនឹងសហការជាមួយព្រះរាជអាជ្ញា ដើម្បីចាត់វិធានការតាមច្បាប់ គឺចុះបង្ក្រាប នឹងកសាងសំណុំរឿងមុនបញ្ជូនបន្តទៅតុលាការ៕