Bradi Pitt និង Angelina Jolie នៅតែមានបញ្ហារឿងកូនមិនឈប់ឈរ
- 2018-05-25 02:40:00
- ចំនួនមតិ 0 | ចំនួនចែករំលែក 0
Bradi Pitt និង Angelina Jolie នៅតែមានបញ្ហារឿងកូនមិនឈប់ឈរ
ចន្លោះមិនឃើញ
គិតមកត្រឹមពេលនេះគឺ ជិតពីរឆ្នាំហើយ Angelina Jolie បានប្ដឹងលែងលះពីស្វាមី Brad Pitt ប៉ុន្តែមកដល់ពេលនេះទៅហើយ បញ្ហាផ្សេងៗនៅតែដោះស្រាយមិនទាន់ដាច់ស្រេចនៅឡើយ។
ប្រភពមួយបានប្រាប់សារព័ត៌មាន E!News ថាម្ដាយឪពុកល្បីមួយគូនេះ កំពុងតែមានជម្លោះខ្លាំងបញ្ហាសិទ្ធចិញ្ចឹមកូន ទាំង៦ Maddox, Pax, Zahara, Shiloh, Knox និង Vivienne។ បញ្ហានេះហើយជាហេតុធ្វើឲ្យការលែងលះនេះមិនទាន់បញ្ចប់ និងបន្តរាប់ខែ។
“បញ្ហាចុងក្រោយដែលកើតឡើងនេះគឺដោយសារតែ Angelina ចង់ទៅថតរឿងនៅអឺរ៉ុបរយៈពេលរាប់ខែ និងចង់យកកូនៗទាំង៦ទៅតាមខ្លួន។ ប៉ុន្តែ Brad ប្រឆាំងនឹងសំណើនេះនិងមិនចង់ឲ្យ Angie នាំកូនៗទៅណាឡើយ ព្រោះលោកនឹងត្រូវសម្ដែងរឿងនៅទីក្រុង Los Angeles សម្រាប់រដូវក្ដៅនេះនិងចង់មកលេងកូនជាធម្មតាដូចតាមកាលវិភាគសិទ្ធមកលេងកូនរបស់លោក។" ប្រភពនេះបន្ត។
ចំពោះពេលនេះអ្នកទាំងពីរកំពុងតែខឹងគ្នាយ៉ាងខ្លាំង ដោយសារតែចង់ចំណាយពេលជាមួយកូនៗ។ ប្រភពបន្ត "លោកមិនសប្បាយចិត្តដែលកូនៗត្រូវទៅឆ្ងាយរយៈពេលរាប់ខែនោះទេ។ លោកគិតថាពួកគេគួរតែរស់នៅទីក្រុង Los Angeles មិនទៅណា ព្រោះវាជាកន្លែងល្អបំផុតសម្រាប់ពួកគេ។"
ប៉ុន្តែនេះមិនមែនមានន័យថា Angie មិនអាចធ្វើដំណើរកម្សាន្តជាមួយកូនៗបានទេ។ តារារូបនេះទើបតែនាំ Shiloh និង Zahara ទៅប្រទេស Jordan កាលពីខែមករា ដើម្បីទៅសួរសុខទុក្ខជំរំជនភៀសខ្លួន។ នាងក៏បាននាំកូនៗទាំងអស់របស់នាងទៅលេងទីក្រុងប៉ារីសនៅខែដដែល។ មិនត្រឹមតែប៉ុណ្ណោះនាងក៏បានទៅលេងប្រទេសអង់គ្លេសទៀតផង។
នៅពេល Angie ប្ដឹងលែងលះនៅខែកញ្ញាឆ្នាំ ២០១៦ នាងបានស្នើសុំ សិទ្ធិចិញ្ចឹមកូនទាំងអស់ ក្រោយមក Brad ក៏ដាក់ពាក្យសុំចូលរួមចិញ្ចឹមកូនដែរនៅខែវិច្ឆិកា។ ត្រឹមខែធ្នូ តុលាការបានកាត់ក្ដីឲ្យ Angie មានសិទ្ធិចិញ្ចឹមកូន ប៉ុន្តែ Brad មានសិទ្ធិបានត្រឹមតែទៅលេងកូនម្ដងៗ។
ការសម្រេចចិត្តនេះត្រូវបានធ្វើឡើងភ្លាមៗ ក្រោយ FBI បញ្ចប់ការស៊ើបអង្កេតទៅលើអាកប្បកិរិយារបស់ Brad Pitt ដែលលោកត្រូវគេចោទថាធ្វើបាបកូននៅលើយន្តហោះឯកជន។ ប៉ុន្តែក្រោយមកពាក្យបណ្ដឹងក៏ត្រូវលុបចោលវិញ ហើយ Brad Pitt មិនមែនទោសទណ្ឌអ្វីឡើយ៕