ជីវិតតស៊ូរបស់ Sanchez៖ ពីអ្នកលាងឡានរហូតដល់រកបានរាប់សែនក្នុងមួយអាទិត្យៗ

2018-05-25 13:05:37
ចំនួនមតិ 0 | ចំនួនចែករំលែក 0

ចន្លោះមិនឃើញ

បើតាមការចុះផ្សាយរបស់សារព័ត៌មាន Goal ខ្សែប្រយុទ្ធ Alexis Sanchez បច្ចុប្បន្នគឺជាកីឡាករដែលមានប្រាក់ឈ្នួលច្រើនជាងគេក្នុងចំណោមកីឡាករ Premier League។ បើទោះជាទិន្នន័យហាក់ខុសគ្នាបន្តិច យោងតាមប្រភពដដែល កីឡាកររកបាន ៣៥ ម៊ឺនផោន (ប្រមាណ ៤៦ ម៊ឺនដុល្លារសហរដ្ឋអាមេរិក) ក្នុងមួយសប្ដាហ៍នៅ Manchester United។ យ៉ាងនេះក្ដី កីឡាករបានឆ្លងកាត់វិថីជីវិតច្រើន ទម្រាំឈានជើងមកដល់ស្ថានភាពដូចសព្វថ្ងៃ។

កីឡាករ Sanchez បានកើតនៅទីក្រុងតូចមួយឈ្មោះ Tocopilla នៅប្រទេសឈីលី។ ក្នុងបទសម្ភាសន៍ជាច្រើនកាលពីពេលកន្លងទៅ ខ្សែប្រយុទ្ធរូបនេះ បានឲ្យដឹងថា កាលពីនៅក្មេង ខ្លួនបានជួបប្រទះនឹងទុក្ខលំបាកច្រើន។

ឪពុករបស់ Sanchez បានចាកចោលពីគ្រួសារ តាំងពីកីឡាករទើបនឹងកើតម្ល៉េះ ជាហេតុធ្វើឲ្យបន្ទុករ៉ាប់រងជីវភាពគ្រួសារធ្លាក់លើម្ដាយ។ ម្ដាយរបស់ Sanchez បានប្រកបរបរលក់ត្រី និងបោសសម្អាតនៅតាមសាលារៀននៅជិតផ្ទះរបស់ខ្លួន ដើម្បីរកប្រាក់កម្រៃចិញ្ចឹមគ្រួសារ។

ក្នុងបទសម្ភាសន៍មួយកាលពីឆ្នាំ ២០១៤ កីឡាករឈីលី បានទម្លាយថាដោយគ្រួសារមានជីវភាពទីទ័លក្រពេក ខ្សែប្រយុទ្ធក៏បានសម្រេចធ្វើការងារមួយចំនួន ដើម្បីព្យាយាមរកចំណូល។

កីឡាករធ្លាប់ធ្វើការលោតដាំដូងថយក្រោយ (Somersault) និងលាងឡាន ដើម្បីបានជាប្រាក់កម្រៃបន្តិចបន្តួច។ Sanchez បាននិយាយថា៖ "ដោយខ្ញុំចេះលោតដាំដូងថយក្រោយ មានមនុស្សមួយចំនួនស្នើឲ្យខ្ញុំធ្វើបែបនេះ ហើយពួកគេឲ្យប្រាក់ខ្ញុំពី ៥០ ទៅ ១០០ Peso (ប្រមាណ ៥០០ រៀល)។ ដើម្បីរកប្រាក់ ខ្ញុំក៏ធ្លាប់លាងឡានឲ្យគេផងដែរ"។

ជីវិតរបស់ Sanchez បានជួបនឹងរបត់ថ្មីមួយ ពេលកីឡាករប្ដេជ្ញានឹងក្លាយជាកីឡាករបាល់ទាត់ ដើម្បីស្រោចស្រង់ជីវភាពគ្រួសារពីភាពក្រីក្រ។ កាលពីនៅតូច កីឡាករបានធ្លាប់ប្រាប់ម្ដាយខ្លួនថា៖ "កុំភ័យអី ខ្ញុំនឹងក្លាយជាកីឡាករបាល់ទាត់ បើសិនជាអាជីពជោគជ័យ យើងនឹងមានលុយ"។

កាលពីនៅក្មេង Sanchez ត្រូវបានប្រទះលេងបាល់នៅតាមដងផ្លូវនៅទីក្រុងកំណើត Tocopilla។ កីឡាករមានភាពលេចធ្លោត្រង់លេងបាល់ជើងទទេ ហើយរត់បានយ៉ាងលឿន រហូតត្រូវបានគេដាក់រហស្សនាមថា Dilla (សត្វកំប្រុក)។ Sanchez បានចូលរួមជាមួយក្លឹបឈីលី Arauco FC នៅវ័យ ៦ឆ្នាំ និងលេងនៅទីនោះមុនពេលផ្ទេរទៅក្លឹប Rancagua នៅអាយុ ១៣ឆ្នាំ។

ទេពកោសល្យរបស់ Sanchez បានទាក់ទាញក្លឹបក្នុងស្រុកមួយទៀតឈ្មោះ Cobreloa។ កីឡាករលេងឲ្យក្លឹបក្នុងឈុតយុវជនមួយរដូវកាល (២០០៤/០៥) មុនឡើងមកលេងឈុតធំមួយរដូវកាលបន្ទាប់។ ដោយបង្ហាញទម្រង់លេងល្អ ក្រោយមក ក្លឹបអ៊ីតាលី Udinese ក៏បានសម្រេចទិញ Sanchez ពី Cobreloa។

កីឡាករចាប់ផ្ដើមអភិវឌ្ឍខ្លួនបន្តិចម្ដងៗ រហូតបានផ្ទេរទៅក្លឹប Barcelona នៅឆ្នាំ ២០១១។ នៅអេស្ប៉ាញ កីឡាករស៊ុតចូលសរុប ៤៧ គ្រាប់ ក្នុងអំឡុងពេល ៣ ឆ្នាំនៅទីនោះ។

កីឡាករបានបន្តអាជីពរបស់ខ្លួននៅ Arsenal នៅឆ្នាំ ២០១៤។ នៅក្លឹបឡុងដុងនេះហើយ ដែលកីឡាករក្លាយជាកីឡាករដ៏បង្គោលរបស់ក្លឹប ហើយចាប់ផ្ដើមត្រូវបានមជ្ឈដ្ឋានបាល់ទាត់ជាច្រើនទទួលស្គាល់។ អំឡុងពេល ៤ឆ្នាំ នៅជាមួយក្លឹបកាំភ្លើងធំ កីឡាករឈីលីរកបានសរុប ៨០ គ្រាប់។