Ramos ចេញមុខនិយាយហើយ រឿងគេចោទថាធ្វើឱ្យ Salah របួសស្មា

2018-05-27 04:02:09
ចំនួនមតិ 0 | ចំនួនចែករំលែក 0

ចន្លោះមិនឃើញ

Sergio Ramos ត្រូវបានអ្នកគាំទ្រជាច្រើន រិះគន់ថាជាអ្នកធ្វើឱ្យ Salah រងរបួសស្មាធ្ងន់ ត្រូវប្ដូរចេញនៅនាទី៣១ តង់ទី១ នៃការប្រកួតផ្ដាច់ព្រ័ត្រយប់មិញនេះ។

ក្រោយពីចប់ការប្រកួតទៅ មានអ្នកគាំទ្រច្រើនដាក់បន្ទុកទៅលើ Ramos ចំពោះរបួសខាងលើដែលបណ្ដាលមកពីការប្រជែងគ្នាយកបាល់។ យ៉ាងណាមិញ មានអ្នកវិភាគ២នាក់ គឺ Frank Lampard និង Rio Ferdinand ដែលជាអតីតកីឡាករលេងរាប់ឆ្នាំ គិតថាមិនគួរអ្នកគាំទ្រគិតថាប្រធានក្រុម Real Madrid ខុសទេ ព្រោះកាលៈទេសៈនោះជាពេលដែលមានការប្រជែងខ្ពស់ ហើយឱកាសនៃការរងរបួសក៏មានច្រើនដែរ បើមិនប្រុងប្រយ័ត្នខ្ពស់។

បើទោះជាមានការរិះគន់ច្រើនយ៉ាងណាក៏ដោយ ខ្សែការពារជម្រើសជាតិអេស្ប៉ាញបានបង្ហោះសារមួយនៅលើបណ្ដាញសង្គមរបស់ខ្លួនថា ៖ “ពេលខ្លះ បាល់ទាត់បានបង្ហាញអ្នក ថាពេលខ្លះនៅខាងល្អ ហើយពេលខ្លះទៀតនោះ នៅខាងអាក្រក់។ តែយើងនៅតែជាជើងឯកដដែល។ ជូនពរ ឆាប់ជាសះស្បើយ Salah … អនាគតកំពុងរង់ចាំអ្នក”។

បើតាមការបញ្ជាក់របស់លោក Klopp គឺ Salah រងរបួសធ្ងន់ត្រង់ស្មារបស់គេខ្លាំង ប៉ុន្តែមិនទាន់ច្បាស់ថាអាចជាទាន់ពេលលេង World Cup ឬយ៉ាងណាទេ។ ដោយឡែកខាងសហព័ន្ធបាល់ទាត់អេហ្ស៊ីបវិញ បានបញ្ជាក់ថាខ្សែប្រយុទ្ធរបស់ខ្លួន ដាច់សរសៃឈាមត្រង់ស្មា ហើយត្រូវការពេលពិនិត្យបន្ថែមទៀត៕

អត្ថបទ៖ មុន្នីរម្យ