Hailey Baldwin បង្ហើបរឿងទាក់ទងជាមួយ Shawn Mendes និង Justin Bieber

2018-05-30 02:10:00
ចំនួនមតិ 0 | ចំនួនចែករំលែក 0

ចន្លោះមិនឃើញ

មកដល់ពេលនេះតារាម៉ូដែលស្រស់ស្អាត Hailey Baldwin និយាយថានាងនៅទំនេរ ទោះបីជាមានការសង្ស័យថានាងកំពុងតែទាក់ទងជាមួយតារាចម្រៀង Shawn Mendes ថ្មីៗនេះក៏ដោយ។

តារាវ័យ ២១ឆ្នាំនេះបានជជែកវែកញែកអំពីរឿងរ៉ាវដែលនាងទាក់ទងជាមួយតារាចម្រៀងវ័យ១៩ឆ្នាំនេះនៅក្នុងកម្មវិធីសម្ភាសន៍ "The Times UK” ដែលបានចាក់ផ្សាយកាលពីថ្ងៃទី២៧ថ្មីៗនេះ។

បន្ទាប់ពីអ្នកទាំងពីរបានបណ្ដើរគ្នានៅលើកម្រាលព្រំក្រហមកម្មវិធី MET Gala ជាមួយគ្នាដើមខែនេះ Hailey និង Shawn ត្រូវគេគិតថាអ្នកទាំងពីរកំពុងតែទាក់ទងគ្នាផ្លូវការហើយ។

“ពួកយើងដើរលេងជាមួយគ្នា លោកពិតជាបុរសគួរឲ្យស្រលាញ់ម្នាក់ និងពិតជាសុភាពបុរស។ ប៉ុន្តែពេលនេះខ្ញុំនៅទំនេរទេ។" Hailey បញ្ជាក់។

នាងបន្ថែមថា៖ "ការស្វែងរកបុរសល្អម្នាក់ដើម្បីទាក់ទងគឺវាមិនងាយស្រួលទេ វាពិតជាលំបាកក្នុងការស្វែងរកមនុស្សម្នាក់ដែលមានគំនិតនិងអារម្មណ៍ស្រដៀងខ្ញុំ។ ខ្ញុំធ្លាប់រកបានមនុស្សដូចនេះពីមុនមក ហើយវាធ្វើឲ្យខ្ញុំសប្បាយចិត្តយ៉ាងខ្លាំង។"

អ្វីដែលគួរឲ្យចាប់អារម្មណ៍នោះគឺ Shawn ក៏បានលើកឡើងពីបញ្ហានេះដែរ ដោយបញ្ជាក់ថាពួកគេគឺជាមិត្តល្អនឹងគ្នា។

ចំពោះទំនាក់ទំនងរបស់ Hailey និង Justin វិញគឺមានលក្ខណៈច្របូកច្របល់បន្តិច ដោយអ្នកទាំងពីរត្រូវគេប្រទះឃើញដើរលេងជាមួយគ្នាកាលពីឆ្នាំ ២០១៥ នឹងត្រូវគេចែកចាយពេញបណ្ដាញសង្គម។

Hailey បាននិយាយថា នាងនិង Justin គឺជាមិត្តល្អក្នុងរយៈពេលជាយូរមកហើយ។ នាងបានជួបជាមួយ Justin នៅវ័យក្មេងគឺខ្ទង់ ១៨ ១៩ឆ្នាំ ដូច្នេះហើយទើបទំនាក់ទំនងអ្នកទាំងពីរច្របូកច្របល់។ នាងបានឆ្លងកាត់រយៈពេលមួយ ដែលពួកគេស្និទ្ធស្នាលខ្លាំងជាងមិត្តភ័ក្ដិ ព្រមទាំងឆ្លងកាត់រឿងរ៉ាវមិនល្អជាច្រើនជាមួយគ្នា ប៉ុន្តែពេលនេះអ្នកទាំងពីរបានបំភ្លេចរឿងមិនល្អទាំងនោះអស់ហើយ។

សម្រាប់ពេលនេះ Hailey មិនទាន់ទាក់ទងអ្នកណាម្នាក់នោះទេ ដោយផ្ដោតសំខាន់ទៅលើអាជីពជាតារាម៉ូដែលរបស់នាងជំនួសវិញ៕

ប្រភព៖ Eonline ប្រែសម្រួល៖ ធារ៉ូ