ក្នុងថ្ងៃនេះ ក្លឹប ២ រកឃើញគ្រូថ្មី ខណៈគ្រូអេស្ប៉ាញតកុងត្រា
- 2018-05-22 12:06:51
- ចំនួនមតិ 0 | ចំនួនចែករំលែក 0
ក្នុងថ្ងៃនេះ ក្លឹប ២ រកឃើញគ្រូថ្មី ខណៈគ្រូអេស្ប៉ាញតកុងត្រា
ចន្លោះមិនឃើញ
នៅថ្ងៃនេះ ក្លឹប West Ham និង Borussia Dortmund បានតែងតាំងអ្នកចាត់ការថ្មីរបស់ខ្លួន។ ដោយឡែក នៅជម្រើសជាតិអេស្ប៉ាញវិញ គ្រូបង្វឹក Julen Lopetegui បានបន្តកុងត្រាថ្មី។
នៅរសៀលថ្ងៃនេះ ក្លឹប West Ham នៃលីគកំពូលអង់គ្លេស បានតែងតាំងអតីតអ្នកចាត់ការក្លឹប Manchester City លោក Manuel Pellegrini ក្នុងកុងត្រារយៈពេល ៣ឆ្នាំ។ អ្នកចាត់ការទើបចាកចេញពីក្លឹបចិន Hebei China Fortune កាលពីចុងសប្ដាហ៍បន្ទាប់ពីដឹកនាំមិនសូវបានជោគជ័យ។ ក្លឹបញញួរ បានហៅលោក Pelleigrini ថាជាអ្នកចាត់ការដែលមាន"កេរ្តិ៍ឈ្មោះក្នុងការដឹកនាំក្លឹបឲ្យលេងបាល់ទម្រង់ប្រយុទ្ធ"។ ការតែងតាំងនេះធ្វើឲ្យលោក Pellegrini ក្លាយអ្នកចាត់ការទីមួយ ក្នុងប្រវត្តិសាស្ត្រ West Ham ដែលធ្លាប់ឈ្នះ Premier League (២០១៣/១៤)។
នៅអាល្លឺម៉ង់វិញ ក្លឹប Dortmund បានរកឃើញអ្នកចាត់ការថ្មីរបស់ខ្លួន។ អ្នកចាត់ការនោះគឺលោក Lucien Favre ដែលទើបចាកចេញពីតំណែងជាអ្នកចាត់ការក្លឹប Nice របស់បារាំង។ ក្នុង Bundesliga លោក Favre ធ្លាប់ដឹកនាំក្លឹប Hertha Berlin (២០០៧-០៩) និង Borussia Monchengladbach (២០១១-១៥) មុនចេញទៅក្របខ័ណ្ឌ Ligue 1 ធ្វើជាអ្នកចាត់ការក្លឹប Nice រយៈពេល ២រដូវកាល។ គិតចាប់ពីរដូវកាល ២០០៨/០៩ មិនមានអ្នកចាត់ការណាក្រៅពីលោក Jurgen Klopp (៥លើក) ធ្លាប់ឈ្នះ Bayern Munich ក្នុងលីគកំពូលអាល្លឺម៉ង់ លើសលោក Lucien Favre (៤លើក) ឡើយ។
ដោយឡែកក្នុងក្រុមជម្រើសជាតិអេស្ប៉ាញ គ្រូបង្វឹក Julen Lopetegui បានតកុងត្រាថ្មីរហូតដល់ឆ្នាំ ២០២០។ ការផ្ដល់កុងត្រាថ្មីធ្វើឡើងជិត ១ ខែទៀតប៉ុណ្ណោះមុន World Cup។ តាំងពីត្រូវបានតែងតាំងជាគ្រូបង្វឹកអេស្ប៉ាញកាលពីឆ្នាំ ២០១៦ មក លោក Lopetegui បានបង្ហាញទម្រង់នៃការដឹកនាំបានល្អ។ ក្នុងប្រកួតក្រោមការដឹកនាំរបស់លោកសរុបចំនួន ១៨ ក្រុមជម្រើសជាតិអេស្ប៉ាញមិនដែលស្គាល់រសជាតិចាញ់ឡើយ (ឈ្នះ ១៣ និងស្មើ ៥)។
ចំណែក Arsenal វិញ នឹងប្រកាសផ្លូវការក្នុងការតែងតាំងអតីតអ្នកចាត់ការ PSG លោក Unai Emery ជំនួសអ្នកចាត់ការចាស់វស្សា Arsene Wenger ក្នុងសប្ដាហ៍នេះ។ នេះបើតាមការចុះផ្សាយរបស់ BBC៕